403. Aṭṭhisenakajātakaṃ (7-1-8)

54.

Yeme ahaṃ na jānāmi, aṭṭhisena vanibbake;

Te maṃ saṅgamma yācanti, kasmā maṃ tvaṃ na yācasi.

55.

Yācako appiyo hoti, yācaṃ adadamappiyo;

Tasmāhaṃ taṃ na yācāmi, mā me videssanā ² ahu.

56.

Yo ve yācanajīvāno, kāle yācaṃ na yācati;

Parañca puññā ⁴ dhaṃseti, attanāpi na jīvati.

57.

Yo ca ⁷ yācanajīvāno, kāle yācañhi yācati ⁸;

Parañca puññaṃ labbheti, attanāpi ca jīvati.

58.

Na ve dessanti ¹⁰ sappaññā, disvā yācakamāgate;

Brahmacāri piyo mesi, vada tvaṃ ¹³ bhaññamicchasi ¹⁴.

59.

Na ve yācanti sappaññā, dhīro ca veditumarahati;

Uddissa ariyā tiṭṭhanti, esā ariyāna yācanā.

60.

Dadāmi te brāhmaṇa rohiṇīnaṃ, gavaṃ sahassaṃ saha puṅgavena;

Ariyo hi ariyassa kathaṃ na dajjā, sutvāna gāthā tava dhammayuttāti.

Aṭṭhisenakajātakaṃ aṭṭhamaṃ.