| Library / Tipiṭaka / តិបិដក • Tipiṭaka / អបទានបាឡិ • Apadānapāḷi |
៨. អាយាគទាយកត្ថេរអបទានំ
8. Āyāgadāyakattheraapadānaṃ
៩៤.
94.
‘‘និព្ពុតេ លោកនាថម្ហិ, សិខិម្ហិ វទតំ វរេ;
‘‘Nibbute lokanāthamhi, sikhimhi vadataṃ vare;
ហដ្ឋោ ហដ្ឋេន ចិត្តេន, អវន្ទិំ ថូបមុត្តមំ។
Haṭṭho haṭṭhena cittena, avandiṃ thūpamuttamaṃ.
៩៥.
95.
‘‘វឌ្ឍកីហិ កថាបេត្វា, មូលំ ទត្វានហំ តទា;
‘‘Vaḍḍhakīhi kathāpetvā, mūlaṃ datvānahaṃ tadā;
ហដ្ឋោ ហដ្ឋេន ចិត្តេន, អាយាគំ ការបេសហំ។
Haṭṭho haṭṭhena cittena, āyāgaṃ kārapesahaṃ.
៩៦.
96.
អវសេសេសុ កប្បេសុ, វោកិណ្ណំ សំសរិំ អហំ។
Avasesesu kappesu, vokiṇṇaṃ saṃsariṃ ahaṃ.
៩៧.
97.
‘‘កាយេ វិសំ ន កមតិ, សត្ថានិ ន ច ហន្តិ មេ;
‘‘Kāye visaṃ na kamati, satthāni na ca hanti me;
ឧទកេហំ ន មិយ្យាមិ, អាយាគស្ស ឥទំ ផលំ។
Udakehaṃ na miyyāmi, āyāgassa idaṃ phalaṃ.
៩៨.
98.
‘‘យទិច្ឆាមិ អហំ វស្សំ, មហាមេឃោ បវស្សតិ;
‘‘Yadicchāmi ahaṃ vassaṃ, mahāmegho pavassati;
ទេវាបិ មេ វសំ ឯន្តិ, បុញ្ញកម្មស្សិទំ ផលំ។
Devāpi me vasaṃ enti, puññakammassidaṃ phalaṃ.
៩៩.
99.
‘‘សត្តរតនសម្បន្នោ, តិសក្ខត្តុំ អហោសហំ;
‘‘Sattaratanasampanno, tisakkhattuṃ ahosahaṃ;
ន មំ កេចាវជានន្តិ, បុញ្ញកម្មស្សិទំ ផលំ។
Na maṃ kecāvajānanti, puññakammassidaṃ phalaṃ.
១០០.
100.
‘‘ឯកត្តិំសេ ឥតោ កប្បេ, អាយាគំ យមការយិំ;
‘‘Ekattiṃse ito kappe, āyāgaṃ yamakārayiṃ;
ទុគ្គតិំ នាភិជានាមិ, អាយាគស្ស ឥទំ ផលំ។
Duggatiṃ nābhijānāmi, āyāgassa idaṃ phalaṃ.
១០១.
101.
‘‘បដិសម្ភិទា ចតស្សោ…បេ.… កតំ ពុទ្ធស្ស សាសនំ’’។
‘‘Paṭisambhidā catasso…pe… kataṃ buddhassa sāsanaṃ’’.
ឥត្ថំ សុទំ អាយស្មា អាយាគទាយកោ ថេរោ ឥមា គាថាយោ អភាសិត្ថាតិ។
Itthaṃ sudaṃ āyasmā āyāgadāyako thero imā gāthāyo abhāsitthāti.
អាយាគទាយកត្ថេរស្សាបទានំ អដ្ឋមំ។
Āyāgadāyakattherassāpadānaṃ aṭṭhamaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / អបទាន-អដ្ឋកថា • Apadāna-aṭṭhakathā / ៨. អាយាគទាយកត្ថេរអបទានវណ្ណនា • 8. Āyāgadāyakattheraapadānavaṇṇanā
