| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၂. အယ္ယိကာသုတ္တဝဏ္ဏနာ
2. Ayyikāsuttavaṇṇanā
၁၃၃. ဒုတိယေ ဇိဏ္ဏာတိ ဇရာဇိဏ္ဏာ။ ဝုဍ္ဎာတိ ဝယောဝုဍ္ဎာ။ မဟလ္လိကာတိ ဇာတိမဟလ္လိကာ။ အဒ္ဓဂတာတိ အဒ္ဓံ စိရကာလံ အတိက္ကန္တာ။ ဝယောအနုပ္ပတ္တာတိ ပစ္ဆိမဝယံ သမ္ပတ္တာ။ ပိယာ မနာပာတိ ရညော ကိရ မာတရိ မတာယ အယ္ယိကာ မာတုဋ္ဌာနေ ဌတ္ဝာ ပဋိဇဂ္ဂိ, တေနသ္သ အယ္ယိကာယ ဗလဝပေမံ ဥပ္ပဇ္ဇိ။ တသ္မာ ဧဝမာဟ။ ဟတ္ထိရတနေနာတိ သတသဟသ္သဂ္ဃနကော ဟတ္ထီ သတသဟသ္သဂ္ဃနကေန အလင္ကာရေန အလင္ကတော ဟတ္ထိရတနံ နာမ။ အသ္သရတနေပိ ဧသေဝ နယော။ ဂာမဝရောပိ သတသဟသ္သုဋ္ဌာနကဂာမောဝ။ သဗ္ဗာနိ တာနိ ဘေဒနဓမ္မာနီတိ တေသု ဟိ ကိဉ္စိ ကရိယမာနမေဝ ဘိဇ္ဇတိ, ကိဉ္စိ ကတပရိယောသိတံ စက္ကတော အနပနီတမေဝ, ကိဉ္စိ အပနေတ္ဝာ ဘူမိယံ ဌပိတမတ္တံ, ကိဉ္စိ တတော ပရံ, ဧဝမေဝ သတ္တေသုပိ ကောစိ ပဋိသန္ဓိံ ဂဟေတ္ဝာ မရတိ, ကောစိ မူဠ္ဟဂဗ္ဘာယ မာတရိ မာတုကုစ္ဆိတော အနိက္ခန္တောဝ, ကောစိ နိက္ခန္တမတ္တော, ကောစိ တတော ပရန္တိ။ တသ္မာ ဧဝမာဟ။ ဒုတိယံ။
133. Dutiye jiṇṇāti jarājiṇṇā. Vuḍḍhāti vayovuḍḍhā. Mahallikāti jātimahallikā. Addhagatāti addhaṃ cirakālaṃ atikkantā. Vayoanuppattāti pacchimavayaṃ sampattā. Piyā manāpāti rañño kira mātari matāya ayyikā mātuṭṭhāne ṭhatvā paṭijaggi, tenassa ayyikāya balavapemaṃ uppajji. Tasmā evamāha. Hatthiratanenāti satasahassagghanako hatthī satasahassagghanakena alaṅkārena alaṅkato hatthiratanaṃ nāma. Assaratanepi eseva nayo. Gāmavaropi satasahassuṭṭhānakagāmova. Sabbāni tāni bhedanadhammānīti tesu hi kiñci kariyamānameva bhijjati, kiñci katapariyositaṃ cakkato anapanītameva, kiñci apanetvā bhūmiyaṃ ṭhapitamattaṃ, kiñci tato paraṃ, evameva sattesupi koci paṭisandhiṃ gahetvā marati, koci mūḷhagabbhāya mātari mātukucchito anikkhantova, koci nikkhantamatto, koci tato paranti. Tasmā evamāha. Dutiyaṃ.
၁၃၄. တတိယေ သဗ္ဗံ ဥတ္တာနမေဝ။ တတိယံ။
134. Tatiye sabbaṃ uttānameva. Tatiyaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya
၂. အယ္ယိကာသုတ္တံ • 2. Ayyikāsuttaṃ
၃. လောကသုတ္တံ • 3. Lokasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၂. အယ္ယိကာသုတ္တဝဏ္ဏနာ • 2. Ayyikāsuttavaṇṇanā
