| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
៩. ពិឡាលិទាយកត្ថេរអបទានវណ្ណនា
9. Biḷālidāyakattheraapadānavaṇṇanā
ហិមវន្តស្សាវិទូរេតិអាទិកំ អាយស្មតោ ពិឡាលិទាយកត្ថេរស្ស អបទានំ។ អយម្បិ បុរិមជិនវរេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ បទុមុត្តរស្ស ភគវតោ កាលេ កុលគេហេ និព្ពត្តោ វិញ្ញុតំ បត្តោ ឃរាវាសំ វសន្តោ តត្ថាទីនវំ ទិស្វា ឃរាវាសំ បហាយ តាបសបព្ពជ្ជំ បព្ពជិត្វា ហិមវន្តេ វសន្តោ អតីវ អប្បិច្ឆសន្តុដ្ឋោ អាលុវាទីហិ យាបេន្តោ វសតិ។ តទា បទុមុត្តរោ ភគវា តស្ស អនុកម្បាយ តំ ហិមវន្តំ អគមាសិ ។ តំ ទិស្វា បសន្នោ វន្ទិត្វា ពិឡាលិយោ គហេត្វា បត្តេ ឱកិរិ។ តំ តថាគតោ តស្សានុកម្បាយ សោមនស្សុប្បាទយន្តោ បរិភុញ្ជិ។ សោ តេន កម្មេន តតោ ចុតោ ទេវមនុស្សេសុ ឧភយសម្បត្តិយោ អនុភវិត្វា ឥមស្មិំ ពុទ្ធុប្បាទេ កុលគេហេ និព្ពត្តិត្វា វុទ្ធិមន្វាយ សត្ថរិ បសន្នោ សាសនេ បព្ពជិត្វា នចិរស្សេវ អរហា អហោសិ។
Himavantassāvidūretiādikaṃ āyasmato biḷālidāyakattherassa apadānaṃ. Ayampi purimajinavaresu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle kulagehe nibbatto viññutaṃ patto gharāvāsaṃ vasanto tatthādīnavaṃ disvā gharāvāsaṃ pahāya tāpasapabbajjaṃ pabbajitvā himavante vasanto atīva appicchasantuṭṭho āluvādīhi yāpento vasati. Tadā padumuttaro bhagavā tassa anukampāya taṃ himavantaṃ agamāsi . Taṃ disvā pasanno vanditvā biḷāliyo gahetvā patte okiri. Taṃ tathāgato tassānukampāya somanassuppādayanto paribhuñji. So tena kammena tato cuto devamanussesu ubhayasampattiyo anubhavitvā imasmiṃ buddhuppāde kulagehe nibbattitvā vuddhimanvāya satthari pasanno sāsane pabbajitvā nacirasseva arahā ahosi.
៥៣. សោ អបរភាគេ អត្តនោ កុសលកម្មំ សរិត្វា សោមនស្សជាតោ បុព្ពចរិតាបទានំ បកាសេន្តោ ហិមវន្តស្សាវិទូរេតិអាទិមាហ។ តំ សព្ពំ ហេដ្ឋា វុត្តនយត្តា ឧត្តានត្ថមេវ។ អាលុវករម្ភាទយោ តេសំ តេសំ កន្ទជាតីនំ នាមានេវាតិ។
53. So aparabhāge attano kusalakammaṃ saritvā somanassajāto pubbacaritāpadānaṃ pakāsento himavantassāvidūretiādimāha. Taṃ sabbaṃ heṭṭhā vuttanayattā uttānatthameva. Āluvakarambhādayo tesaṃ tesaṃ kandajātīnaṃ nāmānevāti.
ពិឡាលិទាយកត្ថេរអបទានវណ្ណនា សមត្តា។
Biḷālidāyakattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ៩. ពិឡាលិទាយកត្ថេរអបទានំ • 9. Biḷālidāyakattheraapadānaṃ
