| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
១០. រេណុបូជកត្ថេរអបទានវណ្ណនា
10. Reṇupūjakattheraapadānavaṇṇanā
សុវណ្ណវណ្ណំ សម្ពុទ្ធន្តិអាទិកំ អាយស្មតោ រេណុបូជកត្ថេរស្ស អបទានំ។ អយម្បិ បុរិមជិនវរេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ វិបស្សិស្ស ភគវតោ កាលេ កុលគេហេ និព្ពត្តោ វុទ្ធិមន្វាយ សត្ថរិ បសន្នោ វិញ្ញុតំ បត្តោ អគ្គិក្ខន្ធំ វិយ វិជ្ជោតមានំ ភគវន្តំ ទិស្វា បសន្នមានសោ នាគបុប្ផកេសរំ គហេត្វា បូជេសិ។ អថ ភគវា អនុមោទនមកាសិ។
Suvaṇṇavaṇṇaṃ sambuddhantiādikaṃ āyasmato reṇupūjakattherassa apadānaṃ. Ayampi purimajinavaresu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle kulagehe nibbatto vuddhimanvāya satthari pasanno viññutaṃ patto aggikkhandhaṃ viya vijjotamānaṃ bhagavantaṃ disvā pasannamānaso nāgapupphakesaraṃ gahetvā pūjesi. Atha bhagavā anumodanamakāsi.
៦២-៣. សោ តេន បុញ្ញេន តតោ ចុតោ ទេវមនុស្សេសុ សំសរន្តោ ឧភយសម្បត្តិយោ អនុភវិត្វា ឧប្បន្នុប្បន្នភវេ សព្ពត្ថ បូជិតោ ឥមស្មិំ ពុទ្ធុប្បាទេ កុលគេហេ និព្ពត្តោ វិញ្ញុតំ បត្តោ បុព្ពវាសនាពលេន សត្ថរិ បសន្នោ សាសនេ បព្ពជិតោ នចិរស្សេវ អរហា ហុត្វា ទិព្ពចក្ខុនា អត្តនោ បុព្ពកម្មំ ទិស្វា សោមនស្សជាតោ បុព្ពចរិតាបទានំ បកាសេន្តោ សុវណ្ណវណ្ណំ សម្ពុទ្ធន្តិអាទិមាហ។ តំ ហេដ្ឋា វុត្តត្ថមេវ។ សតរំសិំវ ភាណុមន្តិ សតមត្តា សតប្បមាណា រំសិ បភា យស្ស សូរិយស្ស សោ សតរំសិ, គាថាពន្ធសុខត្ថំ សតរំសីតិ វុត្តំ, អនេកសតស្ស អនេកសតសហស្សរំសីតិ អត្ថោ។ ភាណុ វុច្ចតិ បភា, ភាណុ បភា យស្ស សោ ភាណុមា, ភាណុមសង្ខាតំ សូរិយំ ឥវ វិបស្សិំ ភគវន្តំ ទិស្វា សកេសរំ នាគបុប្ផំ គហេត្វា អភិរោបយិំ បូជេសិន្តិ អត្ថោ។ សេសំ ឧត្តានមេវាតិ។
62-3. So tena puññena tato cuto devamanussesu saṃsaranto ubhayasampattiyo anubhavitvā uppannuppannabhave sabbattha pūjito imasmiṃ buddhuppāde kulagehe nibbatto viññutaṃ patto pubbavāsanābalena satthari pasanno sāsane pabbajito nacirasseva arahā hutvā dibbacakkhunā attano pubbakammaṃ disvā somanassajāto pubbacaritāpadānaṃ pakāsento suvaṇṇavaṇṇaṃ sambuddhantiādimāha. Taṃ heṭṭhā vuttatthameva. Sataraṃsiṃva bhāṇumanti satamattā satappamāṇā raṃsi pabhā yassa sūriyassa so sataraṃsi, gāthābandhasukhatthaṃ sataraṃsīti vuttaṃ, anekasatassa anekasatasahassaraṃsīti attho. Bhāṇu vuccati pabhā, bhāṇu pabhā yassa so bhāṇumā, bhāṇumasaṅkhātaṃ sūriyaṃ iva vipassiṃ bhagavantaṃ disvā sakesaraṃ nāgapupphaṃ gahetvā abhiropayiṃ pūjesinti attho. Sesaṃ uttānamevāti.
រេណុបូជកត្ថេរអបទានវណ្ណនា សមត្តា។
Reṇupūjakattheraapadānavaṇṇanā samattā.
ឯកាទសមវគ្គវណ្ណនា សមត្តា។
Ekādasamavaggavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ១០. រេណុបូជកត្ថេរអបទានំ • 10. Reṇupūjakattheraapadānaṃ
