| Library / Tipiṭaka / តិបិដក • Tipiṭaka / បដិសម្ភិទាមគ្គបាឡិ • Paṭisambhidāmaggapāḷi |
៤០. ទស្សនវិសុទ្ធិញាណនិទ្ទេសោ
40. Dassanavisuddhiñāṇaniddeso
៩១. កថំ សព្ពធម្មានំ ឯកសង្គហតានានត្តេកត្តបដិវេធេ បញ្ញា ទស្សនវិសុទ្ធិញាណំ? សព្ពធម្មានន្តិ បញ្ចក្ខន្ធា…បេ.… អបរិយាបន្នា ធម្មា។
91. Kathaṃ sabbadhammānaṃ ekasaṅgahatānānattekattapaṭivedhe paññā dassanavisuddhiñāṇaṃ? Sabbadhammānanti pañcakkhandhā…pe… apariyāpannā dhammā.
ឯកសង្គហតាតិ ទ្វាទសហិ អាការេហិ សព្ពេ ធម្មា ឯកសង្គហិតា។ តថដ្ឋេន, អនត្តដ្ឋេន, សច្ចដ្ឋេន, បដិវេធដ្ឋេន, អភិជាននដ្ឋេន, បរិជាននដ្ឋេន, ធម្មដ្ឋេន, ធាតុដ្ឋេន, ញាតដ្ឋេន, សច្ឆិកិរិយដ្ឋេន, ផុសនដ្ឋេន, អភិសមយដ្ឋេន – ឥមេហិ ទ្វាទសហិ អាការេហិ សព្ពេ ធម្មា ឯកសង្គហិតា។
Ekasaṅgahatāti dvādasahi ākārehi sabbe dhammā ekasaṅgahitā. Tathaṭṭhena, anattaṭṭhena, saccaṭṭhena, paṭivedhaṭṭhena, abhijānanaṭṭhena, parijānanaṭṭhena, dhammaṭṭhena, dhātuṭṭhena, ñātaṭṭhena, sacchikiriyaṭṭhena, phusanaṭṭhena, abhisamayaṭṭhena – imehi dvādasahi ākārehi sabbe dhammā ekasaṅgahitā.
នានត្តេកត្តន្តិ កាមច្ឆន្ទោ នានត្តំ, នេក្ខម្មំ ឯកត្តំ…បេ.… សព្ពកិលេសា នានត្តំ, អរហត្តមគ្គោ ឯកត្តំ។
Nānattekattanti kāmacchando nānattaṃ, nekkhammaṃ ekattaṃ…pe… sabbakilesā nānattaṃ, arahattamaggo ekattaṃ.
បដិវេធេតិ ទុក្ខសច្ចំ បរិញ្ញាបដិវេធំ បដិវិជ្ឈតិ។ សមុទយសច្ចំ បហានបដិវេធំ បដិវិជ្ឈតិ។ និរោធសច្ចំ សច្ឆិកិរិយាបដិវេធំ បដិវិជ្ឈតិ។ មគ្គសច្ចំ ភាវនាបដិវេធំ បដិវិជ្ឈតិ។
Paṭivedheti dukkhasaccaṃ pariññāpaṭivedhaṃ paṭivijjhati. Samudayasaccaṃ pahānapaṭivedhaṃ paṭivijjhati. Nirodhasaccaṃ sacchikiriyāpaṭivedhaṃ paṭivijjhati. Maggasaccaṃ bhāvanāpaṭivedhaṃ paṭivijjhati.
ទស្សនវិសុទ្ធីតិ សោតាបត្តិមគ្គក្ខណេ ទស្សនំ វិសុជ្ឈតិ; សោតាបត្តិផលក្ខណេ ទស្សនំ វិសុទ្ធំ។ សកទាគាមិមគ្គក្ខណេ ទស្សនំ វិសុជ្ឈតិ; សកទាគាមិផលក្ខណេ ទស្សនំ វិសុទ្ធំ។ អនាគាមិមគ្គក្ខណេ ទស្សនំ វិសុជ្ឈតិ; អនាគាមិផលក្ខណេ ទស្សនំ វិសុទ្ធំ។ អរហត្តមគ្គក្ខណេ ទស្សនំ វិសុជ្ឈតិ; អរហត្តផលក្ខណេ ទស្សនំ វិសុទ្ធំ។ តំ ញាតដ្ឋេន ញាណំ, បជាននដ្ឋេន បញ្ញា។ តេន វុច្ចតិ – ‘‘សព្ពធម្មានំ ឯកសង្គហតានានត្តេកត្តបដិវេធេ បញ្ញា ទស្សនវិសុទ្ធិញាណំ’’។
Dassanavisuddhīti sotāpattimaggakkhaṇe dassanaṃ visujjhati; sotāpattiphalakkhaṇe dassanaṃ visuddhaṃ. Sakadāgāmimaggakkhaṇe dassanaṃ visujjhati; sakadāgāmiphalakkhaṇe dassanaṃ visuddhaṃ. Anāgāmimaggakkhaṇe dassanaṃ visujjhati; anāgāmiphalakkhaṇe dassanaṃ visuddhaṃ. Arahattamaggakkhaṇe dassanaṃ visujjhati; arahattaphalakkhaṇe dassanaṃ visuddhaṃ. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘sabbadhammānaṃ ekasaṅgahatānānattekattapaṭivedhe paññā dassanavisuddhiñāṇaṃ’’.
ទស្សនវិសុទ្ធិញាណនិទ្ទេសោ ចត្តាលីសមោ។
Dassanavisuddhiñāṇaniddeso cattālīsamo.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / បដិសម្ភិទាមគ្គ-អដ្ឋកថា • Paṭisambhidāmagga-aṭṭhakathā / ៤០. ទស្សនវិសុទ្ធិញាណនិទ្ទេសវណ្ណនា • 40. Dassanavisuddhiñāṇaniddesavaṇṇanā
