| Library / Tipiṭaka / திபிடக • Tipiṭaka / படிஸம்பி⁴தா³மக்³க³பாளி • Paṭisambhidāmaggapāḷi |
1. அஸ்ஸாத³தி³ட்டி²னித்³தே³ஸோ
1. Assādadiṭṭhiniddeso
128. அஸ்ஸாத³தி³ட்டி²யா கதமேஹி பஞ்சதிங்ஸாய ஆகாரேஹி அபி⁴னிவேஸோ ஹோதி? யங் ரூபங் படிச்ச உப்பஜ்ஜதி ஸுக²ங் ஸோமனஸ்ஸங், அயங் ரூபஸ்ஸ அஸ்ஸாதோ³தி – அபி⁴னிவேஸபராமாஸோ தி³ட்டி². தி³ட்டி² ந அஸ்ஸாதோ³, அஸ்ஸாதோ³ ந தி³ட்டி². அஞ்ஞா தி³ட்டி², அஞ்ஞோ அஸ்ஸாதோ³. யா ச தி³ட்டி² யோ ச அஸ்ஸாதோ³ – அயங் வுச்சதி அஸ்ஸாத³தி³ட்டி².
128. Assādadiṭṭhiyā katamehi pañcatiṃsāya ākārehi abhiniveso hoti? Yaṃ rūpaṃ paṭicca uppajjati sukhaṃ somanassaṃ, ayaṃ rūpassa assādoti – abhinivesaparāmāso diṭṭhi. Diṭṭhi na assādo, assādo na diṭṭhi. Aññā diṭṭhi, añño assādo. Yā ca diṭṭhi yo ca assādo – ayaṃ vuccati assādadiṭṭhi.
அஸ்ஸாத³தி³ட்டி² மிச்சா²தி³ட்டி² தி³ட்டி²விபத்தி. தாய தி³ட்டி²விபத்தியா ஸமன்னாக³தோ புக்³க³லோ தி³ட்டி²விபன்னோ. தி³ட்டி²விபன்னோ புக்³க³லோ ந ஸேவிதப்³போ³ ந ப⁴ஜிதப்³போ³ ந பயிருபாஸிதப்³போ³. தங் கிஸ்ஸ ஹேது? தி³ட்டி² ஹிஸ்ஸ பாபிகா. யோ தி³ட்டி²யா ராகோ³ 1, ஸோ ந தி³ட்டி². தி³ட்டி² ந ராகோ³. அஞ்ஞா தி³ட்டி², அஞ்ஞோ ராகோ³. யா ச தி³ட்டி² யோ ச ராகோ³ – அயங் வுச்சதி தி³ட்டி²ராகோ³. தாய ச தி³ட்டி²யா தேன ச ராகே³ன ஸமன்னாக³தோ புக்³க³லோ தி³ட்டி²ராக³ரத்தோ. தி³ட்டி²ராக³ரத்தே புக்³க³லே தி³ன்னங் தா³னங் ந மஹப்ப²லங் ஹோதி ந மஹானிஸங்ஸங். தங் கிஸ்ஸ ஹேது? தி³ட்டி² ஹிஸ்ஸ பாபிகா அஸ்ஸாத³தி³ட்டி² மிச்சா²தி³ட்டி².
Assādadiṭṭhi micchādiṭṭhi diṭṭhivipatti. Tāya diṭṭhivipattiyā samannāgato puggalo diṭṭhivipanno. Diṭṭhivipanno puggalo na sevitabbo na bhajitabbo na payirupāsitabbo. Taṃ kissa hetu? Diṭṭhi hissa pāpikā. Yo diṭṭhiyā rāgo 2, so na diṭṭhi. Diṭṭhi na rāgo. Aññā diṭṭhi, añño rāgo. Yā ca diṭṭhi yo ca rāgo – ayaṃ vuccati diṭṭhirāgo. Tāya ca diṭṭhiyā tena ca rāgena samannāgato puggalo diṭṭhirāgaratto. Diṭṭhirāgaratte puggale dinnaṃ dānaṃ na mahapphalaṃ hoti na mahānisaṃsaṃ. Taṃ kissa hetu? Diṭṭhi hissa pāpikā assādadiṭṭhi micchādiṭṭhi.
மிச்சா²தி³ட்டி²கஸ்ஸ புரிஸபுக்³க³லஸ்ஸ த்³வேவ க³தியோ – நிரயோ வா திரச்சா²னயோனி வா. மிச்சா²தி³ட்டி²கஸ்ஸ புரிஸபுக்³க³லஸ்ஸ யஞ்சேவ காயகம்மங் யதா²தி³ட்டி² ஸமத்தங் ஸமாதி³ன்னங், யஞ்ச வசீகம்மங்…பே॰… யஞ்ச மனோகம்மங் யதா²தி³ட்டி² ஸமத்தங் ஸமாதி³ன்னங், யா ச சேதனா யா ச பத்த²னா யோ ச பணிதி⁴ யே ச ஸங்கா²ரா, ஸப்³பே³ தே த⁴ம்மா அனிட்டா²ய அகந்தாய அமனாபாய அஹிதாய து³க்கா²ய ஸங்வத்தந்தி. தங் கிஸ்ஸ ஹேது? தி³ட்டி² ஹிஸ்ஸ பாபிகா. ஸெய்யதா²பி நிம்ப³பீ³ஜங் வா கோஸாதகீபீ³ஜங் வா தித்தகாலாபு³பீ³ஜங் வா அல்லாய பத²வியா நிக்கி²த்தங் யங் சேவ பத²விரஸங் உபாதி³யதி, யஞ்ச ஆபோரஸங் உபாதி³யதி, ஸப்³ப³ங் தங் தித்தகத்தாய கடுகத்தாய அஸாதத்தாய 3 ஸங்வத்ததி. தங் கிஸ்ஸ ஹேது? பீ³ஜங் ஹிஸ்ஸ பாபிகங். ஏவமேவங் மிச்சா²தி³ட்டி²கஸ்ஸ புரிஸபுக்³க³லஸ்ஸ யஞ்சேவ காயகம்மங் யதா²தி³ட்டி² ஸமத்தங் ஸமாதி³ன்னங், யஞ்ச வசீகம்மங்…பே॰… யஞ்ச மனோகம்மங் யதா²தி³ட்டி² ஸமத்தங் ஸமாதி³ன்னங், யா ச சேதனா யா ச பத்த²னா யோ ச பணிதி⁴ யே ச ஸங்கா²ரா, ஸப்³பே³ தே த⁴ம்மா அனிட்டா²ய அகந்தாய அமனாபாய அஹிதாய து³க்கா²ய ஸங்வத்தந்தி. தங் கிஸ்ஸ ஹேது? தி³ட்டி² ஹிஸ்ஸ பாபிகா அஸ்ஸாத³தி³ட்டி² மிச்சா²தி³ட்டி².
Micchādiṭṭhikassa purisapuggalassa dveva gatiyo – nirayo vā tiracchānayoni vā. Micchādiṭṭhikassa purisapuggalassa yañceva kāyakammaṃ yathādiṭṭhi samattaṃ samādinnaṃ, yañca vacīkammaṃ…pe… yañca manokammaṃ yathādiṭṭhi samattaṃ samādinnaṃ, yā ca cetanā yā ca patthanā yo ca paṇidhi ye ca saṅkhārā, sabbe te dhammā aniṭṭhāya akantāya amanāpāya ahitāya dukkhāya saṃvattanti. Taṃ kissa hetu? Diṭṭhi hissa pāpikā. Seyyathāpi nimbabījaṃ vā kosātakībījaṃ vā tittakālābubījaṃ vā allāya pathaviyā nikkhittaṃ yaṃ ceva pathavirasaṃ upādiyati, yañca āporasaṃ upādiyati, sabbaṃ taṃ tittakattāya kaṭukattāya asātattāya 4 saṃvattati. Taṃ kissa hetu? Bījaṃ hissa pāpikaṃ. Evamevaṃ micchādiṭṭhikassa purisapuggalassa yañceva kāyakammaṃ yathādiṭṭhi samattaṃ samādinnaṃ, yañca vacīkammaṃ…pe… yañca manokammaṃ yathādiṭṭhi samattaṃ samādinnaṃ, yā ca cetanā yā ca patthanā yo ca paṇidhi ye ca saṅkhārā, sabbe te dhammā aniṭṭhāya akantāya amanāpāya ahitāya dukkhāya saṃvattanti. Taṃ kissa hetu? Diṭṭhi hissa pāpikā assādadiṭṭhi micchādiṭṭhi.
மிச்சா²தி³ட்டி² தி³ட்டி²க³தங், தி³ட்டி²க³ஹனங், தி³ட்டி²கந்தாரங், தி³ட்டி²விஸூகங், தி³ட்டி²விப்ப²ந்தி³தங், தி³ட்டி²ஸஞ்ஞோஜனங், தி³ட்டி²ஸல்லங், தி³ட்டி²ஸம்பா³தோ⁴, தி³ட்டி²பலிபோ³தோ⁴, தி³ட்டி²ப³ந்த⁴னங், தி³ட்டி²பபாதோ, தி³ட்டா²னுஸயோ, தி³ட்டி²ஸந்தாபோ, தி³ட்டி²பரிளாஹோ, தி³ட்டி²க³ந்தோ², தி³ட்டு²பாதா³னங், தி³ட்டா²பி⁴னிவேஸோ, தி³ட்டி²பராமாஸோ – இமேஹி அட்டா²ரஸஹி ஆகாரேஹி பரியுட்டி²தசித்தஸ்ஸ ஸஞ்ஞோகோ³.
Micchādiṭṭhi diṭṭhigataṃ, diṭṭhigahanaṃ, diṭṭhikantāraṃ, diṭṭhivisūkaṃ, diṭṭhivipphanditaṃ, diṭṭhisaññojanaṃ, diṭṭhisallaṃ, diṭṭhisambādho, diṭṭhipalibodho, diṭṭhibandhanaṃ, diṭṭhipapāto, diṭṭhānusayo, diṭṭhisantāpo, diṭṭhipariḷāho, diṭṭhigantho, diṭṭhupādānaṃ, diṭṭhābhiniveso, diṭṭhiparāmāso – imehi aṭṭhārasahi ākārehi pariyuṭṭhitacittassa saññogo.
129. அத்தி² ஸஞ்ஞோஜனானி சேவ தி³ட்டி²யோ ச, அத்தி² ஸஞ்ஞோஜனானி ந ச தி³ட்டி²யோ. கதமானி ஸஞ்ஞோஜனானி சேவ தி³ட்டி²யோ ச? ஸக்காயதி³ட்டி², ஸீலப்³ப³தபராமாஸோ – இமானி ஸஞ்ஞோஜனானி சேவ தி³ட்டி²யோ ச. கதமானி ஸஞ்ஞோஜனானி, ந ச தி³ட்டி²யோ? காமராக³ஸஞ்ஞோஜனங், படிக⁴ஸஞ்ஞோஜனங், மானஸஞ்ஞோஜனங், விசிகிச்சா²ஸஞ்ஞோஜனங், ப⁴வராக³ஸஞ்ஞோஜனங், இஸ்ஸாஸஞ்ஞோஜனங், மச்ச²ரியஸஞ்ஞோஜனங், அனுனயஸஞ்ஞோஜனங், அவிஜ்ஜாஸஞ்ஞோஜனங் – இமானி ஸஞ்ஞோஜனானி, ந ச தி³ட்டி²யோ.
129. Atthi saññojanāni ceva diṭṭhiyo ca, atthi saññojanāni na ca diṭṭhiyo. Katamāni saññojanāni ceva diṭṭhiyo ca? Sakkāyadiṭṭhi, sīlabbataparāmāso – imāni saññojanāni ceva diṭṭhiyo ca. Katamāni saññojanāni, na ca diṭṭhiyo? Kāmarāgasaññojanaṃ, paṭighasaññojanaṃ, mānasaññojanaṃ, vicikicchāsaññojanaṃ, bhavarāgasaññojanaṃ, issāsaññojanaṃ, macchariyasaññojanaṃ, anunayasaññojanaṃ, avijjāsaññojanaṃ – imāni saññojanāni, na ca diṭṭhiyo.
யங் வேத³னங் படிச்ச…பே॰… யங் ஸஞ்ஞங் படிச்ச…பே॰… யங் ஸங்கா²ரே 5 படிச்ச…பே॰… யங் விஞ்ஞாணங் படிச்ச… யங் சக்கு²ங் படிச்ச… யங் ஸோதங் படிச்ச… யங் கா⁴னங் படிச்ச… யங் ஜிவ்ஹங் படிச்ச… யங் காயங் படிச்ச… யங் மனங் படிச்ச… யங் ரூபே படிச்ச… யங் ஸத்³தே³ படிச்ச… யங் க³ந்தே⁴ படிச்ச … யங் ரஸே படிச்ச… யங் பொ²ட்ட²ப்³பே³ படிச்ச… யங் த⁴ம்மே படிச்ச… யங் சக்கு²விஞ்ஞாணங் படிச்ச… யங் ஸோதவிஞ்ஞாணங் படிச்ச… யங் கா⁴னவிஞ்ஞாணங் படிச்ச… யங் ஜிவ்ஹாவிஞ்ஞாணங் படிச்ச… யங் காயவிஞ்ஞாணங் படிச்ச… யங் மனோவிஞ்ஞாணங் படிச்ச … யங் சக்கு²ஸம்ப²ஸ்ஸங் படிச்ச… யங் ஸோதஸம்ப²ஸ்ஸங் படிச்ச… யங் கா⁴னஸம்ப²ஸ்ஸங் படிச்ச… யங் ஜிவ்ஹாஸம்ப²ஸ்ஸங் படிச்ச… யங் காயஸம்ப²ஸ்ஸங் படிச்ச… யங் மனோஸம்ப²ஸ்ஸங் படிச்ச… யங் சக்கு²ஸம்ப²ஸ்ஸஜங் வேத³னங் படிச்ச… யங் ஸோதஸம்ப²ஸ்ஸஜங் வேத³னங் படிச்ச… யங் கா⁴னஸம்ப²ஸ்ஸஜங் வேத³னங் படிச்ச… யங் ஜிவ்ஹாஸம்ப²ஸ்ஸஜங் வேத³னங் படிச்ச… யங் காயஸம்ப²ஸ்ஸஜங் வேத³னங் படிச்ச… யங் மனோஸம்ப²ஸ்ஸஜங் வேத³னங் படிச்ச உப்பஜ்ஜதி ஸுக²ங் ஸோமனஸ்ஸங், அயங் மனோஸம்ப²ஸ்ஸஜாய வேத³னாய அஸ்ஸாதோ³தி – அபி⁴னிவேஸபராமாஸோ தி³ட்டி². தி³ட்டி² ந அஸ்ஸாதோ³, அஸ்ஸாதோ³ ந தி³ட்டி². அஞ்ஞா தி³ட்டி², அஞ்ஞோ அஸ்ஸாதோ³. யா ச தி³ட்டி² யோ ச அஸ்ஸாதோ³ – அயங் வுச்சதி அஸ்ஸாத³தி³ட்டி².
Yaṃ vedanaṃ paṭicca…pe… yaṃ saññaṃ paṭicca…pe… yaṃ saṅkhāre 6 paṭicca…pe… yaṃ viññāṇaṃ paṭicca… yaṃ cakkhuṃ paṭicca… yaṃ sotaṃ paṭicca… yaṃ ghānaṃ paṭicca… yaṃ jivhaṃ paṭicca… yaṃ kāyaṃ paṭicca… yaṃ manaṃ paṭicca… yaṃ rūpe paṭicca… yaṃ sadde paṭicca… yaṃ gandhe paṭicca … yaṃ rase paṭicca… yaṃ phoṭṭhabbe paṭicca… yaṃ dhamme paṭicca… yaṃ cakkhuviññāṇaṃ paṭicca… yaṃ sotaviññāṇaṃ paṭicca… yaṃ ghānaviññāṇaṃ paṭicca… yaṃ jivhāviññāṇaṃ paṭicca… yaṃ kāyaviññāṇaṃ paṭicca… yaṃ manoviññāṇaṃ paṭicca … yaṃ cakkhusamphassaṃ paṭicca… yaṃ sotasamphassaṃ paṭicca… yaṃ ghānasamphassaṃ paṭicca… yaṃ jivhāsamphassaṃ paṭicca… yaṃ kāyasamphassaṃ paṭicca… yaṃ manosamphassaṃ paṭicca… yaṃ cakkhusamphassajaṃ vedanaṃ paṭicca… yaṃ sotasamphassajaṃ vedanaṃ paṭicca… yaṃ ghānasamphassajaṃ vedanaṃ paṭicca… yaṃ jivhāsamphassajaṃ vedanaṃ paṭicca… yaṃ kāyasamphassajaṃ vedanaṃ paṭicca… yaṃ manosamphassajaṃ vedanaṃ paṭicca uppajjati sukhaṃ somanassaṃ, ayaṃ manosamphassajāya vedanāya assādoti – abhinivesaparāmāso diṭṭhi. Diṭṭhi na assādo, assādo na diṭṭhi. Aññā diṭṭhi, añño assādo. Yā ca diṭṭhi yo ca assādo – ayaṃ vuccati assādadiṭṭhi.
அஸ்ஸாத³தி³ட்டி² மிச்சா²தி³ட்டி² தி³ட்டி²விபத்தி. தாய தி³ட்டி²விபத்தியா ஸமன்னாக³தோ புக்³க³லோ தி³ட்டி²விபன்னோ. தி³ட்டி²விபன்னோ புக்³க³லோ ந ஸேவிதப்³போ³ ந ப⁴ஜிதப்³போ³ ந பயிருபாஸிதப்³போ³. தங் கிஸ்ஸ ஹேது? தி³ட்டி² ஹிஸ்ஸ பாபிகா. யோ தி³ட்டி²யா ராகோ³, ஸோ ந தி³ட்டி². தி³ட்டி² ந ராகோ³. அஞ்ஞா தி³ட்டி², அஞ்ஞோ ராகோ³. யா ச தி³ட்டி² யோ ச ராகோ³, அயங் வுச்சதி தி³ட்டி²ராகோ³. தாய ச தி³ட்டி²யா தேன ச ராகே³ன ஸமன்னாக³தோ புக்³க³லோ தி³ட்டி²ராக³ரத்தோ. தி³ட்டி²ராக³ரத்தே புக்³க³லே தி³ன்னங் தா³னங் ந மஹப்ப²லங் ஹோதி ந மஹானிஸங்ஸங். தங் கிஸ்ஸ ஹேது? தி³ட்டி² ஹிஸ்ஸ பாபிகா அஸ்ஸாத³தி³ட்டி² மிச்சா²தி³ட்டி².
Assādadiṭṭhi micchādiṭṭhi diṭṭhivipatti. Tāya diṭṭhivipattiyā samannāgato puggalo diṭṭhivipanno. Diṭṭhivipanno puggalo na sevitabbo na bhajitabbo na payirupāsitabbo. Taṃ kissa hetu? Diṭṭhi hissa pāpikā. Yo diṭṭhiyā rāgo, so na diṭṭhi. Diṭṭhi na rāgo. Aññā diṭṭhi, añño rāgo. Yā ca diṭṭhi yo ca rāgo, ayaṃ vuccati diṭṭhirāgo. Tāya ca diṭṭhiyā tena ca rāgena samannāgato puggalo diṭṭhirāgaratto. Diṭṭhirāgaratte puggale dinnaṃ dānaṃ na mahapphalaṃ hoti na mahānisaṃsaṃ. Taṃ kissa hetu? Diṭṭhi hissa pāpikā assādadiṭṭhi micchādiṭṭhi.
மிச்சா²தி³ட்டி²கஸ்ஸ புரிஸபுக்³க³லஸ்ஸ த்³வேவ க³தியோ – நிரயோ வா திரச்சா²னயோனி வா. மிச்சா²தி³ட்டி²கஸ்ஸ புரிஸபுக்³க³லஸ்ஸ யஞ்சேவ காயகம்மங் யதா²தி³ட்டி² ஸமத்தங் ஸமாதி³ன்னங், யஞ்ச வசீகம்மங்…பே॰… யஞ்ச மனோகம்மங் யதா²தி³ட்டி² ஸமத்தங் ஸமாதி³ன்னங், யா ச சேதனா யா ச பத்த²னா யோ ச பணிதி⁴ யே ச ஸங்கா²ரா, ஸப்³பே³ தே த⁴ம்மா அனிட்டா²ய அகந்தாய அமனாபாய அஹிதாய து³க்கா²ய ஸங்வத்தந்தி. தங் கிஸ்ஸ ஹேது? தி³ட்டி² ஹிஸ்ஸ பாபிகா. ஸெய்யதா²பி நிம்ப³பீ³ஜங் வா கோஸாதகீபீ³ஜங் வா தித்தகாலாபு³பீ³ஜங் வா அல்லாய பத²வியா நிக்கி²த்தங் யஞ்சேவ பத²விரஸங் உபாதி³யதி யஞ்ச ஆபோரஸங் உபாதி³யதி, ஸப்³ப³ங் தங் தித்தகத்தாய கடுகத்தாய அஸாதத்தாய ஸங்வத்ததி. தங் கிஸ்ஸ ஹேது? பீ³ஜங் ஹிஸ்ஸ பாபிகங். ஏவமேவங் மிச்சா²தி³ட்டி²கஸ்ஸ புரிஸபுக்³க³லஸ்ஸ யஞ்சேவ காயகம்மங் யதா²தி³ட்டி² ஸமத்தங் ஸமாதி³ன்னங் யஞ்ச வசீகம்மங்…பே॰… யஞ்ச மனோகம்மங் யதா²தி³ட்டி² ஸமத்தங் ஸமாதி³ன்னங், யா ச சேதனா யா ச பத்த²னா யோ ச பணிதி⁴ யே ச ஸங்கா²ரா, ஸப்³பே³ தே த⁴ம்மா அனிட்டா²ய அகந்தாய அமனாபாய அஹிதாய து³க்கா²ய ஸங்வத்தந்தி. தங் கிஸ்ஸ ஹேது? தி³ட்டி² ஹிஸ்ஸ பாபிகா அஸ்ஸாத³தி³ட்டி² மிச்சா²தி³ட்டி².
Micchādiṭṭhikassa purisapuggalassa dveva gatiyo – nirayo vā tiracchānayoni vā. Micchādiṭṭhikassa purisapuggalassa yañceva kāyakammaṃ yathādiṭṭhi samattaṃ samādinnaṃ, yañca vacīkammaṃ…pe… yañca manokammaṃ yathādiṭṭhi samattaṃ samādinnaṃ, yā ca cetanā yā ca patthanā yo ca paṇidhi ye ca saṅkhārā, sabbe te dhammā aniṭṭhāya akantāya amanāpāya ahitāya dukkhāya saṃvattanti. Taṃ kissa hetu? Diṭṭhi hissa pāpikā. Seyyathāpi nimbabījaṃ vā kosātakībījaṃ vā tittakālābubījaṃ vā allāya pathaviyā nikkhittaṃ yañceva pathavirasaṃ upādiyati yañca āporasaṃ upādiyati, sabbaṃ taṃ tittakattāya kaṭukattāya asātattāya saṃvattati. Taṃ kissa hetu? Bījaṃ hissa pāpikaṃ. Evamevaṃ micchādiṭṭhikassa purisapuggalassa yañceva kāyakammaṃ yathādiṭṭhi samattaṃ samādinnaṃ yañca vacīkammaṃ…pe… yañca manokammaṃ yathādiṭṭhi samattaṃ samādinnaṃ, yā ca cetanā yā ca patthanā yo ca paṇidhi ye ca saṅkhārā, sabbe te dhammā aniṭṭhāya akantāya amanāpāya ahitāya dukkhāya saṃvattanti. Taṃ kissa hetu? Diṭṭhi hissa pāpikā assādadiṭṭhi micchādiṭṭhi.
மிச்சா²தி³ட்டி² தி³ட்டி²க³தங் தி³ட்டி²க³ஹனங்…பே॰… தி³ட்டா²பி⁴னிவேஸோ தி³ட்டி²பராமாஸோ – இமேஹி அட்டா²ரஸஹி ஆகாரேஹி பரியுட்டி²தசித்தஸ்ஸ ஸஞ்ஞோகோ³.
Micchādiṭṭhi diṭṭhigataṃ diṭṭhigahanaṃ…pe… diṭṭhābhiniveso diṭṭhiparāmāso – imehi aṭṭhārasahi ākārehi pariyuṭṭhitacittassa saññogo.
அத்தி² ஸஞ்ஞோஜனானி சேவ தி³ட்டி²யோ ச, அத்தி² ஸஞ்ஞோஜனானி ந ச தி³ட்டி²யோ. கதமானி ஸஞ்ஞோஜனானி சேவ தி³ட்டி²யோ ச? ஸக்காயதி³ட்டி², ஸீலப்³ப³தபராமாஸோ – இமானி ஸஞ்ஞோஜனானி சேவ தி³ட்டி²யோ ச. கதமானி ஸஞ்ஞோஜனானி, ந ச தி³ட்டி²யோ? காமராக³ஸஞ்ஞோஜனங், படிக⁴ஸஞ்ஞோஜனங், மானஸஞ்ஞோஜனங், விசிகிச்சா²ஸஞ்ஞோஜனங், ப⁴வராக³ஸஞ்ஞோஜனங், இஸ்ஸாஸஞ்ஞோஜனங், மச்ச²ரியஸஞ்ஞோஜனங், அனுனயஸஞ்ஞோஜனங், அவிஜ்ஜாஸஞ்ஞோஜனங் – இமானி ஸஞ்ஞோஜனானி, ந ச தி³ட்டி²யோ. அஸ்ஸாத³தி³ட்டி²யா இமேஹி பஞ்சதிங்ஸாய ஆகாரேஹி அபி⁴னிவேஸோ ஹோதி.
Atthi saññojanāni ceva diṭṭhiyo ca, atthi saññojanāni na ca diṭṭhiyo. Katamāni saññojanāni ceva diṭṭhiyo ca? Sakkāyadiṭṭhi, sīlabbataparāmāso – imāni saññojanāni ceva diṭṭhiyo ca. Katamāni saññojanāni, na ca diṭṭhiyo? Kāmarāgasaññojanaṃ, paṭighasaññojanaṃ, mānasaññojanaṃ, vicikicchāsaññojanaṃ, bhavarāgasaññojanaṃ, issāsaññojanaṃ, macchariyasaññojanaṃ, anunayasaññojanaṃ, avijjāsaññojanaṃ – imāni saññojanāni, na ca diṭṭhiyo. Assādadiṭṭhiyā imehi pañcatiṃsāya ākārehi abhiniveso hoti.
அஸ்ஸாத³தி³ட்டி²னித்³தே³ஸோ பட²மோ.
Assādadiṭṭhiniddeso paṭhamo.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā / 1. அஸ்ஸாத³தி³ட்டி²னித்³தே³ஸவண்ணனா • 1. Assādadiṭṭhiniddesavaṇṇanā
