| Library / Tipiṭaka / តិបិដក • Tipiṭaka / បដិសម្ភិទាមគ្គបាឡិ • Paṭisambhidāmaggapāḷi |
៣៩. អត្ថសន្ទស្សនញាណនិទ្ទេសោ
39. Atthasandassanañāṇaniddeso
៩០. កថំ នានាធម្មប្បកាសនតា បញ្ញា អត្ថសន្ទស្សនេ ញាណំ? នានាធម្មាតិ បញ្ចក្ខន្ធា, ទ្វាទសាយតនានិ, អដ្ឋារស ធាតុយោ, កុសលា ធម្មា, អកុសលា ធម្មា, អព្យាកតា ធម្មា, កាមាវចរា ធម្មា, រូបាវចរា ធម្មា, អរូបាវចរា ធម្មា, អបរិយាបន្នា ធម្មា។
90. Kathaṃ nānādhammappakāsanatā paññā atthasandassane ñāṇaṃ? Nānādhammāti pañcakkhandhā, dvādasāyatanāni, aṭṭhārasa dhātuyo, kusalā dhammā, akusalā dhammā, abyākatā dhammā, kāmāvacarā dhammā, rūpāvacarā dhammā, arūpāvacarā dhammā, apariyāpannā dhammā.
បកាសនតាតិ រូបំ អនិច្ចតោ បកាសេតិ, រូបំ ទុក្ខតោ បកាសេតិ, រូបំ អនត្តតោ បកាសេតិ។ វេទនំ…បេ.… សញ្ញំ… សង្ខារេ… វិញ្ញាណំ… ចក្ខុំ…បេ.… ជរាមរណំ អនិច្ចតោ បកាសេតិ, ជរាមរណំ ទុក្ខតោ បកាសេតិ, ជរាមរណំ អនត្តតោ បកាសេតិ។
Pakāsanatāti rūpaṃ aniccato pakāseti, rūpaṃ dukkhato pakāseti, rūpaṃ anattato pakāseti. Vedanaṃ…pe… saññaṃ… saṅkhāre… viññāṇaṃ… cakkhuṃ…pe… jarāmaraṇaṃ aniccato pakāseti, jarāmaraṇaṃ dukkhato pakāseti, jarāmaraṇaṃ anattato pakāseti.
អត្ថសន្ទស្សនេតិ កាមច្ឆន្ទំ បជហន្តោ នេក្ខម្មត្ថំ សន្ទស្សេតិ។ ព្យាបាទំ បជហន្តោ អព្យាបាទត្ថំ សន្ទស្សេតិ។ ថិនមិទ្ធំ បជហន្តោ អាលោកសញ្ញត្ថំ សន្ទស្សេតិ។ ឧទ្ធច្ចំ បជហន្តោ អវិក្ខេបត្ថំ សន្ទស្សេតិ។ វិចិកិច្ឆំ បជហន្តោ ធម្មវវត្ថានត្ថំ សន្ទស្សេតិ។ អវិជ្ជំ បជហន្តោ ញាណត្ថំ សន្ទស្សេតិ។ អរតិំ បជហន្តោ បាមោជ្ជត្ថំ សន្ទស្សេតិ។ នីវរណេ បជហន្តោ បឋមឈានត្ថំ សន្ទស្សេតិ …បេ.… សព្ពកិលេសេ បជហន្តោ អរហត្តមគ្គត្ថំ សន្ទស្សេតិ។ តំ ញាតដ្ឋេន ញាណំ, បជាននដ្ឋេន បញ្ញា។ តេន វុច្ចតិ – ‘‘នានាធម្មបកាសនតា បញ្ញា អត្ថសន្ទស្សនេ ញាណំ’’។
Atthasandassaneti kāmacchandaṃ pajahanto nekkhammatthaṃ sandasseti. Byāpādaṃ pajahanto abyāpādatthaṃ sandasseti. Thinamiddhaṃ pajahanto ālokasaññatthaṃ sandasseti. Uddhaccaṃ pajahanto avikkhepatthaṃ sandasseti. Vicikicchaṃ pajahanto dhammavavatthānatthaṃ sandasseti. Avijjaṃ pajahanto ñāṇatthaṃ sandasseti. Aratiṃ pajahanto pāmojjatthaṃ sandasseti. Nīvaraṇe pajahanto paṭhamajhānatthaṃ sandasseti …pe… sabbakilese pajahanto arahattamaggatthaṃ sandasseti. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘nānādhammapakāsanatā paññā atthasandassane ñāṇaṃ’’.
អត្ថសន្ទស្សនញាណនិទ្ទេសោ នវតិំសតិមោ។
Atthasandassanañāṇaniddeso navatiṃsatimo.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / បដិសម្ភិទាមគ្គ-អដ្ឋកថា • Paṭisambhidāmagga-aṭṭhakathā / ៣៩. អត្ថសន្ទស្សនញាណនិទ្ទេសវណ្ណនា • 39. Atthasandassanañāṇaniddesavaṇṇanā
