| Library / Tipiṭaka / তিপিটক • Tipiṭaka / সুত্তনিপাতপাল়ি • Suttanipātapāḷi |
২. আমগন্ধসুত্তং
2. Āmagandhasuttaṃ
২৪২.
242.
‘‘সামাকচিঙ্গূলকচীনকানি চ, পত্তপ্ফলং মূলফলং গৰিপ্ফলং।
‘‘Sāmākaciṅgūlakacīnakāni ca, pattapphalaṃ mūlaphalaṃ gavipphalaṃ;
ধম্মেন লদ্ধং সতমস্নমানা 1, ন কামকামা অলিকং ভণন্তি॥
Dhammena laddhaṃ satamasnamānā 2, na kāmakāmā alikaṃ bhaṇanti.
২৪৩.
243.
‘‘যদস্নমানো সুকতং সুনিট্ঠিতং, পরেহি দিন্নং পযতং পণীতং।
‘‘Yadasnamāno sukataṃ suniṭṭhitaṃ, parehi dinnaṃ payataṃ paṇītaṃ;
সালীনমন্নং পরিভুঞ্জমানো, সো ভুঞ্জসী কস্সপ আমগন্ধং॥
Sālīnamannaṃ paribhuñjamāno, so bhuñjasī kassapa āmagandhaṃ.
২৪৪.
244.
‘‘ন আমগন্ধো মম কপ্পতীতি, ইচ্চেৰ ত্ৰং ভাসসি ব্রহ্মবন্ধু।
‘‘Na āmagandho mama kappatīti, icceva tvaṃ bhāsasi brahmabandhu;
সালীনমন্নং পরিভুঞ্জমানো, সকুন্তমংসেহি সুসঙ্খতেহি।
Sālīnamannaṃ paribhuñjamāno, sakuntamaṃsehi susaṅkhatehi;
পুচ্ছামি তং কস্সপ এতমত্থং, কথং পকারো তৰ আমগন্ধো’’॥
Pucchāmi taṃ kassapa etamatthaṃ, kathaṃ pakāro tava āmagandho’’.
২৪৫.
245.
‘‘পাণাতিপাতো ৰধছেদবন্ধনং, থেয্যং মুসাৰাদো নিকতিৰঞ্চনানি চ।
‘‘Pāṇātipāto vadhachedabandhanaṃ, theyyaṃ musāvādo nikativañcanāni ca;
অজ্ঝেনকুত্তং 3 পরদারসেৰনা, এসামগন্ধো ন হি মংসভোজনং॥
Ajjhenakuttaṃ 4 paradārasevanā, esāmagandho na hi maṃsabhojanaṃ.
২৪৬.
246.
‘‘যে ইধ কামেসু অসঞ্ঞতা জনা, রসেসু গিদ্ধা অসুচিভাৰমস্সিতা 5।
‘‘Ye idha kāmesu asaññatā janā, rasesu giddhā asucibhāvamassitā 6;
নত্থিকদিট্ঠী ৰিসমা দুরন্নযা, এসামগন্ধো ন হি মংসভোজনং॥
Natthikadiṭṭhī visamā durannayā, esāmagandho na hi maṃsabhojanaṃ.
২৪৭.
247.
‘‘যে লূখসা দারুণা পিট্ঠিমংসিকা 7, মিত্তদ্দুনো নিক্করুণাতিমানিনো।
‘‘Ye lūkhasā dāruṇā piṭṭhimaṃsikā 8, mittadduno nikkaruṇātimānino;
অদানসীলা ন চ দেন্তি কস্সচি, এসামগন্ধো ন হি মংসভোজনং॥
Adānasīlā na ca denti kassaci, esāmagandho na hi maṃsabhojanaṃ.
২৪৮.
248.
‘‘কোধো মদো থম্ভো পচ্চুপট্ঠাপনা 9, মাযা উসূযা ভস্সসমুস্সযো চ।
‘‘Kodho mado thambho paccupaṭṭhāpanā 10, māyā usūyā bhassasamussayo ca;
মানাতিমানো চ অসব্ভি সন্থৰো, এসামগন্ধো ন হি মংসভোজনং॥
Mānātimāno ca asabbhi santhavo, esāmagandho na hi maṃsabhojanaṃ.
২৪৯.
249.
‘‘যে পাপসীলা ইণঘাতসূচকা, ৰোহারকূটা ইধ পাটিরূপিকা 11।
‘‘Ye pāpasīlā iṇaghātasūcakā, vohārakūṭā idha pāṭirūpikā 12;
নরাধমা যেধ করোন্তি কিব্বিসং, এসামগন্ধো ন হি মংসভোজনং॥
Narādhamā yedha karonti kibbisaṃ, esāmagandho na hi maṃsabhojanaṃ.
২৫০.
250.
‘‘যে ইধ পাণেসু অসঞ্ঞতা জনা, পরেসমাদায ৰিহেসমুয্যুতা।
‘‘Ye idha pāṇesu asaññatā janā, paresamādāya vihesamuyyutā;
দুস্সীললুদ্দা ফরুসা অনাদরা, এসামগন্ধো ন হি মংসভোজনং॥
Dussīlaluddā pharusā anādarā, esāmagandho na hi maṃsabhojanaṃ.
২৫১.
251.
‘‘এতেসু গিদ্ধা ৰিরুদ্ধাতিপাতিনো, নিচ্চুয্যুতা পেচ্চ তমং ৰজন্তি যে।
‘‘Etesu giddhā viruddhātipātino, niccuyyutā pecca tamaṃ vajanti ye;
পতন্তি সত্তা নিরযং অৰংসিরা, এসামগন্ধো ন হি মংসভোজনং॥
Patanti sattā nirayaṃ avaṃsirā, esāmagandho na hi maṃsabhojanaṃ.
২৫২.
252.
‘‘ন মচ্ছমংসানমনাসকত্তং 13, ন নগ্গিযং ন মুণ্ডিযং জটাজল্লং।
‘‘Na macchamaṃsānamanāsakattaṃ 14, na naggiyaṃ na muṇḍiyaṃ jaṭājallaṃ;
খরাজিনানি নাগ্গিহুত্তস্সুপসেৰনা, যে ৰাপি লোকে অমরা বহূ তপা।
Kharājināni nāggihuttassupasevanā, ye vāpi loke amarā bahū tapā;
মন্তাহুতী যঞ্ঞমুতূপসেৰনা, সোধেন্তি মচ্চং অৰিতিণ্ণকঙ্খং॥
Mantāhutī yaññamutūpasevanā, sodhenti maccaṃ avitiṇṇakaṅkhaṃ.
২৫৩.
253.
‘‘যো তেসু 15 গুত্তো ৰিদিতিন্দ্রিযো চরে, ধম্মে ঠিতো অজ্জৰমদ্দৰে রতো।
‘‘Yo tesu 16 gutto viditindriyo care, dhamme ṭhito ajjavamaddave rato;
সঙ্গাতিগো সব্বদুক্খপ্পহীনো, ন লিপ্পতি 17 দিট্ঠসুতেসু ধীরো’’॥
Saṅgātigo sabbadukkhappahīno, na lippati 18 diṭṭhasutesu dhīro’’.
২৫৪.
254.
ইচ্চেতমত্থং ভগৰা পুনপ্পুনং, অক্খাসি নং 19 ৰেদযি মন্তপারগূ।
Iccetamatthaṃ bhagavā punappunaṃ, akkhāsi naṃ 20 vedayi mantapāragū;
চিত্রাহি গাথাহি মুনী পকাসযি, নিরামগন্ধো অসিতো দুরন্নযো॥
Citrāhi gāthāhi munī pakāsayi, nirāmagandho asito durannayo.
২৫৫.
255.
সুত্ৰান বুদ্ধস্স সুভাসিতং পদং, নিরামগন্ধং সব্বদুক্খপ্পনূদনং।
Sutvāna buddhassa subhāsitaṃ padaṃ, nirāmagandhaṃ sabbadukkhappanūdanaṃ;
নীচমনো ৰন্দি তথাগতস্স, তত্থেৰ পব্বজ্জমরোচযিত্থাতি॥
Nīcamano vandi tathāgatassa, tattheva pabbajjamarocayitthāti.
আমগন্ধসুত্তং দুতিযং নিট্ঠিতং।
Āmagandhasuttaṃ dutiyaṃ niṭṭhitaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / সুত্তনিপাত-অট্ঠকথা • Suttanipāta-aṭṭhakathā / ২. আমগন্ধসুত্তৰণ্ণনা • 2. Āmagandhasuttavaṇṇanā
