| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
៩. ពោធិសិញ្ចកត្ថេរអបទានវណ្ណនា
9. Bodhisiñcakattheraapadānavaṇṇanā
វិបស្សិស្ស ភគវតោតិអាទិកំ អាយស្មតោ ពោធិសិញ្ចកត្ថេរស្ស អបទានំ។ អយម្បិ បុរិមពុទ្ធេសុ កតាធិការោ អនេកាសុ ជាតីសុ វិវដ្ដូបនិស្សយានិ បុញ្ញានិ ឧបចិនន្តោ វិបស្សិស្ស ភគវតោ កាលេ កុលគេហេ និព្ពត្តោ សាសនេ បព្ពជិត្វា វត្តបដិបត្តិយា សាសនំ សោភយន្តោ មហាជនេ ពោធិបូជំ កុរុមានេ ទិស្វា អនេកានិ បុប្ផានិ សុគន្ធោទកានិ ច គាហាបេត្វា បូជេសិ។ សោ តេន បុញ្ញេន ទេវលោកេ និព្ពត្តោ ឆ កាមាវចរសម្បត្តិយោ អនុភវិត្វា ឥមស្មិំ ពុទ្ធុប្បាទេ កុលគេហេ និព្ពត្តោ វុទ្ធិមន្វាយ សទ្ធាជាតោ បព្ពជិត្វា នចិរស្សេវ អរហា អហោសិ។
Vipassissa bhagavatotiādikaṃ āyasmato bodhisiñcakattherassa apadānaṃ. Ayampi purimabuddhesu katādhikāro anekāsu jātīsu vivaṭṭūpanissayāni puññāni upacinanto vipassissa bhagavato kāle kulagehe nibbatto sāsane pabbajitvā vattapaṭipattiyā sāsanaṃ sobhayanto mahājane bodhipūjaṃ kurumāne disvā anekāni pupphāni sugandhodakāni ca gāhāpetvā pūjesi. So tena puññena devaloke nibbatto cha kāmāvacarasampattiyo anubhavitvā imasmiṃ buddhuppāde kulagehe nibbatto vuddhimanvāya saddhājāto pabbajitvā nacirasseva arahā ahosi.
៤៦. សោ អរហា ហុត្វា ឈានផលសុខេន វីតិនាមេត្វា បុព្ពកម្មំ សរិត្វា សោមនស្សជាតោ បុព្ពចរិតាបទានំ បកាសេន្តោ វិបស្សិស្ស ភគវតោតិអាទិមាហ។ តត្ថ វិសេសំ បរមត្ថំ និព្ពានំ បស្សតីតិ វិបស្សី, វិសេសេន ភព្ពាភព្ពជនេ បស្សតីតិ វា វិបស្សី, វិបស្សន្តោ ចតុសច្ចំ បស្សនទក្ខនសីលោតិ វា វិបស្សី, តស្ស វិបស្សិស្ស ភគវតោ មហាពោធិមហោ អហូតិ សម្ពន្ធោ។ តត្រាបិ មហាពោធីតិ ពោធិ វុច្ចតិ ចតូសុ មគ្គេសុ ញាណំ, តមេត្ថ និសិន្នោ ភគវា បដិវិជ្ឈតីតិ កណិការបាទបរុក្ខោបិ ពោធិច្ចេវ វុច្ចតិ, មហិតោ ច សោ ទេវព្រហ្មនរាសុរេហិ ពោធិ ចេតិ មហាពោធិ, មហតោ ពុទ្ធស្ស ភគវតោ ពោធីតិ វា មហាពោធិ, តស្ស មហោ បូជា អហោសីតិ អត្ថោ។ សេសំ សព្ពត្ថ ឧត្តានត្ថមេវាតិ។
46. So arahā hutvā jhānaphalasukhena vītināmetvā pubbakammaṃ saritvā somanassajāto pubbacaritāpadānaṃ pakāsento vipassissa bhagavatotiādimāha. Tattha visesaṃ paramatthaṃ nibbānaṃ passatīti vipassī, visesena bhabbābhabbajane passatīti vā vipassī, vipassanto catusaccaṃ passanadakkhanasīloti vā vipassī, tassa vipassissa bhagavato mahābodhimaho ahūti sambandho. Tatrāpi mahābodhīti bodhi vuccati catūsu maggesu ñāṇaṃ, tamettha nisinno bhagavā paṭivijjhatīti kaṇikārapādaparukkhopi bodhicceva vuccati, mahito ca so devabrahmanarāsurehi bodhi ceti mahābodhi, mahato buddhassa bhagavato bodhīti vā mahābodhi, tassa maho pūjā ahosīti attho. Sesaṃ sabbattha uttānatthamevāti.
ពោធិសិញ្ចកត្ថេរអបទានវណ្ណនា សមត្តា។
Bodhisiñcakattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ៩. ពោធិសិញ្ចកត្ថេរអបទានំ • 9. Bodhisiñcakattheraapadānaṃ
