| Tipiṭaka / ತಿಪಿಟಕ • Tipiṭaka / ಜಾತಕ-ಅಟ್ಠಕಥಾ • Jātaka-aṭṭhakathā |
[೨೪೬] ೬. ಬಾಲೋವಾದಜಾತಕವಣ್ಣನಾ
[246] 6. Bālovādajātakavaṇṇanā
ಹನ್ತ್ವಾ ಛೇತ್ವಾ ವಧಿತ್ವಾ ಚಾತಿ ಇದಂ ಸತ್ಥಾ ವೇಸಾಲಿಂ ಉಪನಿಸ್ಸಾಯ ಕೂಟಾಗಾರಸಾಲಾಯಂ ವಿಹರನ್ತೋ ಸೀಹಸೇನಾಪತಿಂ ಆರಬ್ಭ ಕಥೇಸಿ। ಸೋ ಹಿ ಭಗವನ್ತಂ ಸರಣಂ ಗನ್ತ್ವಾ ನಿಮನ್ತೇತ್ವಾ ಪುನದಿವಸೇ ಸಮಂಸಕಭತ್ತಂ ಅದಾಸಿ। ನಿಗಣ್ಠಾ ತಂ ಸುತ್ವಾ ಕುಪಿತಾ ಅನತ್ತಮನಾ ತಥಾಗತಂ ವಿಹೇಠೇತುಕಾಮಾ ‘‘ಸಮಣೋ ಗೋತಮೋ ಜಾನಂ ಉದ್ದಿಸ್ಸಕತಂ ಮಂಸಂ ಭುಞ್ಜತೀ’’ತಿ ಅಕ್ಕೋಸಿಂಸು। ಭಿಕ್ಖೂ ಧಮ್ಮಸಭಾಯಂ ಕಥಂ ಸಮುಟ್ಠಾಪೇಸುಂ – ‘‘ಆವುಸೋ, ನಿಗಣ್ಠೋ ನಾಟಪುತ್ತೋ ‘ಸಮಣೋ ಗೋತಮೋ ಜಾನಂ ಉದ್ದಿಸ್ಸಕತಂ ಮಂಸಂ ಭುಞ್ಜತೀ’ತಿ ಸದ್ಧಿಂ ಪರಿಸಾಯ ಅಕ್ಕೋಸನ್ತೋ ಆಹಿಣ್ಡತೀ’’ತಿ। ತಂ ಸುತ್ವಾ ಸತ್ಥಾ ‘‘ನ, ಭಿಕ್ಖವೇ, ನಿಗಣ್ಠೋ ನಾಟಪುತ್ತೋ ಇದಾನೇವ ಮಂ ಉದ್ದಿಸ್ಸಕತಮಂಸಖಾದನೇನ ಗರಹತಿ, ಪುಬ್ಬೇಪಿ ಗರಹಿಯೇವಾ’’ತಿ ವತ್ವಾ ಅತೀತಂ ಆಹರಿ।
Hantvāchetvā vadhitvā cāti idaṃ satthā vesāliṃ upanissāya kūṭāgārasālāyaṃ viharanto sīhasenāpatiṃ ārabbha kathesi. So hi bhagavantaṃ saraṇaṃ gantvā nimantetvā punadivase samaṃsakabhattaṃ adāsi. Nigaṇṭhā taṃ sutvā kupitā anattamanā tathāgataṃ viheṭhetukāmā ‘‘samaṇo gotamo jānaṃ uddissakataṃ maṃsaṃ bhuñjatī’’ti akkosiṃsu. Bhikkhū dhammasabhāyaṃ kathaṃ samuṭṭhāpesuṃ – ‘‘āvuso, nigaṇṭho nāṭaputto ‘samaṇo gotamo jānaṃ uddissakataṃ maṃsaṃ bhuñjatī’ti saddhiṃ parisāya akkosanto āhiṇḍatī’’ti. Taṃ sutvā satthā ‘‘na, bhikkhave, nigaṇṭho nāṭaputto idāneva maṃ uddissakatamaṃsakhādanena garahati, pubbepi garahiyevā’’ti vatvā atītaṃ āhari.
ಅತೀತೇ ಬಾರಾಣಸಿಯಂ ಬ್ರಹ್ಮದತ್ತೇ ರಜ್ಜಂ ಕಾರೇನ್ತೇ ಬೋಧಿಸತ್ತೋ ಬ್ರಾಹ್ಮಣಕುಲೇ ನಿಬ್ಬತ್ತಿತ್ವಾ ವಯಪ್ಪತ್ತೋ ಇಸಿಪಬ್ಬಜ್ಜಂ ಪಬ್ಬಜಿತ್ವಾ ಲೋಣಮ್ಬಿಲಸೇವನತ್ಥಾಯ ಹಿಮವನ್ತತೋ ಬಾರಾಣಸಿಂ ಗನ್ತ್ವಾ ಪುನದಿವಸೇ ನಗರಂ ಭಿಕ್ಖಾಯ ಪಾವಿಸಿ। ಅಥೇಕೋ ಕುಟುಮ್ಬಿಕೋ ‘‘ತಾಪಸಂ ವಿಹೇಠೇಸ್ಸಾಮೀ’’ತಿ ಘರಂ ಪವೇಸೇತ್ವಾ ಪಞ್ಞತ್ತಾಸನೇ ನಿಸೀದಾಪೇತ್ವಾ ಮಚ್ಛಮಂಸೇನ ಪರಿವಿಸಿತ್ವಾ ಭತ್ತಕಿಚ್ಚಾವಸಾನೇ ಏಕಮನ್ತಂ ನಿಸೀದಿತ್ವಾ ‘‘ಇಮಂ ಮಂಸಂ ತುಮ್ಹೇಯೇವ ಉದ್ದಿಸ್ಸ ಪಾಣೇ ಮಾರೇತ್ವಾ ಕತಂ, ಇದಂ ಅಕುಸಲಂ ಮಾ ಅಮ್ಹಾಕಮೇವ, ತುಮ್ಹಾಕಮ್ಪಿ ಹೋತೂ’’ತಿ ವತ್ವಾ ಪಠಮಂ ಗಾಥಮಾಹ –
Atīte bārāṇasiyaṃ brahmadatte rajjaṃ kārente bodhisatto brāhmaṇakule nibbattitvā vayappatto isipabbajjaṃ pabbajitvā loṇambilasevanatthāya himavantato bārāṇasiṃ gantvā punadivase nagaraṃ bhikkhāya pāvisi. Atheko kuṭumbiko ‘‘tāpasaṃ viheṭhessāmī’’ti gharaṃ pavesetvā paññattāsane nisīdāpetvā macchamaṃsena parivisitvā bhattakiccāvasāne ekamantaṃ nisīditvā ‘‘imaṃ maṃsaṃ tumheyeva uddissa pāṇe māretvā kataṃ, idaṃ akusalaṃ mā amhākameva, tumhākampi hotū’’ti vatvā paṭhamaṃ gāthamāha –
೧೯೨.
192.
‘‘ಹನ್ತ್ವಾ ಛೇತ್ವಾ ವಧಿತ್ವಾ ಚ, ದೇತಿ ದಾನಂ ಅಸಞ್ಞತೋ।
‘‘Hantvā chetvā vadhitvā ca, deti dānaṃ asaññato;
ಏದಿಸಂ ಭತ್ತಂ ಭುಞ್ಜಮಾನೋ, ಸ ಪಾಪೇನ ಉಪಲಿಪ್ಪತೀ’’ತಿ॥
Edisaṃ bhattaṃ bhuñjamāno, sa pāpena upalippatī’’ti.
ತತ್ಥ ಹನ್ತ್ವಾತಿ ಪಹರಿತ್ವಾ। ಛೇತ್ವಾತಿ ಕಿಲಮೇತ್ವಾ। ವಧಿತ್ವಾತಿ ಮಾರೇತ್ವಾ। ದೇತಿ ದಾನಂ ಅಸಞ್ಞತೋತಿ ಅಸಞ್ಞತೋ ದುಸ್ಸೀಲೋ ಏವಂ ಕತ್ವಾ ದಾನಂ ದೇತಿ। ಏದಿಸಂ ಭತ್ತಂ ಭುಞ್ಜಮಾನೋ, ಸ ಪಾಪೇನ ಉಪಲಿಪ್ಪತೀತಿ ಏದಿಸಂ ಉದ್ದಿಸ್ಸಕತಭತ್ತಂ ಭುಞ್ಜಮಾನೋ ಸೋ ಸಮಣೋಪಿ ಪಾಪೇನ ಉಪಲಿಪ್ಪತಿ ಸಂಯುಜ್ಜತಿಯೇವಾತಿ।
Tattha hantvāti paharitvā. Chetvāti kilametvā. Vadhitvāti māretvā. Deti dānaṃ asaññatoti asaññato dussīlo evaṃ katvā dānaṃ deti. Edisaṃ bhattaṃ bhuñjamāno, sa pāpena upalippatīti edisaṃ uddissakatabhattaṃ bhuñjamāno so samaṇopi pāpena upalippati saṃyujjatiyevāti.
ತಂ ಸುತ್ವಾ ಬೋಧಿಸತ್ತೋ ದುತಿಯಂ ಗಾಥಮಾಹ –
Taṃ sutvā bodhisatto dutiyaṃ gāthamāha –
೧೯೩.
193.
‘‘ಪುತ್ತದಾರಮ್ಪಿ ಚೇ ಹನ್ತ್ವಾ, ದೇತಿ ದಾನಂ ಅಸಞ್ಞತೋ।
‘‘Puttadārampi ce hantvā, deti dānaṃ asaññato;
ಭುಞ್ಜಮಾನೋಪಿ ಸಪ್ಪಞ್ಞೋ, ನ ಪಾಪೇನ ಉಪಲಿಪ್ಪತೀ’’ತಿ॥
Bhuñjamānopi sappañño, na pāpena upalippatī’’ti.
ತತ್ಥ ಭುಞ್ಜಮಾನೋಪಿ ಸಪ್ಪಞ್ಞೋತಿ ತಿಟ್ಠತು ಅಞ್ಞಂ ಮಂಸಂ, ಪುತ್ತದಾರಂ ವಧಿತ್ವಾಪಿ ದುಸ್ಸೀಲೇನ ದಿನ್ನಂ ಸಪ್ಪಞ್ಞೋ ಖನ್ತಿಮೇತ್ತಾದಿಗುಣಸಮ್ಪನ್ನೋ ತಂ ಭುಞ್ಜಮಾನೋಪಿ ಪಾಪೇನ ನ ಉಪಲಿಪ್ಪತೀತಿ। ಏವಮಸ್ಸ ಬೋಧಿಸತ್ತೋ ಧಮ್ಮಂ ಕಥೇತ್ವಾ ಉಟ್ಠಾಯಾಸನಾ ಪಕ್ಕಾಮಿ।
Tattha bhuñjamānopi sappaññoti tiṭṭhatu aññaṃ maṃsaṃ, puttadāraṃ vadhitvāpi dussīlena dinnaṃ sappañño khantimettādiguṇasampanno taṃ bhuñjamānopi pāpena na upalippatīti. Evamassa bodhisatto dhammaṃ kathetvā uṭṭhāyāsanā pakkāmi.
ಸತ್ಥಾ ಇಮಂ ಧಮ್ಮದೇಸನಂ ಆಹರಿತ್ವಾ ಜಾತಕಂ ಸಮೋಧಾನೇಸಿ – ‘‘ತದಾ ಕುಟುಮ್ಬಿಕೋ ನಿಗಣ್ಠೋ ನಾಟಪುತ್ತೋ ಅಹೋಸಿ, ತಾಪಸೋ ಪನ ಅಹಮೇವ ಅಹೋಸಿ’’ನ್ತಿ।
Satthā imaṃ dhammadesanaṃ āharitvā jātakaṃ samodhānesi – ‘‘tadā kuṭumbiko nigaṇṭho nāṭaputto ahosi, tāpaso pana ahameva ahosi’’nti.
ಬಾಲೋವಾದಜಾತಕವಣ್ಣನಾ ಛಟ್ಠಾ।
Bālovādajātakavaṇṇanā chaṭṭhā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಜಾತಕಪಾಳಿ • Jātakapāḷi / ೨೪೬. ಬಾಲೋವಾದಜಾತಕಂ • 246. Bālovādajātakaṃ
