| Library / Tipiṭaka / តិបិដក • Tipiṭaka / សារត្ថទីបនី-ដីកា • Sāratthadīpanī-ṭīkā |
៤. បវារណក្ខន្ធកំ
4. Pavāraṇakkhandhakaṃ
អផាសុកវិហារកថាវណ្ណនា
Aphāsukavihārakathāvaṇṇanā
២០៩. បវារណក្ខន្ធកេ អាទិតោ លាបោ អាលាបោ, វចនបដិវចនវសេន សមំ លាបោ សល្លាបោ។ បិណ្ឌាយ បដិក្កមេយ្យាតិ គាមេ បិណ្ឌាយ ចរិត្វា បច្ចាគច្ឆេយ្យ។ អវក្ការបាតិំ ធោវិត្វា ឧបដ្ឋាបេយ្យាតិ អតិរេកបិណ្ឌបាតំ អបនេត្វា ឋបនត្ថាយ ឯកំ សមុគ្គបាតិំ ធោវិត្វា ឋបេយ្យ។ សមុគ្គបាតិ នាម សមុគ្គបុដសទិសា បាតិ។ អប្បហរិតេតិ អបរូឡ្ហហរិតេ, យស្មិំ ឋានេ បិណ្ឌបាតជ្ឈោត្ថរណេន វិនស្សនធម្មានិ តិណានិ នត្ថិ, តស្មិន្តិ អត្ថោ។ តេន និត្តិណញ្ច មហាតិណគហនញ្ច យត្ថ សកដេនបិ ឆឌ្ឌិតេ បិណ្ឌបាតេ តិណានិ ន វិនស្សន្តិ, តញ្ច ឋានំ បរិគ្គហិតំ ហោតិ។ ភូតគាមសិក្ខាបទស្ស ហិ អវិកោបនត្ថមេតំ វុត្តំ។ អប្បាណកេតិ និប្បាណកេ, បិណ្ឌបាតជ្ឈោត្ថរណេន មរិតព្ពបាណករហិតេ វា មហាឧទកក្ខន្ធេ។ បរិត្តោទកេ ឯវ ហិ ភត្តបក្ខេបេន អាលុឡិតេ សុខុមបាណកា មរន្តិ, ន មហាតឡាកាទីសូតិ។ បាណកានុរក្ខណត្ថញ្ហិ ឯតំ វុត្តំ។ ឱបិលាបេយ្យាតិ និមុជ្ជាបេយ្យ។
209. Pavāraṇakkhandhake ādito lāpo ālāpo, vacanapaṭivacanavasena samaṃ lāpo sallāpo. Piṇḍāya paṭikkameyyāti gāme piṇḍāya caritvā paccāgaccheyya. Avakkārapātiṃ dhovitvā upaṭṭhāpeyyāti atirekapiṇḍapātaṃ apanetvā ṭhapanatthāya ekaṃ samuggapātiṃ dhovitvā ṭhapeyya. Samuggapāti nāma samuggapuṭasadisā pāti. Appahariteti aparūḷhaharite, yasmiṃ ṭhāne piṇḍapātajjhottharaṇena vinassanadhammāni tiṇāni natthi, tasminti attho. Tena nittiṇañca mahātiṇagahanañca yattha sakaṭenapi chaḍḍite piṇḍapāte tiṇāni na vinassanti, tañca ṭhānaṃ pariggahitaṃ hoti. Bhūtagāmasikkhāpadassa hi avikopanatthametaṃ vuttaṃ. Appāṇaketi nippāṇake, piṇḍapātajjhottharaṇena maritabbapāṇakarahite vā mahāudakakkhandhe. Parittodake eva hi bhattapakkhepena āluḷite sukhumapāṇakā maranti, na mahātaḷākādīsūti. Pāṇakānurakkhaṇatthañhi etaṃ vuttaṃ. Opilāpeyyāti nimujjāpeyya.
វច្ចឃដន្តិ អាចមនកុម្ភី។ រិត្តន្តិ រិត្តកំ។ តុច្ឆន្តិ តស្សេវ វេវចនំ។ អវិសយ្ហន្តិ ឧក្ខិបិតុំ អសក្កុណេយ្យំ អតិភារិកំ។ ហត្ថវិការេនាតិ ហត្ថសញ្ញាយ។ ហត្ថេហិ ឧក្ខិបនំ ហត្ថវិលង្ឃនំ។ តេនាហ ‘‘ហត្ថុក្ខេបកេនា’’តិ។ អថ វា វិលង្ឃេតិ ទេសន្តរំ បាបេតិ ឯតេនាតិ វិលង្ឃកោ, ហត្ថោ ឯវ វិលង្ឃកោ ហត្ថវិលង្ឃកោ, តេន ហត្ថវិលង្ឃកេន, អញ្ញមញ្ញំ សំសិព្ពិតហត្ថេនាតិ វុត្តំ ហោតិ។ ទ្វេ ហិ ជនា ហត្ថេន ហត្ថំ សំសិព្ពេត្វា ទ្វីសុ ហត្ថេសុ ឋបេត្វា ឧដ្ឋបេន្តា ហត្ថវិលង្ឃកេន ឧដ្ឋបេន្តិ នាម។ តិត្ថិយសមាទានន្តិ តិត្ថិយេហិ សមាទាតព្ពំ។
Vaccaghaṭanti ācamanakumbhī. Rittanti rittakaṃ. Tucchanti tasseva vevacanaṃ. Avisayhanti ukkhipituṃ asakkuṇeyyaṃ atibhārikaṃ. Hatthavikārenāti hatthasaññāya. Hatthehi ukkhipanaṃ hatthavilaṅghanaṃ. Tenāha ‘‘hatthukkhepakenā’’ti. Atha vā vilaṅgheti desantaraṃ pāpeti etenāti vilaṅghako, hattho eva vilaṅghako hatthavilaṅghako, tena hatthavilaṅghakena, aññamaññaṃ saṃsibbitahatthenāti vuttaṃ hoti. Dve hi janā hatthena hatthaṃ saṃsibbetvā dvīsu hatthesu ṭhapetvā uṭṭhapentā hatthavilaṅghakena uṭṭhapenti nāma. Titthiyasamādānanti titthiyehi samādātabbaṃ.
អផាសុកវិហារកថាវណ្ណនា និដ្ឋិតា។
Aphāsukavihārakathāvaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវគ្គបាឡិ • Mahāvaggapāḷi / ១២០. អផាសុកវិហារោ • 120. Aphāsukavihāro
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវគ្គ-អដ្ឋកថា • Mahāvagga-aṭṭhakathā / អផាសុកវិហារកថា • Aphāsukavihārakathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / អផាសុវិហារកថាទិវណ្ណនា • Aphāsuvihārakathādivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ១២០. អផាសុកវិហារកថា • 120. Aphāsukavihārakathā
