| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
7. அத்த²ஸந்த³ஸ்ஸகத்தே²ரஅபதா³னவண்ணனா
7. Atthasandassakattheraapadānavaṇṇanā
விஸாலமாளே ஆஸீனோதிஆதி³கங் ஆயஸ்மதோ அத்த²ஸந்த³ஸ்ஸகத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ அனேகேஸு அத்தபா⁴வேஸு கதபுஞ்ஞூபசயோ பது³முத்தரஸ்ஸ ப⁴க³வதோ காலே ப்³ராஹ்மணகுலே நிப்³ப³த்தோ வுத்³தி⁴மன்வாய ஸகஸிப்பேஸு நிப்ப²த்திங் பத்தோ தத்த² ஸாரங் அபஸ்ஸந்தோ கே³ஹங் பஹாய ஹிமவந்தங் க³ந்த்வா ரமணீயே டா²னே பண்ணஸாலங் கத்வா படிவஸதி, ததா³ ஸத்தானுகம்பாய ஹிமவந்தமாக³தங் பது³முத்தரப⁴க³வந்தங் தி³ஸ்வா பஸன்னமானஸோ பஞ்சங்க³ஸமன்னாக³தோ வந்தி³த்வா து²திவசனேஹி தோ²மேஸி. ஸோ தேன புஞ்ஞேன யாவதாயுகங் கத்வா காலங்கத்வா ப்³ரஹ்மலோகூபகோ³ அஹோஸி. ஸோ அபரபா⁴கே³ இமஸ்மிங் பு³த்³து⁴ப்பாதே³ குலகே³ஹே நிப்³ப³த்தோ விஞ்ஞுதங் பத்தோ ஸத்து² த⁴ம்மதே³ஸனங் ஸுத்வா படிலத்³த⁴ஸத்³தோ⁴ பப்³ப³ஜித்வா அரஹத்தங் பாபுணி.
Visālamāḷe āsīnotiādikaṃ āyasmato atthasandassakattherassa apadānaṃ. Ayampi purimabuddhesu katādhikāro anekesu attabhāvesu katapuññūpacayo padumuttarassa bhagavato kāle brāhmaṇakule nibbatto vuddhimanvāya sakasippesu nipphattiṃ patto tattha sāraṃ apassanto gehaṃ pahāya himavantaṃ gantvā ramaṇīye ṭhāne paṇṇasālaṃ katvā paṭivasati, tadā sattānukampāya himavantamāgataṃ padumuttarabhagavantaṃ disvā pasannamānaso pañcaṅgasamannāgato vanditvā thutivacanehi thomesi. So tena puññena yāvatāyukaṃ katvā kālaṅkatvā brahmalokūpago ahosi. So aparabhāge imasmiṃ buddhuppāde kulagehe nibbatto viññutaṃ patto satthu dhammadesanaṃ sutvā paṭiladdhasaddho pabbajitvā arahattaṃ pāpuṇi.
47. ஸோ அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ விஸாலமாளே ஆஸீனோதிஆதி³மாஹ. தத்த² விஸாலமாளேதி விஸாலங் பத்த²டங் வித்தி²ண்ணங் மஹந்தங் மாளங் விஸாலமாளங், தஸ்மிங் விஸாலமாளே ஆஸீனோ நிஸின்னோ அஹங் லோகனாயகங் அத்³த³ஸந்தி ஸம்ப³ந்தோ⁴. தேஸங் ஸுவிஞ்ஞெய்யமேவாதி.
47. So attano pubbakammaṃ saritvā somanassajāto pubbacaritāpadānaṃ pakāsento visālamāḷe āsīnotiādimāha. Tattha visālamāḷeti visālaṃ patthaṭaṃ vitthiṇṇaṃ mahantaṃ māḷaṃ visālamāḷaṃ, tasmiṃ visālamāḷe āsīno nisinno ahaṃ lokanāyakaṃ addasanti sambandho. Tesaṃ suviññeyyamevāti.
அத்த²ஸந்த³ஸ்ஸகத்தே²ரஅபதா³னவண்ணனா ஸமத்தா.
Atthasandassakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 7. அத்த²ஸந்த³ஸ்ஸகத்தே²ரஅபதா³னங் • 7. Atthasandassakattheraapadānaṃ
