| Library / Tipiṭaka / តិបិដក • Tipiṭaka / អបទានបាឡិ • Apadānapāḷi |
២១. កណិការបុប្ផិយវគ្គោ
21. Kaṇikārapupphiyavaggo
១. កណិការបុប្ផិយត្ថេរអបទានំ
1. Kaṇikārapupphiyattheraapadānaṃ
១.
1.
‘‘កណិការំ បុប្ផិតំ ទិស្វា, ឱចិនិត្វានហំ តទា;
‘‘Kaṇikāraṃ pupphitaṃ disvā, ocinitvānahaṃ tadā;
តិស្សស្ស អភិរោបេសិំ, ឱឃតិណ្ណស្ស តាទិនោ។
Tissassa abhiropesiṃ, oghatiṇṇassa tādino.
២.
2.
‘‘ទ្វេនវុតេ ឥតោ កប្បេ, យំ បុប្ផមភិរោបយិំ;
‘‘Dvenavute ito kappe, yaṃ pupphamabhiropayiṃ;
ទុគ្គតិំ នាភិជានាមិ, ពុទ្ធបូជាយិទំ ផលំ។
Duggatiṃ nābhijānāmi, buddhapūjāyidaṃ phalaṃ.
៣.
3.
‘‘បញ្ចត្តិំសេ ឥតោ កប្បេ, អរុណបាណីតិ វិស្សុតោ;
‘‘Pañcattiṃse ito kappe, aruṇapāṇīti vissuto;
សត្តរតនសម្បន្នោ, ចក្កវត្តី មហព្ពលោ។
Sattaratanasampanno, cakkavattī mahabbalo.
៤.
4.
‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;
‘‘Paṭisambhidā catasso, vimokkhāpi ca aṭṭhime;
ឆឡភិញ្ញា សច្ឆិកតា, កតំ ពុទ្ធស្ស សាសនំ’’។
Chaḷabhiññā sacchikatā, kataṃ buddhassa sāsanaṃ’’.
ឥត្ថំ សុទំ អាយស្មា កណិការបុប្ផិយោ ថេរោ ឥមា គាថាយោ អភាសិត្ថាតិ។
Itthaṃ sudaṃ āyasmā kaṇikārapupphiyo thero imā gāthāyo abhāsitthāti.
កណិការបុប្ផិយត្ថេរស្សាបទានំ បឋមំ។
Kaṇikārapupphiyattherassāpadānaṃ paṭhamaṃ.
