2. அத்தானுதி³ட்டி²னித்³தே³ஸோ

2. Attānudiṭṭhiniddeso

130. அத்தானுதி³ட்டி²யா கதமேஹி வீஸதியா ஆகாரேஹி அபி⁴னிவேஸோ ஹோதி? இத⁴ அஸ்ஸுதவா புது²ஜ்ஜனோ அரியானங் அத³ஸ்ஸாவீ அரியத⁴ம்மஸ்ஸ அகோவிதோ³ அரியத⁴ம்மே அவினீதோ, ஸப்புரிஸானங் அத³ஸ்ஸாவீ ஸப்புரிஸத⁴ம்மஸ்ஸ அகோவிதோ³ ஸப்புரிஸத⁴ம்மே அவினீதோ ரூபங் அத்ததோ ஸமனுபஸ்ஸதி ரூபவந்தங் வா அத்தானங் அத்தனி வா ரூபங் ரூபஸ்மிங் வா அத்தானங்; வேத³னங்…பே॰… ஸஞ்ஞங்…பே॰… ஸங்கா²ரே…பே॰… விஞ்ஞாணங் அத்ததோ ஸமனுபஸ்ஸதி விஞ்ஞாணவந்தங் வா அத்தானங் அத்தனி வா விஞ்ஞாணங் விஞ்ஞாணஸ்மிங் வா அத்தானங்.

130. Attānudiṭṭhiyā katamehi vīsatiyā ākārehi abhiniveso hoti? Idha assutavā puthujjano ariyānaṃ adassāvī ariyadhammassa akovido ariyadhamme avinīto, sappurisānaṃ adassāvī sappurisadhammassa akovido sappurisadhamme avinīto rūpaṃ attato samanupassati rūpavantaṃ vā attānaṃ attani vā rūpaṃ rūpasmiṃ vā attānaṃ; vedanaṃ…pe… saññaṃ…pe… saṅkhāre…pe… viññāṇaṃ attato samanupassati viññāṇavantaṃ vā attānaṃ attani vā viññāṇaṃ viññāṇasmiṃ vā attānaṃ.

131. கத²ங் ரூபங் அத்ததோ ஸமனுபஸ்ஸதி? இதே⁴கச்சோ பத²வீகஸிணங் அத்ததோ ஸமனுபஸ்ஸதி – ‘‘யங் பத²வீகஸிணங், ஸோ அஹங்; யோ அஹங், தங் பத²வீகஸிண’’ந்தி. பத²வீகஸிணஞ்ச அத்தஞ்ச அத்³வயங் ஸமனுபஸ்ஸதி. ஸெய்யதா²பி தேலப்பதீ³பஸ்ஸ ஜா²யதோ ‘‘யா அச்சி ஸோ வண்ணோ, யோ வண்ணோ ஸா அச்சீ’’தி – அச்சிஞ்ச வண்ணஞ்ச அத்³வயங் ஸமனுபஸ்ஸதி. ஏவமேவங் இதே⁴கச்சோ பத²வீகஸிணங் அத்ததோ ஸமனுபஸ்ஸதி – ‘‘யங் பத²வீகஸிணங், ஸோ அஹங்; யோ அஹங் , தங் பத²வீகஸிண’’ந்தி. பத²வீகஸிணஞ்ச அத்தஞ்ச அத்³வயங் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞங் வத்து². யா ச தி³ட்டி² யஞ்ச வத்து² – அயங் பட²மா ரூபவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி² தி³ட்டி²விபத்தி…பே॰… அத்தானுதி³ட்டி² மிச்சா²தி³ட்டி². மிச்சா²தி³ட்டி²கஸ்ஸ புரிஸபுக்³க³லஸ்ஸ த்³வேவ க³தியோ…பே॰… இமானி ஸஞ்ஞோஜனானி, ந ச தி³ட்டி²யோ.

131. Kathaṃ rūpaṃ attato samanupassati? Idhekacco pathavīkasiṇaṃ attato samanupassati – ‘‘yaṃ pathavīkasiṇaṃ, so ahaṃ; yo ahaṃ, taṃ pathavīkasiṇa’’nti. Pathavīkasiṇañca attañca advayaṃ samanupassati. Seyyathāpi telappadīpassa jhāyato ‘‘yā acci so vaṇṇo, yo vaṇṇo sā accī’’ti – acciñca vaṇṇañca advayaṃ samanupassati. Evamevaṃ idhekacco pathavīkasiṇaṃ attato samanupassati – ‘‘yaṃ pathavīkasiṇaṃ, so ahaṃ; yo ahaṃ , taṃ pathavīkasiṇa’’nti. Pathavīkasiṇañca attañca advayaṃ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ paṭhamā rūpavatthukā attānudiṭṭhi. Attānudiṭṭhi micchādiṭṭhi diṭṭhivipatti…pe… attānudiṭṭhi micchādiṭṭhi. Micchādiṭṭhikassa purisapuggalassa dveva gatiyo…pe… imāni saññojanāni, na ca diṭṭhiyo.

இதே⁴கச்சோ ஆபோகஸிணங்… தேஜோகஸிணங்… வாயோகஸிணங்… நீலகஸிணங்… பீதகஸிணங்… லோஹிதகஸிணங்… ஓதா³தகஸிணங் அத்ததோ ஸமனுபஸ்ஸதி – ‘‘யங் ஓதா³தகஸிணங், ஸோ அஹங்; யோ அஹங், தங் ஓதா³தகஸிண’’ந்தி. ஓதா³தகஸிணஞ்ச அத்தஞ்ச அத்³வயங் ஸமனுபஸ்ஸதி. ஸெய்யதா²பி தேலப்பதீ³பஸ்ஸ ஜா²யதோ ‘‘யா அச்சி, ஸோ வண்ணோ; யோ வண்ணோ, ஸா அச்சீ’’தி – அச்சிஞ்ச வண்ணஞ்ச அத்³வயங் ஸமனுபஸ்ஸதி. ஏவமேவ இதே⁴கச்சோ…பே॰… ஓதா³தகஸிணஞ்ச அத்தஞ்ச அத்³வயங் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞங் வத்து². யா ச தி³ட்டி² யஞ்ச வத்து² – அயங் பட²மா ரூபவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி² தி³ட்டி²விபத்தி…பே॰… இமானி ஸஞ்ஞோஜனானி, ந ச தி³ட்டி²யோ. ஏவங் ரூபங் அத்ததோ ஸமனுபஸ்ஸதி.

Idhekacco āpokasiṇaṃ… tejokasiṇaṃ… vāyokasiṇaṃ… nīlakasiṇaṃ… pītakasiṇaṃ… lohitakasiṇaṃ… odātakasiṇaṃ attato samanupassati – ‘‘yaṃ odātakasiṇaṃ, so ahaṃ; yo ahaṃ, taṃ odātakasiṇa’’nti. Odātakasiṇañca attañca advayaṃ samanupassati. Seyyathāpi telappadīpassa jhāyato ‘‘yā acci, so vaṇṇo; yo vaṇṇo, sā accī’’ti – acciñca vaṇṇañca advayaṃ samanupassati. Evameva idhekacco…pe… odātakasiṇañca attañca advayaṃ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ paṭhamā rūpavatthukā attānudiṭṭhi. Attānudiṭṭhi micchādiṭṭhi diṭṭhivipatti…pe… imāni saññojanāni, na ca diṭṭhiyo. Evaṃ rūpaṃ attato samanupassati.

கத²ங் ரூபவந்தங் அத்தானங் ஸமனுபஸ்ஸதி? இதே⁴கச்சோ வேத³னங்… ஸஞ்ஞங்… ஸங்கா²ரே… விஞ்ஞாணங் அத்ததோ ஸமனுபஸ்ஸதி. தஸ்ஸ ஏவங் ஹோதி – ‘‘அயங் கோ² மே அத்தா. ஸோ கோ² பன மே அயங் அத்தா இமினா ரூபேன ரூபவா’’தி. ரூபவந்தங் அத்தானங் ஸமனுபஸ்ஸதி. ஸெய்யதா²பி ருக்கோ² சா²யாஸம்பன்னோ அஸ்ஸ. தமேனங் புரிஸோ ஏவங் வதெ³ய்ய – ‘‘அயங் ருக்கோ², அயங் சா²யா. அஞ்ஞோ ருக்கோ², அஞ்ஞா சா²யா. ஸோ கோ² பனாயங் ருக்கோ² இமாய சா²யாய சா²யாவா’’தி. சா²யாவந்தங் ருக்க²ங் ஸமனுபஸ்ஸதி. ஏவமேவங் இதே⁴கச்சோ வேத³னங்…பே॰… ஸஞ்ஞங்… ஸங்கா²ரே… விஞ்ஞாணங் அத்ததோ ஸமனுபஸ்ஸதி. தஸ்ஸ ஏவங் ஹோதி – ‘‘அயங் கோ² மே அத்தா. ஸோ கோ² பன அயங் அத்தா இமினா ரூபேன ரூபவா’’தி. ரூபவந்தங் அத்தானங் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞங் வத்து². யா ச தி³ட்டி² யஞ்ச வத்து² – அயங் து³தியா ரூபவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி² தி³ட்டி²விபத்தி…பே॰… இமானி ஸஞ்ஞோஜனானி, ந ச தி³ட்டி²யோ. ஏவங் ரூபவந்தங் அத்தானங் ஸமனுபஸ்ஸதி.

Kathaṃ rūpavantaṃ attānaṃ samanupassati? Idhekacco vedanaṃ… saññaṃ… saṅkhāre… viññāṇaṃ attato samanupassati. Tassa evaṃ hoti – ‘‘ayaṃ kho me attā. So kho pana me ayaṃ attā iminā rūpena rūpavā’’ti. Rūpavantaṃ attānaṃ samanupassati. Seyyathāpi rukkho chāyāsampanno assa. Tamenaṃ puriso evaṃ vadeyya – ‘‘ayaṃ rukkho, ayaṃ chāyā. Añño rukkho, aññā chāyā. So kho panāyaṃ rukkho imāya chāyāya chāyāvā’’ti. Chāyāvantaṃ rukkhaṃ samanupassati. Evamevaṃ idhekacco vedanaṃ…pe… saññaṃ… saṅkhāre… viññāṇaṃ attato samanupassati. Tassa evaṃ hoti – ‘‘ayaṃ kho me attā. So kho pana ayaṃ attā iminā rūpena rūpavā’’ti. Rūpavantaṃ attānaṃ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ dutiyā rūpavatthukā attānudiṭṭhi. Attānudiṭṭhi micchādiṭṭhi diṭṭhivipatti…pe… imāni saññojanāni, na ca diṭṭhiyo. Evaṃ rūpavantaṃ attānaṃ samanupassati.

கத²ங் அத்தனி ரூபங் ஸமனுபஸ்ஸதி? இதே⁴கச்சோ வேத³னங்… ஸஞ்ஞங்… ஸங்கா²ரே… விஞ்ஞாணங் அத்ததோ ஸமனுபஸ்ஸதி. தஸ்ஸ ஏவங் ஹோதி – ‘‘அயங் கோ² மே அத்தா. இமஸ்மிஞ்ச பன அத்தனி இத³ங் ரூப’’ந்தி. அத்தனி ரூபங் ஸமனுபஸ்ஸதி. ஸெய்யதா²பி புப்ப²ங் க³ந்த⁴ஸம்பன்னங் அஸ்ஸ. தமேனங் புரிஸோ ஏவங் வதெ³ய்ய – ‘‘இத³ங் புப்ப²ங், அயங் க³ந்தோ⁴; அஞ்ஞங் புப்ப²ங், அஞ்ஞோ க³ந்தோ⁴. ஸோ கோ² பனாயங் க³ந்தோ⁴ இமஸ்மிங் புப்பே²’’தி. புப்ப²ஸ்மிங் க³ந்த⁴ங் ஸமனுபஸ்ஸதி . ஏவமேவங் இதே⁴கச்சோ வேத³னங்…பே॰… ஸஞ்ஞங்… ஸங்கா²ரே… விஞ்ஞாணங் அத்ததோ ஸமனுபஸ்ஸதி. தஸ்ஸ ஏவங் ஹோதி – ‘‘அயங் கோ² மே அத்தா. இமஸ்மிஞ்ச பன அத்தனி இத³ங் ரூப’’ந்தி. அத்தனி ரூபங் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞங் வத்து². யா ச தி³ட்டி² யஞ்ச வத்து² – அயங் ததியா ரூபவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி² தி³ட்டி²விபத்தி…பே॰… இமானி ஸஞ்ஞோஜனானி, ந ச தி³ட்டி²யோ. ஏவங் அத்தனி ரூபங் ஸமனுபஸ்ஸதி.

Kathaṃ attani rūpaṃ samanupassati? Idhekacco vedanaṃ… saññaṃ… saṅkhāre… viññāṇaṃ attato samanupassati. Tassa evaṃ hoti – ‘‘ayaṃ kho me attā. Imasmiñca pana attani idaṃ rūpa’’nti. Attani rūpaṃ samanupassati. Seyyathāpi pupphaṃ gandhasampannaṃ assa. Tamenaṃ puriso evaṃ vadeyya – ‘‘idaṃ pupphaṃ, ayaṃ gandho; aññaṃ pupphaṃ, añño gandho. So kho panāyaṃ gandho imasmiṃ pupphe’’ti. Pupphasmiṃ gandhaṃ samanupassati . Evamevaṃ idhekacco vedanaṃ…pe… saññaṃ… saṅkhāre… viññāṇaṃ attato samanupassati. Tassa evaṃ hoti – ‘‘ayaṃ kho me attā. Imasmiñca pana attani idaṃ rūpa’’nti. Attani rūpaṃ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ tatiyā rūpavatthukā attānudiṭṭhi. Attānudiṭṭhi micchādiṭṭhi diṭṭhivipatti…pe… imāni saññojanāni, na ca diṭṭhiyo. Evaṃ attani rūpaṃ samanupassati.

கத²ங் ரூபஸ்மிங் அத்தானங் ஸமனுபஸ்ஸதி? இதே⁴கச்சோ வேத³னங்…பே॰… ஸஞ்ஞங்… ஸங்கா²ரே… விஞ்ஞாணங் அத்ததோ ஸமனுபஸ்ஸதி. தஸ்ஸ ஏவங் ஹோதி – ‘‘அயங் கோ² மே அத்தா. ஸோ கோ² பன மே அயங் அத்தா இமஸ்மிங் ரூபே’’தி. ரூபஸ்மிங் அத்தானங் ஸமனுபஸ்ஸதி. ஸெய்யதா²பி மணி கரண்ட³கே பக்கி²த்தோ அஸ்ஸ. தமேனங் புரிஸோ ஏவங் வதெ³ய்ய – ‘‘அயங் மணி, அயங் கரண்ட³கோ. அஞ்ஞோ மணி, அஞ்ஞோ கரண்ட³கோ. ஸோ கோ² பனாயங் மணி இமஸ்மிங் கரண்ட³கே’’தி. கரண்ட³கஸ்மிங் மணிங் ஸமனுபஸ்ஸதி. ஏவமேவங் இதே⁴கச்சோ வேத³னங்…பே॰… ஸஞ்ஞங்… ஸங்கா²ரே… விஞ்ஞாணங் அத்ததோ ஸமனுபஸ்ஸதி . தஸ்ஸ ஏவங் ஹோதி – ‘‘அயங் கோ² மே அத்தா. ஸோ கோ² பன மே அயங் அத்தா இமஸ்மிங் ரூபே’’தி. ரூபஸ்மிங் அத்தானங் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞங் வத்து². யா ச தி³ட்டி² யஞ்ச வத்து² – அயங் சதுத்தா² ரூபவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி² தி³ட்டி²விபத்தி…பே॰… இமானி ஸஞ்ஞோஜனானி, ந ச தி³ட்டி²யோ. ஏவங் ரூபஸ்மிங் அத்தானங் ஸமனுபஸ்ஸதி.

Kathaṃ rūpasmiṃ attānaṃ samanupassati? Idhekacco vedanaṃ…pe… saññaṃ… saṅkhāre… viññāṇaṃ attato samanupassati. Tassa evaṃ hoti – ‘‘ayaṃ kho me attā. So kho pana me ayaṃ attā imasmiṃ rūpe’’ti. Rūpasmiṃ attānaṃ samanupassati. Seyyathāpi maṇi karaṇḍake pakkhitto assa. Tamenaṃ puriso evaṃ vadeyya – ‘‘ayaṃ maṇi, ayaṃ karaṇḍako. Añño maṇi, añño karaṇḍako. So kho panāyaṃ maṇi imasmiṃ karaṇḍake’’ti. Karaṇḍakasmiṃ maṇiṃ samanupassati. Evamevaṃ idhekacco vedanaṃ…pe… saññaṃ… saṅkhāre… viññāṇaṃ attato samanupassati . Tassa evaṃ hoti – ‘‘ayaṃ kho me attā. So kho pana me ayaṃ attā imasmiṃ rūpe’’ti. Rūpasmiṃ attānaṃ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ catutthā rūpavatthukā attānudiṭṭhi. Attānudiṭṭhi micchādiṭṭhi diṭṭhivipatti…pe… imāni saññojanāni, na ca diṭṭhiyo. Evaṃ rūpasmiṃ attānaṃ samanupassati.

132. கத²ங் வேத³னங் அத்ததோ ஸமனுபஸ்ஸதி? இதே⁴கச்சோ சக்கு²ஸம்ப²ஸ்ஸஜங் வேத³னங் ஸோதஸம்ப²ஸ்ஸஜங் வேத³னங் கா⁴னஸம்ப²ஸ்ஸஜங் வேத³னங் ஜிவ்ஹாஸம்ப²ஸ்ஸஜங் வேத³னங் காயஸம்ப²ஸ்ஸஜங் வேத³னங் மனோஸம்ப²ஸ்ஸஜங் வேத³னங் அத்ததோ ஸமனுபஸ்ஸதி. ‘‘யா மனோஸம்ப²ஸ்ஸஜா வேத³னா ஸோ அஹங், யோ அஹங் ஸா மனோஸம்ப²ஸ்ஸஜா வேத³னா’’தி – மனோஸம்ப²ஸ்ஸஜங் வேத³னஞ்ச அத்தஞ்ச அத்³வயங் ஸமனுபஸ்ஸதி. ஸெய்யதா²பி தேலப்பதீ³பஸ்ஸ ஜா²யதோ ‘‘யா அச்சி ஸோ வண்ணோ, யோ வண்ணோ ஸா அச்சீ’’தி – அச்சிஞ்ச வண்ணஞ்ச அத்³வயங் ஸமனுபஸ்ஸதி. ஏவமேவங் இதே⁴கச்சோ மனோஸம்ப²ஸ்ஸஜங் வேத³னங் அத்ததோ ஸமனுபஸ்ஸதி. ‘‘யா மனோஸம்ப²ஸ்ஸஜா வேத³னா ஸோ அஹங், யோ அஹங் ஸா மனோஸம்ப²ஸ்ஸஜா வேத³னா’’தி – மனோஸம்ப²ஸ்ஸஜங் வேத³னஞ்ச அத்தஞ்ச அத்³வயங் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞங் வத்து². யா ச தி³ட்டி² யஞ்ச வத்து² – அயங் பட²மா வேத³னாவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி² தி³ட்டி²விபத்தி…பே॰… இமானி ஸஞ்ஞோஜனானி, ந ச தி³ட்டி²யோ. ஏவங் வேத³னங் அத்ததோ ஸமனுபஸ்ஸதி.

132. Kathaṃ vedanaṃ attato samanupassati? Idhekacco cakkhusamphassajaṃ vedanaṃ sotasamphassajaṃ vedanaṃ ghānasamphassajaṃ vedanaṃ jivhāsamphassajaṃ vedanaṃ kāyasamphassajaṃ vedanaṃ manosamphassajaṃ vedanaṃ attato samanupassati. ‘‘Yā manosamphassajā vedanā so ahaṃ, yo ahaṃ sā manosamphassajā vedanā’’ti – manosamphassajaṃ vedanañca attañca advayaṃ samanupassati. Seyyathāpi telappadīpassa jhāyato ‘‘yā acci so vaṇṇo, yo vaṇṇo sā accī’’ti – acciñca vaṇṇañca advayaṃ samanupassati. Evamevaṃ idhekacco manosamphassajaṃ vedanaṃ attato samanupassati. ‘‘Yā manosamphassajā vedanā so ahaṃ, yo ahaṃ sā manosamphassajā vedanā’’ti – manosamphassajaṃ vedanañca attañca advayaṃ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ paṭhamā vedanāvatthukā attānudiṭṭhi. Attānudiṭṭhi micchādiṭṭhi diṭṭhivipatti…pe… imāni saññojanāni, na ca diṭṭhiyo. Evaṃ vedanaṃ attato samanupassati.

கத²ங் வேத³னாவந்தங் அத்தானங் ஸமனுபஸ்ஸதி? இதே⁴கச்சோ ஸஞ்ஞங்…பே॰… ஸங்கா²ரே… விஞ்ஞாணங்… ரூபங் அத்ததோ ஸமனுபஸ்ஸதி. தஸ்ஸ ஏவங் ஹோதி – ‘‘அயங் கோ² மே அத்தா. ஸோ கோ² பன மே அயங் அத்தா இமாய வேத³னாய வேத³னாவா’’தி. வேத³னாவந்தங் அத்தானங் ஸமனுபஸ்ஸதி. ஸெய்யதா²பி ருக்கோ² சா²யாஸம்பன்னோ அஸ்ஸ. தமேனங் புரிஸோ ஏவங் வதெ³ய்ய – ‘‘அயங் ருக்கோ², அயங் சா²யா. அஞ்ஞோ ருக்கோ², அஞ்ஞா சா²யா. ஸோ கோ² பனாயங் ருக்கோ² இமாய சா²யாய சா²யாவா’’தி. சா²யாவந்தங் ருக்க²ங் ஸமனுபஸ்ஸதி. ஏவமேவங் இதே⁴கச்சோ ஸஞ்ஞங்…பே॰… ஸங்கா²ரே… விஞ்ஞாணங்… ரூபங் அத்ததோ ஸமனுபஸ்ஸதி. தஸ்ஸ ஏவங் ஹோதி – ‘‘அயங் கோ² மே அத்தா. ஸோ கோ² பன மே அயங் அத்தா இமாய வேத³னாய வேத³னாவா’’தி. வேத³னாவந்தங் அத்தானங் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞங் வத்து². யா ச தி³ட்டி² யஞ்ச வத்து² – அயங் து³தியா வேத³னாவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி² தி³ட்டி²விபத்தி…பே॰… இமானி ஸஞ்ஞோஜனானி, ந ச தி³ட்டி²யோ. ஏவங் வேத³னாவந்தங் அத்தானங் ஸமனுபஸ்ஸதி.

Kathaṃ vedanāvantaṃ attānaṃ samanupassati? Idhekacco saññaṃ…pe… saṅkhāre… viññāṇaṃ… rūpaṃ attato samanupassati. Tassa evaṃ hoti – ‘‘ayaṃ kho me attā. So kho pana me ayaṃ attā imāya vedanāya vedanāvā’’ti. Vedanāvantaṃ attānaṃ samanupassati. Seyyathāpi rukkho chāyāsampanno assa. Tamenaṃ puriso evaṃ vadeyya – ‘‘ayaṃ rukkho, ayaṃ chāyā. Añño rukkho, aññā chāyā. So kho panāyaṃ rukkho imāya chāyāya chāyāvā’’ti. Chāyāvantaṃ rukkhaṃ samanupassati. Evamevaṃ idhekacco saññaṃ…pe… saṅkhāre… viññāṇaṃ… rūpaṃ attato samanupassati. Tassa evaṃ hoti – ‘‘ayaṃ kho me attā. So kho pana me ayaṃ attā imāya vedanāya vedanāvā’’ti. Vedanāvantaṃ attānaṃ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ dutiyā vedanāvatthukā attānudiṭṭhi. Attānudiṭṭhi micchādiṭṭhi diṭṭhivipatti…pe… imāni saññojanāni, na ca diṭṭhiyo. Evaṃ vedanāvantaṃ attānaṃ samanupassati.

கத²ங் அத்தனி வேத³னங் ஸமனுபஸ்ஸதி? இதே⁴கச்சோ ஸஞ்ஞங்…பே॰… ஸங்கா²ரே… விஞ்ஞாணங்… ரூபங் அத்ததோ ஸமனுபஸ்ஸதி. தஸ்ஸ ஏவங் ஹோதி – ‘‘அயங் கோ² மே அத்தா. இமஸ்மிஞ்ச பன அத்தனி அயங் வேத³னா’’தி. அத்தனி வேத³னங் ஸமனுபஸ்ஸதி. ஸெய்யதா²பி புப்ப²ங் க³ந்த⁴ஸம்பன்னங் அஸ்ஸ. தமேனங் புரிஸோ ஏவங் வதெ³ய்ய – ‘‘இத³ங் புப்ப²ங், அயங் க³ந்தோ⁴; அஞ்ஞங் புப்ப²ங், அஞ்ஞோ க³ந்தோ⁴. ஸோ கோ² பனாயங் க³ந்தோ⁴ இமஸ்மிங் புப்பே²’’தி. புப்ப²ஸ்மிங் க³ந்த⁴ங் ஸமனுபஸ்ஸதி. ஏவமேவங் இதே⁴கச்சோ ஸஞ்ஞங்…பே॰… ஸங்கா²ரே… விஞ்ஞாணங்… ரூபங் அத்ததோ ஸமனுபஸ்ஸதி. தஸ்ஸ ஏவங் ஹோதி – ‘‘அயங் கோ² மே அத்தா. இமஸ்மிஞ்ச பன அத்தனி அயங் வேத³னா’’தி. அத்தனி வேத³னங் ஸமனுபஸ்ஸதி . அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞங் வத்து². யா ச தி³ட்டி² யஞ்ச வத்து² – அயங் ததியா வேத³னாவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி² தி³ட்டி²விபத்தி…பே॰… இமானி ஸஞ்ஞோஜனானி, ந ச தி³ட்டி²யோ. ஏவங் அத்தனி வேத³னங் ஸமனுபஸ்ஸதி.

Kathaṃ attani vedanaṃ samanupassati? Idhekacco saññaṃ…pe… saṅkhāre… viññāṇaṃ… rūpaṃ attato samanupassati. Tassa evaṃ hoti – ‘‘ayaṃ kho me attā. Imasmiñca pana attani ayaṃ vedanā’’ti. Attani vedanaṃ samanupassati. Seyyathāpi pupphaṃ gandhasampannaṃ assa. Tamenaṃ puriso evaṃ vadeyya – ‘‘idaṃ pupphaṃ, ayaṃ gandho; aññaṃ pupphaṃ, añño gandho. So kho panāyaṃ gandho imasmiṃ pupphe’’ti. Pupphasmiṃ gandhaṃ samanupassati. Evamevaṃ idhekacco saññaṃ…pe… saṅkhāre… viññāṇaṃ… rūpaṃ attato samanupassati. Tassa evaṃ hoti – ‘‘ayaṃ kho me attā. Imasmiñca pana attani ayaṃ vedanā’’ti. Attani vedanaṃ samanupassati . Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ tatiyā vedanāvatthukā attānudiṭṭhi. Attānudiṭṭhi micchādiṭṭhi diṭṭhivipatti…pe… imāni saññojanāni, na ca diṭṭhiyo. Evaṃ attani vedanaṃ samanupassati.

கத²ங் வேத³னாய அத்தானங் ஸமனுபஸ்ஸதி? இதே⁴கச்சோ ஸஞ்ஞங்…பே॰… ஸங்கா²ரே… விஞ்ஞாணங்… ரூபங் அத்ததோ ஸமனுபஸ்ஸதி. தஸ்ஸ ஏவங் ஹோதி – ‘‘அயங் கோ² மே அத்தா. ஸோ கோ² பன மே அயங் அத்தா இமாய வேத³னாயா’’தி. வேத³னாய அத்தானங் ஸமனுபஸ்ஸதி. ஸெய்யதா²பி மணி கரண்ட³கே பக்கி²த்தோ அஸ்ஸ. தமேனங் புரிஸோ ஏவங் வதெ³ய்ய – ‘‘அயங் மணி, அயங் கரண்ட³கோ. அஞ்ஞோ மணி, அஞ்ஞோ கரண்ட³கோ. ஸோ கோ² பனாயங் மணி இமஸ்மிங் கரண்ட³கே’’தி. கரண்ட³கஸ்மிங் மணிங் ஸமனுபஸ்ஸதி. ஏவமேவங் இதே⁴கச்சோ ஸஞ்ஞங்… ஸங்கா²ரே… விஞ்ஞாணங்… ரூபங் அத்ததோ ஸமனுபஸ்ஸதி. தஸ்ஸ ஏவங் ஹோதி – ‘‘அயங் கோ² மே அத்தா. ஸோ கோ² பன மே அயங் அத்தா இமாய வேத³னாயா’’தி. வேத³னாய அத்தானங் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞங் வத்து². யா ச தி³ட்டி² யஞ்ச வத்து² – அயங் சதுத்தா² வேத³னாவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி² தி³ட்டி²விபத்தி…பே॰… இமானி ஸஞ்ஞோஜனானி, ந ச தி³ட்டி²யோ. ஏவங் வேத³னாய அத்தானங் ஸமனுபஸ்ஸதி.

Kathaṃ vedanāya attānaṃ samanupassati? Idhekacco saññaṃ…pe… saṅkhāre… viññāṇaṃ… rūpaṃ attato samanupassati. Tassa evaṃ hoti – ‘‘ayaṃ kho me attā. So kho pana me ayaṃ attā imāya vedanāyā’’ti. Vedanāya attānaṃ samanupassati. Seyyathāpi maṇi karaṇḍake pakkhitto assa. Tamenaṃ puriso evaṃ vadeyya – ‘‘ayaṃ maṇi, ayaṃ karaṇḍako. Añño maṇi, añño karaṇḍako. So kho panāyaṃ maṇi imasmiṃ karaṇḍake’’ti. Karaṇḍakasmiṃ maṇiṃ samanupassati. Evamevaṃ idhekacco saññaṃ… saṅkhāre… viññāṇaṃ… rūpaṃ attato samanupassati. Tassa evaṃ hoti – ‘‘ayaṃ kho me attā. So kho pana me ayaṃ attā imāya vedanāyā’’ti. Vedanāya attānaṃ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ catutthā vedanāvatthukā attānudiṭṭhi. Attānudiṭṭhi micchādiṭṭhi diṭṭhivipatti…pe… imāni saññojanāni, na ca diṭṭhiyo. Evaṃ vedanāya attānaṃ samanupassati.

133. கத²ங் ஸஞ்ஞங் அத்ததோ ஸமனுபஸ்ஸதி? இதே⁴கச்சோ சக்கு²ஸம்ப²ஸ்ஸஜங் ஸஞ்ஞங்…பே॰… ஸோதஸம்ப²ஸ்ஸஜங் ஸஞ்ஞங்… கா⁴னஸம்ப²ஸ்ஸஜங் ஸஞ்ஞங்… ஜிவ்ஹாஸம்ப²ஸ்ஸஜங் ஸஞ்ஞங்… காயஸம்ப²ஸ்ஸஜங் ஸஞ்ஞங்… மனோஸம்ப²ஸ்ஸஜங் ஸஞ்ஞங் அத்ததோ ஸமனுபஸ்ஸதி. யா மனோஸம்ப²ஸ்ஸஜா ஸஞ்ஞா ஸோ அஹங், யோ அஹங் ஸா மனோஸம்ப²ஸ்ஸஜா ஸஞ்ஞா’’தி. மனோஸம்ப²ஸ்ஸஜங் ஸஞ்ஞஞ்ச அத்தஞ்ச அத்³வயங் ஸமனுபஸ்ஸதி. ஸெய்யதா²பி தேலப்பதீ³பஸ்ஸ ஜா²யதோ ‘‘யா அச்சி ஸோ வண்ணோ, யோ வண்ணோ ஸா அச்சீ’’தி – அச்சிஞ்ச வண்ணஞ்ச அத்³வயங் ஸமனுபஸ்ஸதி. ஏவமேவங் இதே⁴கச்சோ மனோஸம்ப²ஸ்ஸஜங் ஸஞ்ஞங் அத்ததோ ஸமனுபஸ்ஸதி – ‘‘யா மனோஸம்ப²ஸ்ஸஜா ஸஞ்ஞா ஸோ அஹங், யோ அஹங் ஸா மனோஸம்ப²ஸ்ஸஜா ஸஞ்ஞா’’தி. மனோஸம்ப²ஸ்ஸஜங் ஸஞ்ஞஞ்ச அத்தஞ்ச அத்³வயங் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞங் வத்து². யா ச தி³ட்டி² யஞ்ச வத்து² – அயங் பட²மா ஸஞ்ஞாவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி² தி³ட்டி²விபத்தி…பே॰… இமானி ஸஞ்ஞோஜனானி, ந ச தி³ட்டி²யோ. ஏவங் ஸஞ்ஞங் அத்ததோ ஸமனுபஸ்ஸதி.

133. Kathaṃ saññaṃ attato samanupassati? Idhekacco cakkhusamphassajaṃ saññaṃ…pe… sotasamphassajaṃ saññaṃ… ghānasamphassajaṃ saññaṃ… jivhāsamphassajaṃ saññaṃ… kāyasamphassajaṃ saññaṃ… manosamphassajaṃ saññaṃ attato samanupassati. Yā manosamphassajā saññā so ahaṃ, yo ahaṃ sā manosamphassajā saññā’’ti. Manosamphassajaṃ saññañca attañca advayaṃ samanupassati. Seyyathāpi telappadīpassa jhāyato ‘‘yā acci so vaṇṇo, yo vaṇṇo sā accī’’ti – acciñca vaṇṇañca advayaṃ samanupassati. Evamevaṃ idhekacco manosamphassajaṃ saññaṃ attato samanupassati – ‘‘yā manosamphassajā saññā so ahaṃ, yo ahaṃ sā manosamphassajā saññā’’ti. Manosamphassajaṃ saññañca attañca advayaṃ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ paṭhamā saññāvatthukā attānudiṭṭhi. Attānudiṭṭhi micchādiṭṭhi diṭṭhivipatti…pe… imāni saññojanāni, na ca diṭṭhiyo. Evaṃ saññaṃ attato samanupassati.

கத²ங் ஸஞ்ஞாவந்தங் அத்தானங் ஸமனுபஸ்ஸதி? இதே⁴கச்சோ ஸங்கா²ரே…பே॰… விஞ்ஞாணங்… ரூபங்… வேத³னங் அத்ததோ ஸமனுபஸ்ஸதி. தஸ்ஸ ஏவங் ஹோதி – ‘‘அயங் கோ² மே அத்தா. ஸோ கோ² பன மே அயங் அத்தா இமாய ஸஞ்ஞாய ஸஞ்ஞாவா’’தி. ஸஞ்ஞாவந்தங் அத்தானங் ஸமனுபஸ்ஸதி. ஸெய்யதா²பி ருக்கோ² சா²யாஸம்பன்னோ அஸ்ஸ. தமேனங் புரிஸோ ஏவங் வதெ³ய்ய – ‘‘அயங் ருக்கோ², அயங் சா²யா. அஞ்ஞோ ருக்கோ², அஞ்ஞா சா²யா. ஸோ கோ² பனாயங் ருக்கோ² இமாய சா²யாய சா²யாவா’’தி. சா²யாவந்தங் ருக்க²ங் ஸமனுபஸ்ஸதி. ஏவமேவங் இதே⁴கச்சோ ஸங்கா²ரே… விஞ்ஞாணங்… ரூபங்… வேத³னங் அத்ததோ ஸமனுபஸ்ஸதி. தஸ்ஸ ஏவங் ஹோதி – ‘‘அயங் கோ² மே அத்தா. ஸோ கோ² பன மே அயங் அத்தா இமாய ஸஞ்ஞாய ஸஞ்ஞாவா’’தி. ஸஞ்ஞாவந்தங் அத்தானங் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞங் வத்து². யா ச தி³ட்டி² யஞ்ச வத்து² – அயங் து³தியா ஸஞ்ஞாவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி²…பே॰… இமானி ஸஞ்ஞோஜனானி, ந ச தி³ட்டி²யோ. ஏவங் ஸஞ்ஞாவந்தங் அத்தானங் ஸமனுபஸ்ஸதி.

Kathaṃ saññāvantaṃ attānaṃ samanupassati? Idhekacco saṅkhāre…pe… viññāṇaṃ… rūpaṃ… vedanaṃ attato samanupassati. Tassa evaṃ hoti – ‘‘ayaṃ kho me attā. So kho pana me ayaṃ attā imāya saññāya saññāvā’’ti. Saññāvantaṃ attānaṃ samanupassati. Seyyathāpi rukkho chāyāsampanno assa. Tamenaṃ puriso evaṃ vadeyya – ‘‘ayaṃ rukkho, ayaṃ chāyā. Añño rukkho, aññā chāyā. So kho panāyaṃ rukkho imāya chāyāya chāyāvā’’ti. Chāyāvantaṃ rukkhaṃ samanupassati. Evamevaṃ idhekacco saṅkhāre… viññāṇaṃ… rūpaṃ… vedanaṃ attato samanupassati. Tassa evaṃ hoti – ‘‘ayaṃ kho me attā. So kho pana me ayaṃ attā imāya saññāya saññāvā’’ti. Saññāvantaṃ attānaṃ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ dutiyā saññāvatthukā attānudiṭṭhi. Attānudiṭṭhi micchādiṭṭhi…pe… imāni saññojanāni, na ca diṭṭhiyo. Evaṃ saññāvantaṃ attānaṃ samanupassati.

கத²ங் அத்தனி ஸஞ்ஞங் ஸமனுபஸ்ஸதி? இதே⁴கச்சோ ஸங்கா²ரே…பே॰… விஞ்ஞாணங்… ரூபங்… வேத³னங் அத்ததோ ஸமனுபஸ்ஸதி. தஸ்ஸ ஏவங் ஹோதி – ‘‘அயங் கோ² மே அத்தா. இமஸ்மிஞ்ச பன அத்தனி அயங் ஸஞ்ஞா’’தி. அத்தனி ஸஞ்ஞங் ஸமனுபஸ்ஸதி. ஸெய்யதா²பி புப்ப²ங் க³ந்த⁴ஸம்பன்னங் அஸ்ஸ. தமேனங் புரிஸோ ஏவங் வதெ³ய்ய – ‘‘இத³ங் புப்ப²ங், அயங் க³ந்தோ⁴. அஞ்ஞங் புப்ப²ங், அஞ்ஞோ க³ந்தோ⁴. ஸோ கோ² பனாயங் க³ந்தோ⁴ இமஸ்மிங் புப்பே²’’தி. புப்ப²ஸ்மிங் க³ந்த⁴ங் ஸமனுபஸ்ஸதி. ஏவமேவங் இதே⁴கச்சோ ஸங்கா²ரே… விஞ்ஞாணங்… ரூபங்… வேத³னங் அத்ததோ ஸமனுபஸ்ஸதி. தஸ்ஸ ஏவங் ஹோதி – ‘‘அயங் கோ² மே அத்தா. இமஸ்மிஞ்ச பன அத்தனி அயங் ஸஞ்ஞா’’தி. அத்தனி ஸஞ்ஞங் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞங் வத்து². யா ச தி³ட்டி² யஞ்ச வத்து² – அயங் ததியா ஸஞ்ஞாவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி²…பே॰… இமானி ஸஞ்ஞோஜனானி, ந ச தி³ட்டி²யோ. ஏவங் அத்தனி ஸஞ்ஞங் ஸமனுபஸ்ஸதி.

Kathaṃ attani saññaṃ samanupassati? Idhekacco saṅkhāre…pe… viññāṇaṃ… rūpaṃ… vedanaṃ attato samanupassati. Tassa evaṃ hoti – ‘‘ayaṃ kho me attā. Imasmiñca pana attani ayaṃ saññā’’ti. Attani saññaṃ samanupassati. Seyyathāpi pupphaṃ gandhasampannaṃ assa. Tamenaṃ puriso evaṃ vadeyya – ‘‘idaṃ pupphaṃ, ayaṃ gandho. Aññaṃ pupphaṃ, añño gandho. So kho panāyaṃ gandho imasmiṃ pupphe’’ti. Pupphasmiṃ gandhaṃ samanupassati. Evamevaṃ idhekacco saṅkhāre… viññāṇaṃ… rūpaṃ… vedanaṃ attato samanupassati. Tassa evaṃ hoti – ‘‘ayaṃ kho me attā. Imasmiñca pana attani ayaṃ saññā’’ti. Attani saññaṃ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ tatiyā saññāvatthukā attānudiṭṭhi. Attānudiṭṭhi micchādiṭṭhi…pe… imāni saññojanāni, na ca diṭṭhiyo. Evaṃ attani saññaṃ samanupassati.

கத²ங் ஸஞ்ஞாய அத்தானங் ஸமனுபஸ்ஸதி? இதே⁴கச்சோ ஸங்கா²ரே …பே॰… விஞ்ஞாணங்… ரூபங்… வேத³னங் அத்ததோ ஸமனுபஸ்ஸதி. தஸ்ஸ ஏவங் ஹோதி – ‘‘அயங் கோ² மே அத்தா. ஸோ கோ² பன மே அயங் அத்தா இமாய ஸஞ்ஞாயா’’தி. ஸஞ்ஞாய அத்தானங் ஸமனுபஸ்ஸதி. ஸெய்யதா²பி மணி கரண்ட³கே பக்கி²த்தோ அஸ்ஸ. தமேனங் புரிஸோ ஏவங் வதெ³ய்ய – ‘‘அயங் மணி, அயங் கரண்ட³கோ. அஞ்ஞோ மணி, அஞ்ஞோ கரண்ட³கோ. ஸோ கோ² பனாயங் மணி இமஸ்மிங் கரண்ட³கே’’தி. கரண்ட³கஸ்மிங் மணிங் ஸமனுபஸ்ஸதி. ஏவமேவ இதே⁴கச்சோ ஸங்கா²ரே… விஞ்ஞாணங்… ரூபங்… வேத³னங் அத்ததோ ஸமனுபஸ்ஸதி. தஸ்ஸ ஏவங் ஹோதி – ‘‘அயங் கோ² மே அத்தா. ஸோ கோ² பன மே அயங் அத்தா இமாய ஸஞ்ஞாயா’’தி. ஸஞ்ஞாய அத்தானங் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞங் வத்து². யா ச தி³ட்டி² யஞ்ச வத்து² – அயங் சதுத்தா² ஸஞ்ஞாவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி²…பே॰… இமானி ஸஞ்ஞோஜனானி ந ச தி³ட்டி²யோ. ஏவங் ஸஞ்ஞாய அத்தானங் ஸமனுபஸ்ஸதி.

Kathaṃ saññāya attānaṃ samanupassati? Idhekacco saṅkhāre …pe… viññāṇaṃ… rūpaṃ… vedanaṃ attato samanupassati. Tassa evaṃ hoti – ‘‘ayaṃ kho me attā. So kho pana me ayaṃ attā imāya saññāyā’’ti. Saññāya attānaṃ samanupassati. Seyyathāpi maṇi karaṇḍake pakkhitto assa. Tamenaṃ puriso evaṃ vadeyya – ‘‘ayaṃ maṇi, ayaṃ karaṇḍako. Añño maṇi, añño karaṇḍako. So kho panāyaṃ maṇi imasmiṃ karaṇḍake’’ti. Karaṇḍakasmiṃ maṇiṃ samanupassati. Evameva idhekacco saṅkhāre… viññāṇaṃ… rūpaṃ… vedanaṃ attato samanupassati. Tassa evaṃ hoti – ‘‘ayaṃ kho me attā. So kho pana me ayaṃ attā imāya saññāyā’’ti. Saññāya attānaṃ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ catutthā saññāvatthukā attānudiṭṭhi. Attānudiṭṭhi micchādiṭṭhi…pe… imāni saññojanāni na ca diṭṭhiyo. Evaṃ saññāya attānaṃ samanupassati.

134. கத²ங் ஸங்கா²ரே அத்ததோ ஸமனுபஸ்ஸதி? இதே⁴கச்சோ சக்கு²ஸம்ப²ஸ்ஸஜங் சேதனங் ஸோதஸம்ப²ஸ்ஸஜங் சேதனங் கா⁴னஸம்ப²ஸ்ஸஜங் சேதனங் ஜிவ்ஹாஸம்ப²ஸ்ஸஜங் சேதனங் காயஸம்ப²ஸ்ஸஜங் சேதனங் மனோஸம்ப²ஸ்ஸஜங் சேதனங் அத்ததோ ஸமனுபஸ்ஸதி. ‘‘யா மனோஸம்ப²ஸ்ஸஜா சேதனா, ஸோ அஹங்; யோ அஹங் ஸா மனோஸம்ப²ஸ்ஸஜா சேதனா’’தி – மனோஸம்ப²ஸ்ஸஜங் சேதனஞ்ச அத்தஞ்ச அத்³வயங் ஸமனுபஸ்ஸதி. ஸெய்யதா²பி தேலப்பதீ³பஸ்ஸ ஜா²யதோ ‘‘யா அச்சி ஸோ வண்ணோ, யோ வண்ணோ ஸா அச்சீ’’தி – அச்சிஞ்ச வண்ணஞ்ச அத்³வயங் ஸமனுபஸ்ஸதி. ஏவமேவங் இதே⁴கச்சோ மனோஸம்ப²ஸ்ஸஜங் சேதனங் அத்ததோ ஸமனுபஸ்ஸதி. ‘‘யா மனோஸம்ப²ஸ்ஸஜா சேதனா ஸோ அஹங், யோ அஹங் ஸா மனோஸம்ப²ஸ்ஸஜா சேதனா’’தி – மனோஸம்ப²ஸ்ஸஜங் சேதனஞ்ச அத்தஞ்ச அத்³வயங் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞங் வத்து². யா ச தி³ட்டி² யஞ்ச வத்து² – அயங் பட²மா ஸங்கா²ரவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி²…பே॰… இமானி ஸஞ்ஞோஜனானி, ந ச தி³ட்டி²யோ. ஏவங் ஸங்கா²ரே அத்ததோ ஸமனுபஸ்ஸதி.

134. Kathaṃ saṅkhāre attato samanupassati? Idhekacco cakkhusamphassajaṃ cetanaṃ sotasamphassajaṃ cetanaṃ ghānasamphassajaṃ cetanaṃ jivhāsamphassajaṃ cetanaṃ kāyasamphassajaṃ cetanaṃ manosamphassajaṃ cetanaṃ attato samanupassati. ‘‘Yā manosamphassajā cetanā, so ahaṃ; yo ahaṃ sā manosamphassajā cetanā’’ti – manosamphassajaṃ cetanañca attañca advayaṃ samanupassati. Seyyathāpi telappadīpassa jhāyato ‘‘yā acci so vaṇṇo, yo vaṇṇo sā accī’’ti – acciñca vaṇṇañca advayaṃ samanupassati. Evamevaṃ idhekacco manosamphassajaṃ cetanaṃ attato samanupassati. ‘‘Yā manosamphassajā cetanā so ahaṃ, yo ahaṃ sā manosamphassajā cetanā’’ti – manosamphassajaṃ cetanañca attañca advayaṃ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ paṭhamā saṅkhāravatthukā attānudiṭṭhi. Attānudiṭṭhi micchādiṭṭhi…pe… imāni saññojanāni, na ca diṭṭhiyo. Evaṃ saṅkhāre attato samanupassati.

கத²ங் ஸங்கா²ரவந்தங் அத்தானங் ஸமனுபஸ்ஸதி? இதே⁴கச்சோ விஞ்ஞாணங்… ரூபங்… வேத³னங்… ஸஞ்ஞங் அத்ததோ ஸமனுபஸ்ஸதி. தஸ்ஸ ஏவங் ஹோதி – ‘‘அயங் கோ² மே அத்தா. ஸோ கோ² பன மே அயங் அத்தா இமேஹி ஸங்கா²ரேஹி ஸங்கா²ரவா’’தி. ஸங்கா²ரவந்தங் அத்தானங் ஸமனுபஸ்ஸதி. ஸெய்யதா²பி ருக்கோ² சா²யாஸம்பன்னோ அஸ்ஸ. தமேனங் புரிஸோ ஏவங் வதெ³ய்ய – ‘‘அயங் ருக்கோ², அயங் சா²யா. அஞ்ஞோ ருக்கோ², அஞ்ஞா சா²யா. ஸோ கோ² பனாயங் ருக்கோ² இமாய சா²யாய சா²யாவா’’தி. சா²யாவந்தங் ருக்க²ங் ஸமனுபஸ்ஸதி. ஏவமேவ இதே⁴கச்சோ விஞ்ஞாணங்… ரூபங்… வேத³னங்… ஸஞ்ஞங் அத்ததோ ஸமனுபஸ்ஸதி. தஸ்ஸ ஏவங் ஹோதி – ‘‘அயங் கோ² மே அத்தா. ஸோ கோ² பன மே அயங் அத்தா. இமேஹி ஸங்கா²ரேஹி ஸங்கா²ரவா’’தி. ஸங்கா²ரவந்தங் அத்தானங் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞங் வத்து². யா ச தி³ட்டி² யஞ்ச வத்து² – அயங் து³தியா ஸங்கா²ரவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி²…பே॰… இமானி ஸஞ்ஞோஜனானி, ந ச தி³ட்டி²யோ. ஏவங் ஸங்கா²ரவந்தங் அத்தானங் ஸமனுபஸ்ஸதி.

Kathaṃ saṅkhāravantaṃ attānaṃ samanupassati? Idhekacco viññāṇaṃ… rūpaṃ… vedanaṃ… saññaṃ attato samanupassati. Tassa evaṃ hoti – ‘‘ayaṃ kho me attā. So kho pana me ayaṃ attā imehi saṅkhārehi saṅkhāravā’’ti. Saṅkhāravantaṃ attānaṃ samanupassati. Seyyathāpi rukkho chāyāsampanno assa. Tamenaṃ puriso evaṃ vadeyya – ‘‘ayaṃ rukkho, ayaṃ chāyā. Añño rukkho, aññā chāyā. So kho panāyaṃ rukkho imāya chāyāya chāyāvā’’ti. Chāyāvantaṃ rukkhaṃ samanupassati. Evameva idhekacco viññāṇaṃ… rūpaṃ… vedanaṃ… saññaṃ attato samanupassati. Tassa evaṃ hoti – ‘‘ayaṃ kho me attā. So kho pana me ayaṃ attā. Imehi saṅkhārehi saṅkhāravā’’ti. Saṅkhāravantaṃ attānaṃ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ dutiyā saṅkhāravatthukā attānudiṭṭhi. Attānudiṭṭhi micchādiṭṭhi…pe… imāni saññojanāni, na ca diṭṭhiyo. Evaṃ saṅkhāravantaṃ attānaṃ samanupassati.

கத²ங் அத்தனி ஸங்கா²ரே ஸமனுபஸ்ஸதி? இதே⁴கச்சோ விஞ்ஞாணங்… ரூபங்… வேத³னங்… ஸஞ்ஞங் அத்ததோ ஸமனுபஸ்ஸதி. தஸ்ஸ ஏவங் ஹோதி – ‘‘அயங் கோ² மே அத்தா. இமஸ்மிஞ்ச பன அத்தனி இமே ஸங்கா²ரா’’தி. அத்தனி ஸங்கா²ரே ஸமனுபஸ்ஸதி. ஸெய்யதா²பி புப்ப²ங் க³ந்த⁴ஸம்பன்னங் அஸ்ஸ. தமேனங் புரிஸோ ஏவங் வதெ³ய்ய – ‘‘இத³ங் புப்ப²ங், அயங் க³ந்தோ⁴; அஞ்ஞங் புப்ப²ங், அஞ்ஞோ க³ந்தோ⁴. ஸோ கோ² பனாயங் க³ந்தோ⁴ இமஸ்மிங் புப்பே²’’தி. புப்ப²ஸ்மிங் க³ந்த⁴ங் ஸமனுபஸ்ஸதி. ஏவமேவங் இதே⁴கச்சோ விஞ்ஞாணங்… ரூபங்… வேத³னங்… ஸஞ்ஞங் அத்ததோ ஸமனுபஸ்ஸதி. தஸ்ஸ ஏவங் ஹோதி – ‘‘அயங் கோ² மே அத்தா. இமஸ்மிஞ்ச பன அத்தனி இமே ஸங்கா²ரா’’தி. அத்தனி ஸங்கா²ரே ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞங் வத்து². யா ச தி³ட்டி² யஞ்ச வத்து² – அயங் ததியா ஸங்கா²ரவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி²…பே॰… இமானி ஸஞ்ஞோஜனானி, ந ச தி³ட்டி²யோ. ஏவங் அத்தனி ஸங்கா²ரே ஸமனுபஸ்ஸதி.

Kathaṃ attani saṅkhāre samanupassati? Idhekacco viññāṇaṃ… rūpaṃ… vedanaṃ… saññaṃ attato samanupassati. Tassa evaṃ hoti – ‘‘ayaṃ kho me attā. Imasmiñca pana attani ime saṅkhārā’’ti. Attani saṅkhāre samanupassati. Seyyathāpi pupphaṃ gandhasampannaṃ assa. Tamenaṃ puriso evaṃ vadeyya – ‘‘idaṃ pupphaṃ, ayaṃ gandho; aññaṃ pupphaṃ, añño gandho. So kho panāyaṃ gandho imasmiṃ pupphe’’ti. Pupphasmiṃ gandhaṃ samanupassati. Evamevaṃ idhekacco viññāṇaṃ… rūpaṃ… vedanaṃ… saññaṃ attato samanupassati. Tassa evaṃ hoti – ‘‘ayaṃ kho me attā. Imasmiñca pana attani ime saṅkhārā’’ti. Attani saṅkhāre samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ tatiyā saṅkhāravatthukā attānudiṭṭhi. Attānudiṭṭhi micchādiṭṭhi…pe… imāni saññojanāni, na ca diṭṭhiyo. Evaṃ attani saṅkhāre samanupassati.

கத²ங் ஸங்கா²ரேஸு அத்தானங் ஸமனுபஸ்ஸதி? இதே⁴கச்சோ விஞ்ஞாணங்… ரூபங்… வேத³னங்… ஸஞ்ஞங் அத்ததோ ஸமனுபஸ்ஸதி. தஸ்ஸ ஏவங் ஹோதி – ‘‘அயங் கோ² மே அத்தா. ஸோ கோ² பன மே அயங் அத்தா இமேஸு ஸங்கா²ரேஸூ’’தி. ஸங்கா²ரேஸு அத்தானங் ஸமனுபஸ்ஸதி. ஸெய்யதா²பி மணி கரண்ட³கே பக்கி²த்தோ அஸ்ஸ. தமேனங் புரிஸோ ஏவங் வதெ³ய்ய – ‘‘அயங் மணி, அயங் கரண்ட³கோ. அஞ்ஞோ மணி, அஞ்ஞோ கரண்ட³கோ. ஸோ கோ² பனாயங் மணி இமஸ்மிங் கரண்ட³கே’’தி. கரண்ட³கஸ்மிங் மணிங் ஸமனுபஸ்ஸதி. ஏவமேவ இதே⁴கச்சோ விஞ்ஞாணங்… ரூபங்… வேத³னங்… ஸஞ்ஞங் அத்ததோ ஸமனுபஸ்ஸதி. தஸ்ஸ ஏவங் ஹோதி – ‘‘அயங் கோ² மே அத்தா. ஸோ கோ² பன மே அயங் அத்தா இமேஸு ஸங்கா²ரேஸூ’’தி. ஸங்கா²ரேஸு அத்தானங் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞங் வத்து². யா ச தி³ட்டி² யஞ்ச வத்து² – அயங் சதுத்தா² ஸங்கா²ரவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி²…பே॰… இமானி ஸஞ்ஞோஜனானி, ந ச தி³ட்டி²யோ. ஏவங் ஸங்கா²ரேஸு அத்தானங் ஸமனுபஸ்ஸதி.

Kathaṃ saṅkhāresu attānaṃ samanupassati? Idhekacco viññāṇaṃ… rūpaṃ… vedanaṃ… saññaṃ attato samanupassati. Tassa evaṃ hoti – ‘‘ayaṃ kho me attā. So kho pana me ayaṃ attā imesu saṅkhāresū’’ti. Saṅkhāresu attānaṃ samanupassati. Seyyathāpi maṇi karaṇḍake pakkhitto assa. Tamenaṃ puriso evaṃ vadeyya – ‘‘ayaṃ maṇi, ayaṃ karaṇḍako. Añño maṇi, añño karaṇḍako. So kho panāyaṃ maṇi imasmiṃ karaṇḍake’’ti. Karaṇḍakasmiṃ maṇiṃ samanupassati. Evameva idhekacco viññāṇaṃ… rūpaṃ… vedanaṃ… saññaṃ attato samanupassati. Tassa evaṃ hoti – ‘‘ayaṃ kho me attā. So kho pana me ayaṃ attā imesu saṅkhāresū’’ti. Saṅkhāresu attānaṃ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ catutthā saṅkhāravatthukā attānudiṭṭhi. Attānudiṭṭhi micchādiṭṭhi…pe… imāni saññojanāni, na ca diṭṭhiyo. Evaṃ saṅkhāresu attānaṃ samanupassati.

135. கத²ங் விஞ்ஞாணங் அத்ததோ ஸமனுபஸ்ஸதி? இதே⁴கச்சோ சக்கு²விஞ்ஞாணங்… ஸோதவிஞ்ஞாணங்… கா⁴னவிஞ்ஞாணங்… ஜிவ்ஹாவிஞ்ஞாணங் காயவிஞ்ஞாணங்… மனோவிஞ்ஞாணங் அத்ததோ ஸமனுபஸ்ஸதி. ‘‘யங் மனோவிஞ்ஞாணங், ஸோ அஹங்; யோ அஹங், தங் மனோவிஞ்ஞாண’’ந்தி – மனோவிஞ்ஞாணஞ்ச அத்தஞ்ச அத்³வயங் ஸமனுபஸ்ஸதி. ஸெய்யதா²பி தேலப்பதீ³பஸ்ஸ ஜா²யதோ ‘‘யா அச்சி ஸோ வண்ணோ, யோ வண்ணோ ஸா அச்சீ’’தி – அச்சிஞ்ச வண்ணஞ்ச அத்³வயங் ஸமனுபஸ்ஸதி. ஏவமேவங் இதே⁴கச்சோ மனோவிஞ்ஞாணங் அத்ததோ ஸமனுபஸ்ஸதி . ‘‘யங் மனோவிஞ்ஞாணங், ஸோ அஹங்; யோ அஹங் தங் மனோவிஞ்ஞாண’’ந்தி – மனோவிஞ்ஞாணஞ்ச அத்தஞ்ச அத்³வயங் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞங் வத்து². யா ச தி³ட்டி² யஞ்ச வத்து² – அயங் பட²மா விஞ்ஞாணவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி²…பே॰… இமானி ஸஞ்ஞோஜனானி, ந ச தி³ட்டி²யோ. ஏவங் விஞ்ஞாணங் அத்ததோ ஸமனுபஸ்ஸதி.

135. Kathaṃ viññāṇaṃ attato samanupassati? Idhekacco cakkhuviññāṇaṃ… sotaviññāṇaṃ… ghānaviññāṇaṃ… jivhāviññāṇaṃ kāyaviññāṇaṃ… manoviññāṇaṃ attato samanupassati. ‘‘Yaṃ manoviññāṇaṃ, so ahaṃ; yo ahaṃ, taṃ manoviññāṇa’’nti – manoviññāṇañca attañca advayaṃ samanupassati. Seyyathāpi telappadīpassa jhāyato ‘‘yā acci so vaṇṇo, yo vaṇṇo sā accī’’ti – acciñca vaṇṇañca advayaṃ samanupassati. Evamevaṃ idhekacco manoviññāṇaṃ attato samanupassati . ‘‘Yaṃ manoviññāṇaṃ, so ahaṃ; yo ahaṃ taṃ manoviññāṇa’’nti – manoviññāṇañca attañca advayaṃ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ paṭhamā viññāṇavatthukā attānudiṭṭhi. Attānudiṭṭhi micchādiṭṭhi…pe… imāni saññojanāni, na ca diṭṭhiyo. Evaṃ viññāṇaṃ attato samanupassati.

கத²ங் விஞ்ஞாணவந்தங் அத்தானங் ஸமனுபஸ்ஸதி? இதே⁴கச்சோ ரூபங்… வேத³னங்… ஸஞ்ஞங்… ஸங்கா²ரே அத்ததோ ஸமனுபஸ்ஸதி. தஸ்ஸ ஏவங் ஹோதி – ‘‘அயங் கோ² மே அத்தா. ஸோ கோ² பன மே அயங் அத்தா இமினா விஞ்ஞாணேன விஞ்ஞாணவா’’தி. விஞ்ஞாணவந்தங் அத்தானங் ஸமனுபஸ்ஸதி. ஸெய்யதா²பி ருக்கோ² சா²யாஸம்பன்னோ அஸ்ஸ. தமேனங் புரிஸோ ஏவங் வதெ³ய்ய – ‘‘அயங் ருக்கோ², அயங் சா²யா. அஞ்ஞோ ருக்கோ², அஞ்ஞா சா²யா. ஸோ கோ² பனாயங் ருக்கோ² இமாய சா²யாய சா²யாவா’’தி. சா²யாவந்தங் ருக்க²ங் ஸமனுபஸ்ஸதி. ஏவமேவங் இதே⁴கச்சோ ரூபங்… வேத³னங்… ஸஞ்ஞங்… ஸங்கா²ரே அத்ததோ ஸமனுபஸ்ஸதி. தஸ்ஸ ஏவங் ஹோதி – ‘‘அயங் கோ² மே அத்தா. ஸோ கோ² பன மே அயங் அத்தா இமினா விஞ்ஞாணேன விஞ்ஞாணவா’’தி. விஞ்ஞாணவந்தங் அத்தானங் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞங் வத்து². யா ச தி³ட்டி² யஞ்ச வத்து² – அயங் து³தியா விஞ்ஞாணவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி²…பே॰… இமானி ஸஞ்ஞோஜனானி, ந ச தி³ட்டி²யோ. ஏவங் விஞ்ஞாணவந்தங் அத்தானங் ஸமனுபஸ்ஸதி.

Kathaṃ viññāṇavantaṃ attānaṃ samanupassati? Idhekacco rūpaṃ… vedanaṃ… saññaṃ… saṅkhāre attato samanupassati. Tassa evaṃ hoti – ‘‘ayaṃ kho me attā. So kho pana me ayaṃ attā iminā viññāṇena viññāṇavā’’ti. Viññāṇavantaṃ attānaṃ samanupassati. Seyyathāpi rukkho chāyāsampanno assa. Tamenaṃ puriso evaṃ vadeyya – ‘‘ayaṃ rukkho, ayaṃ chāyā. Añño rukkho, aññā chāyā. So kho panāyaṃ rukkho imāya chāyāya chāyāvā’’ti. Chāyāvantaṃ rukkhaṃ samanupassati. Evamevaṃ idhekacco rūpaṃ… vedanaṃ… saññaṃ… saṅkhāre attato samanupassati. Tassa evaṃ hoti – ‘‘ayaṃ kho me attā. So kho pana me ayaṃ attā iminā viññāṇena viññāṇavā’’ti. Viññāṇavantaṃ attānaṃ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ dutiyā viññāṇavatthukā attānudiṭṭhi. Attānudiṭṭhi micchādiṭṭhi…pe… imāni saññojanāni, na ca diṭṭhiyo. Evaṃ viññāṇavantaṃ attānaṃ samanupassati.

கத²ங் அத்தனி விஞ்ஞாணங் ஸமனுபஸ்ஸதி? இதே⁴கச்சோ ரூபங்… வேத³னங்… ஸஞ்ஞங்… ஸங்கா²ரே அத்ததோ ஸமனுபஸ்ஸதி. தஸ்ஸ ஏவங் ஹோதி – ‘‘அயங் கோ² மே அத்தா . இமஸ்மிஞ்ச பன அத்தனி இத³ங் விஞ்ஞாண’’ந்தி. அத்தனி விஞ்ஞாணங் ஸமனுபஸ்ஸதி. ஸெய்யதா²பி புப்ப²ங் க³ந்த⁴ஸம்பன்னங் அஸ்ஸ. தமேனங் புரிஸோ ஏவங் வதெ³ய்ய – ‘‘இத³ங் புப்ப²ங், அயங் க³ந்தோ⁴; அஞ்ஞங் புப்ப²ங், அஞ்ஞோ க³ந்தோ⁴. ஸோ கோ² பனாயங் க³ந்தோ⁴ இமஸ்மிங் புப்பே²’’தி. புப்ப²ஸ்மிங் க³ந்த⁴ங் ஸமனுபஸ்ஸதி. ஏவமேவங் இதே⁴கச்சோ ரூபங்… வேத³னங்… ஸஞ்ஞங்… ஸங்கா²ரே அத்ததோ ஸமனுபஸ்ஸதி. தஸ்ஸ ஏவங் ஹோதி – ‘‘அயங் கோ² மே அத்தா. இமஸ்மிஞ்ச பன அத்தனி இத³ங் விஞ்ஞாண’’ந்தி. அத்தனி விஞ்ஞாணங் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞங் வத்து². யா ச தி³ட்டி² யஞ்ச வத்து² – அயங் ததியா விஞ்ஞாணவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி²…பே॰… இமானி ஸஞ்ஞோஜனானி, ந ச தி³ட்டி²யோ. ஏவங் அத்தனி விஞ்ஞாணங் ஸமனுபஸ்ஸதி.

Kathaṃ attani viññāṇaṃ samanupassati? Idhekacco rūpaṃ… vedanaṃ… saññaṃ… saṅkhāre attato samanupassati. Tassa evaṃ hoti – ‘‘ayaṃ kho me attā . Imasmiñca pana attani idaṃ viññāṇa’’nti. Attani viññāṇaṃ samanupassati. Seyyathāpi pupphaṃ gandhasampannaṃ assa. Tamenaṃ puriso evaṃ vadeyya – ‘‘idaṃ pupphaṃ, ayaṃ gandho; aññaṃ pupphaṃ, añño gandho. So kho panāyaṃ gandho imasmiṃ pupphe’’ti. Pupphasmiṃ gandhaṃ samanupassati. Evamevaṃ idhekacco rūpaṃ… vedanaṃ… saññaṃ… saṅkhāre attato samanupassati. Tassa evaṃ hoti – ‘‘ayaṃ kho me attā. Imasmiñca pana attani idaṃ viññāṇa’’nti. Attani viññāṇaṃ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ tatiyā viññāṇavatthukā attānudiṭṭhi. Attānudiṭṭhi micchādiṭṭhi…pe… imāni saññojanāni, na ca diṭṭhiyo. Evaṃ attani viññāṇaṃ samanupassati.

கத²ங் விஞ்ஞாணஸ்மிங் அத்தானங் ஸமனுபஸ்ஸதி? இதே⁴கச்சோ ரூபங்… வேத³னங்… ஸஞ்ஞங்… ஸங்கா²ரே அத்ததோ ஸமனுபஸ்ஸதி. தஸ்ஸ ஏவங் ஹோதி – ‘‘அயங் கோ² மே அத்தா. ஸோ கோ² பன மே அயங் அத்தா இமஸ்மிங் விஞ்ஞாணே’’தி. விஞ்ஞாணஸ்மிங் அத்தானங் ஸமனுபஸ்ஸதி. ஸெய்யதா²பி மணி கரண்ட³கே பக்கி²த்தோ அஸ்ஸ. தமேனங் புரிஸோ ஏவங் வதெ³ய்ய – ‘‘அயங் மணி, அயங் கரண்ட³கோ. அஞ்ஞோ மணி, அஞ்ஞோ கரண்ட³கோ. ஸோ கோ² பனாயங் மணி இமஸ்மிங் கரண்ட³கே’’தி. கரண்ட³கஸ்மிங் மணிங் ஸமனுபஸ்ஸதி. ஏவமேவங் இதே⁴கச்சோ ரூபங்… வேத³னங்… ஸஞ்ஞங்… ஸங்கா²ரே அத்ததோ ஸமனுபஸ்ஸதி. தஸ்ஸ ஏவங் ஹோதி – ‘‘அயங் கோ² மே அத்தா. ஸோ கோ² பன மே அயங் அத்தா இமஸ்மிங் விஞ்ஞாணே’’தி. விஞ்ஞாணஸ்மிங் அத்தானங் ஸமனுபஸ்ஸதி. அபி⁴னிவேஸபராமாஸோ தி³ட்டி². தி³ட்டி² ந வத்து², வத்து² ந தி³ட்டி². அஞ்ஞா தி³ட்டி², அஞ்ஞங் வத்து². யா ச தி³ட்டி² யஞ்ச வத்து² – அயங் சதுத்தா² விஞ்ஞாணவத்து²கா அத்தானுதி³ட்டி². அத்தானுதி³ட்டி² மிச்சா²தி³ட்டி²…பே॰… இமானி ஸஞ்ஞோஜனானி, ந ச தி³ட்டி²யோ. ஏவங் விஞ்ஞாணஸ்மிங் அத்தானங் ஸமனுபஸ்ஸதி. அத்தானுதி³ட்டி²யா இமேஹி வீஸதியா ஆகாரேஹி அபி⁴னிவேஸோ ஹோதி.

Kathaṃ viññāṇasmiṃ attānaṃ samanupassati? Idhekacco rūpaṃ… vedanaṃ… saññaṃ… saṅkhāre attato samanupassati. Tassa evaṃ hoti – ‘‘ayaṃ kho me attā. So kho pana me ayaṃ attā imasmiṃ viññāṇe’’ti. Viññāṇasmiṃ attānaṃ samanupassati. Seyyathāpi maṇi karaṇḍake pakkhitto assa. Tamenaṃ puriso evaṃ vadeyya – ‘‘ayaṃ maṇi, ayaṃ karaṇḍako. Añño maṇi, añño karaṇḍako. So kho panāyaṃ maṇi imasmiṃ karaṇḍake’’ti. Karaṇḍakasmiṃ maṇiṃ samanupassati. Evamevaṃ idhekacco rūpaṃ… vedanaṃ… saññaṃ… saṅkhāre attato samanupassati. Tassa evaṃ hoti – ‘‘ayaṃ kho me attā. So kho pana me ayaṃ attā imasmiṃ viññāṇe’’ti. Viññāṇasmiṃ attānaṃ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ catutthā viññāṇavatthukā attānudiṭṭhi. Attānudiṭṭhi micchādiṭṭhi…pe… imāni saññojanāni, na ca diṭṭhiyo. Evaṃ viññāṇasmiṃ attānaṃ samanupassati. Attānudiṭṭhiyā imehi vīsatiyā ākārehi abhiniveso hoti.

அத்தானுதி³ட்டி²னித்³தே³ஸோ து³தியோ.

Attānudiṭṭhiniddeso dutiyo.

Next: 3. மிச்சா²தி³ட்டி²னித்³தே³ஸோ • 3. Micchādiṭṭhiniddeso

Related texts:

அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā / 2. அத்தானுதி³ட்டி²னித்³தே³ஸவண்ணனா • 2. Attānudiṭṭhiniddesavaṇṇanā

© 1991-2026 Titi Tudorancea Yoga Bulletin | Titi Tudorancea^® is a Registered Trademark | Terms of use and privacy policy
Contact