| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
៨. អាយាគទាយកត្ថេរអបទានវណ្ណនា
8. Āyāgadāyakattheraapadānavaṇṇanā
និព្ពុតេ លោកនាថម្ហីតិអាទិកំ អាយស្មតោ អាយាគទាយកត្ថេរស្ស អបទានំ។ អយម្បិ បុរិមពុទ្ធេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ សិខិស្ស ភគវតោ បរិនិព្ពុតកាលេ ឯកស្មិំ កុលគេហេ និព្ពត្តោ សាសនេ បសន្នោ វឌ្ឍកីនំ មូលំ ទត្វា អតិមនោហរំ ទីឃំ ភោជនសាលំ ការាបេត្វា ភិក្ខុសង្ឃំ និមន្តេត្វា បណីតេនាហារេន ភោជេត្វា មហាទានំ ទត្វា ចិត្តំ បសាទេសិ។ សោ យាវតាយុកំ បុញ្ញានិ កត្វា ទេវមនុស្សេសុយេវ សំសរន្តោ ឧភយសម្បត្តិំ អនុភវិត្វា ឥមស្មិំ ពុទ្ធុប្បាទេ កុលគេហេ និព្ពត្តោ បដិលទ្ធសទ្ធោ បព្ពជិត្វា ឃដេន្តោ វាយមន្តោ វិបស្សនំ វឌ្ឍេត្វា ន ចិរស្សេវ អរហត្តំ បាបុណិ។ បុព្ពេ កតបុញ្ញវសេន អាយាគត្ថេរោតិ បាកដោ។
Nibbutelokanāthamhītiādikaṃ āyasmato āyāgadāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto sikhissa bhagavato parinibbutakāle ekasmiṃ kulagehe nibbatto sāsane pasanno vaḍḍhakīnaṃ mūlaṃ datvā atimanoharaṃ dīghaṃ bhojanasālaṃ kārāpetvā bhikkhusaṅghaṃ nimantetvā paṇītenāhārena bhojetvā mahādānaṃ datvā cittaṃ pasādesi. So yāvatāyukaṃ puññāni katvā devamanussesuyeva saṃsaranto ubhayasampattiṃ anubhavitvā imasmiṃ buddhuppāde kulagehe nibbatto paṭiladdhasaddho pabbajitvā ghaṭento vāyamanto vipassanaṃ vaḍḍhetvā na cirasseva arahattaṃ pāpuṇi. Pubbe katapuññavasena āyāgattheroti pākaṭo.
៩៤. ឯវំ សោ កតបុញ្ញសម្ភារវសេន អរហត្តំ បត្វា អត្តនា បុព្ពេ កតកុសលកម្មំ សរិត្វា សោមនស្សជាតោ បុព្ពចរិតាបទានំ បកាសេន្តោ និព្ពុតេ លោកនាថម្ហីតិអាទិមាហ។ តត្ថ និព្ពុតេតិ វទតំ ‘‘មយំ ពុទ្ធា’’តិ វទន្តានំ អន្តរេ វរេ ឧត្តមេ សិខិម្ហិ ភគវតិ បរិនិព្ពុតេតិ អត្ថោ។ ហដ្ឋោ ហដ្ឋេន ចិត្តេនាតិ សទ្ធតាយ ហដ្ឋបហដ្ឋោ សោមនស្សយុត្តចិត្តតាយ បហដ្ឋេន ចិត្តេន ឧត្តមំ ថូបំ សេដ្ឋំ ចេតិយំ អវន្ទិំ បណាមយិន្តិ អត្ថោ។
94. Evaṃ so katapuññasambhāravasena arahattaṃ patvā attanā pubbe katakusalakammaṃ saritvā somanassajāto pubbacaritāpadānaṃ pakāsento nibbute lokanāthamhītiādimāha. Tattha nibbuteti vadataṃ ‘‘mayaṃ buddhā’’ti vadantānaṃ antare vare uttame sikhimhi bhagavati parinibbuteti attho. Haṭṭho haṭṭhena cittenāti saddhatāya haṭṭhapahaṭṭho somanassayuttacittatāya pahaṭṭhena cittena uttamaṃ thūpaṃ seṭṭhaṃ cetiyaṃ avandiṃ paṇāmayinti attho.
៩៥. វឌ្ឍកីហិ កថាបេត្វាតិ ‘‘ភោជនសាលាយ បមាណំ កិត្តក’’ន្តិ បមាណំ កថាបេត្វាតិ អត្ថោ។ មូលំ ទត្វានហំ តទាតិ តទា តស្មិំ កាលេ អហំ កម្មករណត្ថាយ តេសំ វឌ្ឍកីនំ មូលំ ទត្វា អាយាគំ អាយតំ ទីឃំ ភោជនសាលំ អហំ សន្តុដ្ឋោ សោមនស្សចិត្តេន ការបេសហំ ការាបេសិំ អហន្តិ អត្ថោ។ សេសំ សុវិញ្ញេយ្យមេវាតិ។
95.Vaḍḍhakīhi kathāpetvāti ‘‘bhojanasālāya pamāṇaṃ kittaka’’nti pamāṇaṃ kathāpetvāti attho. Mūlaṃ datvānahaṃ tadāti tadā tasmiṃ kāle ahaṃ kammakaraṇatthāya tesaṃ vaḍḍhakīnaṃ mūlaṃ datvā āyāgaṃ āyataṃ dīghaṃ bhojanasālaṃ ahaṃ santuṭṭho somanassacittena kārapesahaṃ kārāpesiṃ ahanti attho. Sesaṃ suviññeyyamevāti.
៩៧. អាយាគស្ស ឥទំ ផលន្តិ ភោជនសាលទានស្ស ឥទំ វិបាកន្តិ អត្ថោ។
97.Āyāgassa idaṃ phalanti bhojanasāladānassa idaṃ vipākanti attho.
អាយាគទាយកត្ថេរអបទានវណ្ណនា សមត្តា។
Āyāgadāyakattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ៨. អាយាគទាយកត្ថេរអបទានំ • 8. Āyāgadāyakattheraapadānaṃ
