| Library / Tipiṭaka / តិបិដក • Tipiṭaka / ថេរីគាថា-អដ្ឋកថា • Therīgāthā-aṭṭhakathā |
២. វិមលាថេរីគាថាវណ្ណនា
2. Vimalātherīgāthāvaṇṇanā
មត្តា វណ្ណេន រូបេនាតិអាទិកា វិមលាយ ថេរិយា គាថា។ អយម្បិ បុរិមពុទ្ធេសុ កតាធិការា តត្ថ តត្ថ ភវេ វិវដ្ដូបនិស្សយំ កុសលំ ឧបចិនិត្វា ឥមស្មិំ ពុទ្ធុប្បាទេ វេសាលិយំ អញ្ញតរាយ រូបូបជីវិនិយា ឥត្ថិយា ធីតា ហុត្វា និព្ពត្តិ។ វិមលាតិស្សា នាមំ អហោសិ។ សា វយប្បត្តា តថេវ ជីវិកំ កប្បេន្តី ឯកទិវសំ អាយស្មន្តំ មហាមោគ្គល្លានំ វេសាលិយំ បិណ្ឌាយ ចរន្តំ ទិស្វា បដិពទ្ធចិត្តា ហុត្វា ថេរស្ស វសនដ្ឋានំ គន្ត្វា ថេរំ ឧទ្ទិស្ស បលោភនកម្មំ កាតុំ អារភិ។ ‘‘តិត្ថិយេហិ ឧយ្យោជិតា តថា អកាសី’’តិ កេចិ វទន្តិ។ ថេរោ តស្សា អសុភវិភាវនមុខេន សន្តជ្ជនំ កត្វា ឱវាទមទាសិ។ តំ ហេដ្ឋា ថេរគាថាយ អាគតមេវ, តថា បន ថេរេន ឱវាទេ ទិន្នេ សា សំវេគជាតា ហិរោត្តប្បំ បច្ចុបដ្ឋបេត្វា សាសនេ បដិលទ្ធសទ្ធា ឧបាសិកា ហុត្វា អបរភាគេ ភិក្ខុនីសុ បព្ពជិត្វា ឃដេន្តី វាយមន្តី ហេតុសម្បន្នតាយ ន ចិរស្សេវ អរហត្តំ បត្វា អត្តនោ បដិបត្តិំ បច្ចវេក្ខិត្វា ឧទានវសេន –
Mattā vaṇṇena rūpenātiādikā vimalāya theriyā gāthā. Ayampi purimabuddhesu katādhikārā tattha tattha bhave vivaṭṭūpanissayaṃ kusalaṃ upacinitvā imasmiṃ buddhuppāde vesāliyaṃ aññatarāya rūpūpajīviniyā itthiyā dhītā hutvā nibbatti. Vimalātissā nāmaṃ ahosi. Sā vayappattā tatheva jīvikaṃ kappentī ekadivasaṃ āyasmantaṃ mahāmoggallānaṃ vesāliyaṃ piṇḍāya carantaṃ disvā paṭibaddhacittā hutvā therassa vasanaṭṭhānaṃ gantvā theraṃ uddissa palobhanakammaṃ kātuṃ ārabhi. ‘‘Titthiyehi uyyojitā tathā akāsī’’ti keci vadanti. Thero tassā asubhavibhāvanamukhena santajjanaṃ katvā ovādamadāsi. Taṃ heṭṭhā theragāthāya āgatameva, tathā pana therena ovāde dinne sā saṃvegajātā hirottappaṃ paccupaṭṭhapetvā sāsane paṭiladdhasaddhā upāsikā hutvā aparabhāge bhikkhunīsu pabbajitvā ghaṭentī vāyamantī hetusampannatāya na cirasseva arahattaṃ patvā attano paṭipattiṃ paccavekkhitvā udānavasena –
៧២.
72.
‘‘មត្តា វណ្ណេន រូបេន, សោភគ្គេន យសេន ច;
‘‘Mattā vaṇṇena rūpena, sobhaggena yasena ca;
យោព្ពនេន ចុបត្ថទ្ធា, អញ្ញាសមតិមញ្ញិហំ។
Yobbanena cupatthaddhā, aññāsamatimaññihaṃ.
៧៣.
73.
‘‘វិភូសេត្វា ឥមំ កាយំ, សុចិត្តំ ពាលលាបនំ;
‘‘Vibhūsetvā imaṃ kāyaṃ, sucittaṃ bālalāpanaṃ;
អដ្ឋាសិំ វេសិទ្វារម្ហិ, លុទ្ទោ បាសមិវោឌ្ឌិយ។
Aṭṭhāsiṃ vesidvāramhi, luddo pāsamivoḍḍiya.
៧៤.
74.
‘‘បិឡន្ធនំ វិទំសេន្តី, គុយ្ហំ បកាសិកំ ពហុំ;
‘‘Piḷandhanaṃ vidaṃsentī, guyhaṃ pakāsikaṃ bahuṃ;
អកាសិំ វិវិធំ មាយំ, ឧជ្ឈគ្ឃន្តី ពហុំ ជនំ។
Akāsiṃ vividhaṃ māyaṃ, ujjhagghantī bahuṃ janaṃ.
៧៥.
75.
‘‘សាជ្ជ បិណ្ឌំ ចរិត្វាន, មុណ្ឌា សង្ឃាដិបារុតា;
‘‘Sājja piṇḍaṃ caritvāna, muṇḍā saṅghāṭipārutā;
និសិន្នា រុក្ខមូលម្ហិ, អវិតក្កស្ស លាភិនី។
Nisinnā rukkhamūlamhi, avitakkassa lābhinī.
៧៦.
76.
‘‘សព្ពេ យោគា សមុច្ឆិន្នា, យេ ទិព្ពា យេ ច មានុសា;
‘‘Sabbe yogā samucchinnā, ye dibbā ye ca mānusā;
ខេបេត្វា អាសវេ សព្ពេ, សីតិភូតាម្ហិ និព្ពុតា’’តិ។ –
Khepetvā āsave sabbe, sītibhūtāmhi nibbutā’’ti. –
ឥមា គាថា អភាសិ។
Imā gāthā abhāsi.
តត្ថ មត្តា វណ្ណេន រូបេនាតិ គុណវណ្ណេន ចេវ រូបសម្បត្តិយា ច។ សោភគ្គេនាតិ សុភគភាវេន។ យសេនាតិ បរិវារសម្បត្តិយា។ មត្តា វណ្ណមទរូបមទសោភគ្គមទបរិវារមទវសេន មទំ អាបន្នាតិ អត្ថោ។ យោព្ពនេន ចុបត្ថទ្ធាតិ យោព្ពនមទេន ឧបរូបរិ ថទ្ធា យោព្ពននិមិត្តេន អហង្ការេន ឧបត្ថទ្ធចិត្តា អនុបសន្តមានសា។ អញ្ញាសមតិមញ្ញិហន្តិ អញ្ញា ឥត្ថិយោ អត្តនោ វណ្ណាទិគុណេហិ សព្ពថាបិ អតិក្កមិត្វា មញ្ញិំ អហំ។ អញ្ញាសំ វា ឥត្ថីនំ វណ្ណាទិគុណេ អតិមញ្ញិំ អតិក្កមិត្វា អមញ្ញិំ អវមានំ អកាសិំ។
Tattha mattā vaṇṇena rūpenāti guṇavaṇṇena ceva rūpasampattiyā ca. Sobhaggenāti subhagabhāvena. Yasenāti parivārasampattiyā. Mattā vaṇṇamadarūpamadasobhaggamadaparivāramadavasena madaṃ āpannāti attho. Yobbanena cupatthaddhāti yobbanamadena uparūpari thaddhā yobbananimittena ahaṅkārena upatthaddhacittā anupasantamānasā. Aññāsamatimaññihanti aññā itthiyo attano vaṇṇādiguṇehi sabbathāpi atikkamitvā maññiṃ ahaṃ. Aññāsaṃ vā itthīnaṃ vaṇṇādiguṇe atimaññiṃ atikkamitvā amaññiṃ avamānaṃ akāsiṃ.
វិភូសិត្វា ឥមំ កាយំ, សុចិត្តំ ពាលលាបនន្តិ ឥមំ នានាវិធអសុចិភរិតំ ជេគុច្ឆំ អហំ មមាតិ ពាលានំ លាបនតោ វាចនតោ ពាលលាបនំ មម កាយំ ឆវិរាគករណកេសដ្ឋបនាទិនា សុចិត្តំ វត្ថាភរណេហិ វិភូសិត្វា សុមណ្ឌិតបសាទិតំ កត្វា។ អដ្ឋាសិំ វេសិទ្វារម្ហិ, លុទ្ទោ បាសមិវោឌ្ឌិយាតិ មិគលុទ្ទោ វិយ មិគានំ ពន្ធនត្ថាយ ទណ្ឌវាកុរាទិមិគបាសំ, មារស្ស បាសភូតំ យថាវុត្តំ មម កាយំ វេសិទ្វារម្ហិ វេសិយា ឃរទ្វារេ ឱឌ្ឌិយិត្វា អដ្ឋាសិំ។
Vibhūsitvāimaṃ kāyaṃ, sucittaṃ bālalāpananti imaṃ nānāvidhaasucibharitaṃ jegucchaṃ ahaṃ mamāti bālānaṃ lāpanato vācanato bālalāpanaṃ mama kāyaṃ chavirāgakaraṇakesaṭṭhapanādinā sucittaṃ vatthābharaṇehi vibhūsitvā sumaṇḍitapasāditaṃ katvā. Aṭṭhāsiṃ vesidvāramhi, luddo pāsamivoḍḍiyāti migaluddo viya migānaṃ bandhanatthāya daṇḍavākurādimigapāsaṃ, mārassa pāsabhūtaṃ yathāvuttaṃ mama kāyaṃ vesidvāramhi vesiyā gharadvāre oḍḍiyitvā aṭṭhāsiṃ.
បិឡន្ធនំ វិទំសេន្តី, គុយ្ហំ បកាសិកំ ពហុន្តិ ឩរុជឃនថនទស្សនាទិកំ គុយ្ហញ្ចេវ បាទជាណុសិរាទិកំ បកាសញ្ចាតិ គុយ្ហំ បកាសិកញ្ច ពហុំ នានប្បការំ បិឡន្ធនំ អាភរណំ ទស្សេន្តី។ អកាសិំ វិវិធំ មាយំ, ឧជ្ឈគ្ឃន្តី ពហុំ ជនន្តិ យោព្ពនមទមត្តំ ពហុំ ពាលជនំ វិប្បលម្ភេតុំ ហសន្តី គន្ធមាលាវត្ថាភរណាទីហិ សរីរសភាវបដិច្ឆាទនេន ហសវិលាសភាវាទីហិ តេហិ ច វិវិធំ នានប្បការំ វញ្ចនំ អកាសិំ។
Piḷandhanaṃ vidaṃsentī, guyhaṃ pakāsikaṃ bahunti ūrujaghanathanadassanādikaṃ guyhañceva pādajāṇusirādikaṃ pakāsañcāti guyhaṃ pakāsikañca bahuṃ nānappakāraṃ piḷandhanaṃ ābharaṇaṃ dassentī. Akāsiṃ vividhaṃ māyaṃ, ujjhagghantī bahuṃjananti yobbanamadamattaṃ bahuṃ bālajanaṃ vippalambhetuṃ hasantī gandhamālāvatthābharaṇādīhi sarīrasabhāvapaṭicchādanena hasavilāsabhāvādīhi tehi ca vividhaṃ nānappakāraṃ vañcanaṃ akāsiṃ.
សាជ្ជ បិណ្ឌំ ចរិត្វាន…បេ.… អវិតក្កស្ស លាភិនីតិ សា អហំ ឯវំ បមាទវិហារិនី សមានា អជ្ជ ឥទានិ អយ្យស្ស មហាមោគ្គល្លានត្ថេរស្ស ឱវាទេ ឋត្វា សាសនេ បព្ពជិត្វា មុណ្ឌា សង្ឃាដិបារុតា ហុត្វា បិណ្ឌំ ចរិត្វាន ភិក្ខាហារំ ភុញ្ជិត្វា និសិន្នា រុក្ខមូលម្ហិ រុក្ខមូលេ វិវិត្តាសនេ និសិន្នា ទុតិយជ្ឈានបាទកស្ស អគ្គផលស្ស អធិគមេន អវិតក្កស្ស លាភិនី អម្ហីតិ យោជនា។
Sājja piṇḍaṃ caritvāna…pe… avitakkassa lābhinīti sā ahaṃ evaṃ pamādavihārinī samānā ajja idāni ayyassa mahāmoggallānattherassa ovāde ṭhatvā sāsane pabbajitvā muṇḍā saṅghāṭipārutā hutvā piṇḍaṃ caritvāna bhikkhāhāraṃ bhuñjitvā nisinnā rukkhamūlamhi rukkhamūle vivittāsane nisinnā dutiyajjhānapādakassa aggaphalassa adhigamena avitakkassa lābhinī amhīti yojanā.
សព្ពេ យោគាតិ កាមយោគាទយោ ចត្តារោបិ យោគា។ សមុច្ឆិន្នាតិ បឋមមគ្គាទិនា យថារហំ សម្មទេវ ឧច្ឆិន្នា បហីនា។ សេសំ វុត្តនយមេវ។
Sabbe yogāti kāmayogādayo cattāropi yogā. Samucchinnāti paṭhamamaggādinā yathārahaṃ sammadeva ucchinnā pahīnā. Sesaṃ vuttanayameva.
វិមលាថេរីគាថាវណ្ណនា និដ្ឋិតា។
Vimalātherīgāthāvaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / ថេរីគាថាបាឡិ • Therīgāthāpāḷi / ២. វិមលាថេរីគាថា • 2. Vimalātherīgāthā
