| Library / Tipiṭaka / តិបិដក • Tipiṭaka / ថេរីគាថា-អដ្ឋកថា • Therīgāthā-aṭṭhakathā |
៥. បញ្ចកនិបាតោ
5. Pañcakanipāto
១. អញ្ញតរាថេរីគាថាវណ្ណនា
1. Aññatarātherīgāthāvaṇṇanā
បញ្ចកនិបាតេ បណ្ណវីសតិ វស្សានីតិអាទិកា អញ្ញតរាយ ថេរិយា គាថា។ អយម្បិ បុរិមពុទ្ធេសុ កតាធិការា តត្ថ តត្ថ ភវេ វិវដ្ដូបនិស្សយំ កុសលំ ឧបចិនន្តី ឥមស្មិំ ពុទ្ធុប្បាទេ ទេវទហនគរេ មហាបជាបតិគោតមិយា ធាតី ហុត្វា វឌ្ឍេសិ។ នាមគោត្តតោ បន អបញ្ញាតា អហោសិ។ សា មហាបជាបតិគោតមិយា បព្ពជិតកាលេ សយម្បិ បព្ពជិត្វា បញ្ចវីសតិ សំវច្ឆរានិ កាមរាគេន ឧបទ្ទុតា អច្ឆរាសង្ឃាតមត្តម្បិ កាលំ ចិត្តេកគ្គតំ អលភន្តី ពាហា បគ្គយ្ហ កន្ទមានា ធម្មទិន្នាថេរិយា សន្តិកេ ធម្មំ សុត្វា កាមេហិ វិនិវត្តិតមានសា កម្មដ្ឋានំ គហេត្វា ភាវនមនុយញ្ជន្តី ន ចិរស្សេវ ឆឡភិញ្ញា ហុត្វា អត្តនោ បដិបត្តិំ បច្ចវេក្ខិត្វា ឧទានវសេន –
Pañcakanipāte paṇṇavīsati vassānītiādikā aññatarāya theriyā gāthā. Ayampi purimabuddhesu katādhikārā tattha tattha bhave vivaṭṭūpanissayaṃ kusalaṃ upacinantī imasmiṃ buddhuppāde devadahanagare mahāpajāpatigotamiyā dhātī hutvā vaḍḍhesi. Nāmagottato pana apaññātā ahosi. Sā mahāpajāpatigotamiyā pabbajitakāle sayampi pabbajitvā pañcavīsati saṃvaccharāni kāmarāgena upaddutā accharāsaṅghātamattampi kālaṃ cittekaggataṃ alabhantī bāhā paggayha kandamānā dhammadinnātheriyā santike dhammaṃ sutvā kāmehi vinivattitamānasā kammaṭṭhānaṃ gahetvā bhāvanamanuyañjantī na cirasseva chaḷabhiññā hutvā attano paṭipattiṃ paccavekkhitvā udānavasena –
៦៧.
67.
‘‘បណ្ណវីសតិ វស្សានិ, យតោ បព្ពជិតា អហំ;
‘‘Paṇṇavīsati vassāni, yato pabbajitā ahaṃ;
នាច្ឆរាសង្ឃាតមត្តម្បិ, ចិត្តស្សូបសមជ្ឈគំ។
Nāccharāsaṅghātamattampi, cittassūpasamajjhagaṃ.
៦៨.
68.
‘‘អលទ្ធា ចេតសោ សន្តិំ, កាមរាគេនវស្សុតា;
‘‘Aladdhā cetaso santiṃ, kāmarāgenavassutā;
ពាហា បគ្គយ្ហ កន្ទន្តី, វិហារំ បាវិសិំ អហំ។
Bāhā paggayha kandantī, vihāraṃ pāvisiṃ ahaṃ.
៦៩.
69.
‘‘សា ភិក្ខុនិំ ឧបាគច្ឆិំ, យា មេ សទ្ធាយិកា អហុ;
‘‘Sā bhikkhuniṃ upāgacchiṃ, yā me saddhāyikā ahu;
សា មេ ធម្មមទេសេសិ, ខន្ធាយតនធាតុយោ។
Sā me dhammamadesesi, khandhāyatanadhātuyo.
៧០.
70.
‘‘តស្សា ធម្មំ សុណិត្វាន, ឯកមន្តេ ឧបាវិសិំ;
‘‘Tassā dhammaṃ suṇitvāna, ekamante upāvisiṃ;
បុព្ពេនិវាសំ ជានាមិ, ទិព្ពចក្ខុ វិសោធិតំ។
Pubbenivāsaṃ jānāmi, dibbacakkhu visodhitaṃ.
៧១.
71.
‘‘ចេតោបរិច្ចញាណញ្ច , សោតធាតុ វិសោធិតា;
‘‘Cetopariccañāṇañca , sotadhātu visodhitā;
ឥទ្ធីបិ មេ សច្ឆិកតា, បត្តោ មេ អាសវក្ខយោ;
Iddhīpi me sacchikatā, patto me āsavakkhayo;
ឆឡភិញ្ញា សច្ឆិកតា, កតំ ពុទ្ធស្ស សាសន’’ន្តិ។ –
Chaḷabhiññā sacchikatā, kataṃ buddhassa sāsana’’nti. –
ឥមា គាថា អភាសិ។
Imā gāthā abhāsi.
តត្ថ នាច្ឆរាសង្ឃាតមត្តម្បីតិ អច្ឆរាឃដិតមត្តម្បិ ខណំ អង្គុលិផោដនមត្តម្បិ កាលន្តិ អត្ថោ។ ចិត្តស្សូបសមជ្ឈគន្តិ ចិត្តស្ស ឧបសមំ ចិត្តេកគ្គំ ន អជ្ឈគន្តិ យោជនា, ន បដិលភិន្តិ អត្ថោ។
Tattha nāccharāsaṅghātamattampīti accharāghaṭitamattampi khaṇaṃ aṅguliphoṭanamattampi kālanti attho. Cittassūpasamajjhaganti cittassa upasamaṃ cittekaggaṃ na ajjhaganti yojanā, na paṭilabhinti attho.
កាមរាគេនវស្សុតាតិ កាមគុណសង្ខាតេសុ វត្ថុកាមេសុ ទឡ្ហតរាភិនិវេសិតាយ ពហលេន ឆន្ទរាគេន តិន្តចិត្តា។
Kāmarāgenavassutāti kāmaguṇasaṅkhātesu vatthukāmesu daḷhatarābhinivesitāya bahalena chandarāgena tintacittā.
ភិក្ខុនិន្តិ ធម្មទិន្នត្ថេរិំ សន្ធាយ វទតិ។
Bhikkhuninti dhammadinnattheriṃ sandhāya vadati.
ចេតោបរិច្ចញាណញ្ចាតិ ចេតោបរិយញាណញ្ច វិសោធិតន្តិ សម្ពន្ធោ, អធិគតន្តិ អត្ថោ។ សេសំ វុត្តនយមេវ។
Cetopariccañāṇañcāti cetopariyañāṇañca visodhitanti sambandho, adhigatanti attho. Sesaṃ vuttanayameva.
អញ្ញតរាថេរីគាថាវណ្ណនា និដ្ឋិតា។
Aññatarātherīgāthāvaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / ថេរីគាថាបាឡិ • Therīgāthāpāḷi / ១. អញ្ញតរាថេរីគាថា • 1. Aññatarātherīgāthā
