| Library / Tipiṭaka / តិបិដក • Tipiṭaka / អបទានបាឡិ • Apadānapāḷi |
១០. យូថិកបុប្ផិយត្ថេរអបទានំ
10. Yūthikapupphiyattheraapadānaṃ
៥៣.
53.
‘‘បទុមុត្តរោ នាម ជិនោ, អាហុតីនំ បដិគ្គហោ;
‘‘Padumuttaro nāma jino, āhutīnaṃ paṭiggaho;
បវនា និក្ខមិត្វាន, វិហារំ យាតិ ចក្ខុមា។
Pavanā nikkhamitvāna, vihāraṃ yāti cakkhumā.
៥៤.
54.
‘‘ឧភោ ហត្ថេហិ បគ្គយ្ហ, យូថិកំ បុប្ផមុត្តមំ;
‘‘Ubho hatthehi paggayha, yūthikaṃ pupphamuttamaṃ;
ពុទ្ធស្ស អភិរោបយិំ, មេត្តចិត្តស្ស តាទិនោ។
Buddhassa abhiropayiṃ, mettacittassa tādino.
៥៥.
55.
‘‘តេន ចិត្តប្បសាទេន, អនុភោត្វាន សម្បទា;
‘‘Tena cittappasādena, anubhotvāna sampadā;
កប្បានំ សតសហស្សំ, ទុគ្គតិំ នុបបជ្ជហំ។
Kappānaṃ satasahassaṃ, duggatiṃ nupapajjahaṃ.
៥៦.
56.
‘‘ឥតោ បញ្ញាសកប្បេសុ, ឯកោ អាសិំ ជនាធិបោ;
‘‘Ito paññāsakappesu, eko āsiṃ janādhipo;
សមិត្តនន្ទនោ នាម, ចក្កវត្តី មហព្ពលោ។
Samittanandano nāma, cakkavattī mahabbalo.
៥៧.
57.
‘‘បដិសម្ភិទា ចតស្សោ…បេ.… កតំ ពុទ្ធស្ស សាសនំ’’។
‘‘Paṭisambhidā catasso…pe… kataṃ buddhassa sāsanaṃ’’.
ឥត្ថំ សុទំ អាយស្មា យូថិកបុប្ផិយោ ថេរោ ឥមា គាថាយោ អភាសិត្ថាតិ;
Itthaṃ sudaṃ āyasmā yūthikapupphiyo thero imā gāthāyo abhāsitthāti;
យូថិកបុប្ផិយត្ថេរស្សាបទានំ ទសមំ។
Yūthikapupphiyattherassāpadānaṃ dasamaṃ.
តមាលបុប្ផិយវគ្គោ វីសតិមោ។
Tamālapupphiyavaggo vīsatimo.
តស្សុទ្ទានំ –
Tassuddānaṃ –
តមាលតិណសន្ថារោ , ខណ្ឌផុល្លិ អសោកិយោ;
Tamālatiṇasanthāro , khaṇḍaphulli asokiyo;
អង្កោលកី កិសលយោ, តិន្ទុកោ នេលបុប្ផិយោ;
Aṅkolakī kisalayo, tinduko nelapupphiyo;
កិំកណិកោ យូថិកោ ច, គាថា បញ្ញាស អដ្ឋ ចាតិ។
Kiṃkaṇiko yūthiko ca, gāthā paññāsa aṭṭha cāti.
អថ វគ្គុទ្ទានំ –
Atha vagguddānaṃ –
ភិក្ខាទាយី បរិវារោ, សេរេយ្យោ សោភិតោ តថា;
Bhikkhādāyī parivāro, sereyyo sobhito tathā;
ឆត្តញ្ច ពន្ធុជីវី ច, សុបារិចរិយោបិ ច។
Chattañca bandhujīvī ca, supāricariyopi ca.
កុមុទោ កុដជោ ចេវ, តមាលិ ទសមោ កតោ;
Kumudo kuṭajo ceva, tamāli dasamo kato;
ឆសតានិ ច គាថានិ, ឆសដ្ឋិ ច តតុត្តរិ។
Chasatāni ca gāthāni, chasaṭṭhi ca tatuttari.
ភិក្ខាវគ្គទសកំ។
Bhikkhāvaggadasakaṃ.
ទុតិយសតកំ សមត្តំ។
Dutiyasatakaṃ samattaṃ.
