| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
១១. ភិក្ខទាយិវគ្គោ
11. Bhikkhadāyivaggo
១. ភិក្ខាទាយកត្ថេរអបទានវណ្ណនា
1. Bhikkhādāyakattheraapadānavaṇṇanā
សុវណ្ណវណ្ណំ សម្ពុទ្ធន្តិអាទិកំ អាយស្មតោ ភិក្ខាទាយកត្ថេរស្ស អបទានំ។ អយម្បិ បុរិមជិនវរេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ សិទ្ធត្ថស្ស ភគវតោ កាលេ ឯកស្មិំ កុលគេហេ និព្ពត្តោ វុទ្ធិមន្វាយ វិភវសម្បន្នោ សទ្ធាជាតោ វិហារតោ និក្ខមិត្វា បិណ្ឌាយ ចរមានំ សិទ្ធត្ថំ ភគវន្តំ ទិស្វា បសន្នមានសោ អាហារមទាសិ។ ភគវា តំ បដិគ្គហេត្វា អនុមោទនំ វត្វា បក្កាមិ។ សោ តេនេវ កុសលេន យាវតាយុកំ ឋត្វា អាយុបរិយោសានេ ទេវលោកេ និព្ពត្តោ តត្ថ ឆ កាមាវចរសម្បត្តិយោ អនុភវិត្វា មនុស្សេសុ ច មនុស្សសម្បត្តិមនុភវិត្វា ឥមស្មិំ ពុទ្ធុប្បាទេ កុលគេហេ និព្ពត្តោ វុទ្ធិមន្វាយ សទ្ធាជាតោ បព្ពជិត្វា នចិរស្សេវ អរហា អហោសិ។
Suvaṇṇavaṇṇaṃsambuddhantiādikaṃ āyasmato bhikkhādāyakattherassa apadānaṃ. Ayampi purimajinavaresu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle ekasmiṃ kulagehe nibbatto vuddhimanvāya vibhavasampanno saddhājāto vihārato nikkhamitvā piṇḍāya caramānaṃ siddhatthaṃ bhagavantaṃ disvā pasannamānaso āhāramadāsi. Bhagavā taṃ paṭiggahetvā anumodanaṃ vatvā pakkāmi. So teneva kusalena yāvatāyukaṃ ṭhatvā āyupariyosāne devaloke nibbatto tattha cha kāmāvacarasampattiyo anubhavitvā manussesu ca manussasampattimanubhavitvā imasmiṃ buddhuppāde kulagehe nibbatto vuddhimanvāya saddhājāto pabbajitvā nacirasseva arahā ahosi.
១. សោ អបរភាគេ អត្តនោ បុព្ពកម្មំ អនុស្សរិត្វា សោមនស្សជាតោ បុព្ពចរិតាបទានំ បកាសេន្តោ សុវណ្ណវណ្ណំ សម្ពុទ្ធន្តិអាទិមាហ។ តំ សព្ពំ ហេដ្ឋា វុត្តនយមេវ។ បវរា អភិនិក្ខន្តន្តិ បការេន វរិតព្ពំ បត្ថេតព្ពន្តិ បវរំ, រម្មភូតតោ វិវេកភូតតោ សកវិហារតោ អភិ វិសេសេន និក្ខន្តន្តិ អត្ថោ។ វានា និព្ពានមាគតន្តិ វានំ វុច្ចតិ តណ្ហា, តតោ និក្ខន្តត្តា និព្ពានំ, វាននាមំ តណ្ហំ បធានំ កត្វា សព្ពកិលេសេ បហាយ និព្ពានំ បត្តន្តិ អត្ថោ។
1. So aparabhāge attano pubbakammaṃ anussaritvā somanassajāto pubbacaritāpadānaṃ pakāsento suvaṇṇavaṇṇaṃ sambuddhantiādimāha. Taṃ sabbaṃ heṭṭhā vuttanayameva. Pavarā abhinikkhantanti pakārena varitabbaṃ patthetabbanti pavaraṃ, rammabhūtato vivekabhūtato sakavihārato abhi visesena nikkhantanti attho. Vānā nibbānamāgatanti vānaṃ vuccati taṇhā, tato nikkhantattā nibbānaṃ, vānanāmaṃ taṇhaṃ padhānaṃ katvā sabbakilese pahāya nibbānaṃ pattanti attho.
២. កដច្ឆុភិក្ខំ ទត្វានាតិ ករតលេន គហេតព្ពា ទព្ពិ កដច្ឆុ, ភិក្ខីយតិ អាយាចីយតីតិ ភិក្ខា, អភិ វិសេសេន ខាទិតព្ពា ភក្ខិតព្ពាតិ វា ភិក្ខា, កដច្ឆុនា គហេតព្ពា ភិក្ខា កដច្ឆុភិក្ខា, ទព្ពិយា ភត្តំ ទត្វាតិ អត្ថោ។ សេសំ សព្ពត្ថ ឧត្តានត្ថមេវាតិ។
2.Kaṭacchubhikkhaṃ datvānāti karatalena gahetabbā dabbi kaṭacchu, bhikkhīyati āyācīyatīti bhikkhā, abhi visesena khāditabbā bhakkhitabbāti vā bhikkhā, kaṭacchunā gahetabbā bhikkhā kaṭacchubhikkhā, dabbiyā bhattaṃ datvāti attho. Sesaṃ sabbattha uttānatthamevāti.
ភិក្ខាទាយកត្ថេរអបទានវណ្ណនា សមត្តា។
Bhikkhādāyakattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ១. ភិក្ខទាយកត្ថេរអបទានំ • 1. Bhikkhadāyakattheraapadānaṃ
