| Library / Tipiṭaka / តិបិដក • Tipiṭaka / វិមានវត្ថុ-អដ្ឋកថា • Vimānavatthu-aṭṭhakathā |
៤. អលោមវិមានវណ្ណនា
4. Alomavimānavaṇṇanā
អភិក្កន្តេន វណ្ណេនាតិ អលោមវិមានំ។ តស្ស កា ឧប្បត្តិ? ភគវា ពារាណសិយំ ឥសិបតនេ មិគទាយេ វិហរន្តោ បុព្ពណ្ហសមយំ និវាសេត្វា បត្តចីវរមាទាយ ពារាណសិំ បិណ្ឌាយ បាវិសិ ។ តត្ថេកា អលោមា នាម ទុគ្គតិត្ថី ភគវន្តំ ទិស្វា បសន្នចិត្តា អញ្ញំ ទាតព្ពំ អបស្សន្តី ‘‘ឦទិសម្បិ ភគវតោ ទិន្នំ មយ្ហំ មហប្ផលំ ភវិស្សតី’’តិ ចិន្តេត្វា បរិភិន្នវណ្ណំ អលោណំ សុក្ខកុម្មាសំ ឧបនេសិ, ភគវា បដិគ្គហេសិ។ សា តំ ទានំ អារម្មណំ កត្វា សោមនស្សំ បវេទេសិ, សា អបរភាគេ កាលំ កត្វា តាវតិំសេសុ និព្ពត្តិ។ តំ អាយស្មា មហាមោគ្គល្លានោ –
Abhikkantenavaṇṇenāti alomavimānaṃ. Tassa kā uppatti? Bhagavā bārāṇasiyaṃ isipatane migadāye viharanto pubbaṇhasamayaṃ nivāsetvā pattacīvaramādāya bārāṇasiṃ piṇḍāya pāvisi . Tatthekā alomā nāma duggatitthī bhagavantaṃ disvā pasannacittā aññaṃ dātabbaṃ apassantī ‘‘īdisampi bhagavato dinnaṃ mayhaṃ mahapphalaṃ bhavissatī’’ti cintetvā paribhinnavaṇṇaṃ aloṇaṃ sukkhakummāsaṃ upanesi, bhagavā paṭiggahesi. Sā taṃ dānaṃ ārammaṇaṃ katvā somanassaṃ pavedesi, sā aparabhāge kālaṃ katvā tāvatiṃsesu nibbatti. Taṃ āyasmā mahāmoggallāno –
៧១១.
711.
‘‘អភិក្កន្តេន វណ្ណេន…បេ.… វណ្ណោ ច តេ សព្ពទិសា បភាសតី’’តិ។ –
‘‘Abhikkantena vaṇṇena…pe… vaṇṇo ca te sabbadisā pabhāsatī’’ti. –
បុច្ឆិ។ សាបិ តស្ស ព្យាកាសិ, តំ ទស្សេតុំ –
Pucchi. Sāpi tassa byākāsi, taṃ dassetuṃ –
៧១៤.
714.
‘‘សា ទេវតា អត្តមនា…បេ.… យស្ស កម្មស្សិទំ ផល’’ន្តិ។ – វុត្តំ;
‘‘Sā devatā attamanā…pe… yassa kammassidaṃ phala’’nti. – vuttaṃ;
៧១៥.
715.
‘‘អហញ្ច ពារាណសិយំ, ពុទ្ធស្សាទិច្ចពន្ធុនោ;
‘‘Ahañca bārāṇasiyaṃ, buddhassādiccabandhuno;
អទាសិំ សុក្ខកុម្មាសំ, បសន្នា សេហិ បាណិភិ។
Adāsiṃ sukkhakummāsaṃ, pasannā sehi pāṇibhi.
៧១៦.
716.
‘‘សុក្ខាយ អលោណិកាយ ច, បស្ស ផលំ កុម្មាសបិណ្ឌិយា;
‘‘Sukkhāya aloṇikāya ca, passa phalaṃ kummāsapiṇḍiyā;
អលោមំ សុខិតំ ទិស្វា, កោ បុញ្ញំ ន ករិស្សតិ។
Alomaṃ sukhitaṃ disvā, ko puññaṃ na karissati.
៧១៧.
717.
‘‘តេន មេតាទិសោ វណ្ណោ…បេ.… វណ្ណោ ច មេ សព្ពទិសា បភាសតី’’តិ។
‘‘Tena metādiso vaṇṇo…pe… vaṇṇo ca me sabbadisā pabhāsatī’’ti.
៧១៦. តត្ថ អលោមំ សុខិតំ ទិស្វាតិ អលោមម្បិ នាម សុក្ខកុម្មាសមត្តំ ទត្វា ឯវំ ទិព្ពសុខេន សុខិតំ ទិស្វា។ កោ បុញ្ញំ ន ករិស្សតីតិ កោ នាម អត្តនោ ហិតសុខំ ឥច្ឆន្តោ បុញ្ញំ ន ករិស្សតីតិ។ សេសំ វុត្តនយមេវ។
716. Tattha alomaṃ sukhitaṃ disvāti alomampi nāma sukkhakummāsamattaṃ datvā evaṃ dibbasukhena sukhitaṃ disvā. Ko puññaṃ na karissatīti ko nāma attano hitasukhaṃ icchanto puññaṃ na karissatīti. Sesaṃ vuttanayameva.
អលោមវិមានវណ្ណនា និដ្ឋិតា។
Alomavimānavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / វិមានវត្ថុបាឡិ • Vimānavatthupāḷi / ៤. អលោមវិមានវត្ថុ • 4. Alomavimānavatthu
