| Library / Tipiṭaka / तिपिटक • Tipiṭaka / अपदानपाळि • Apadānapāḷi |
१०. यूथिकपुप्फियत्थेरअपदानं
10. Yūthikapupphiyattheraapadānaṃ
५३.
53.
‘‘पदुमुत्तरो नाम जिनो, आहुतीनं पटिग्गहो।
‘‘Padumuttaro nāma jino, āhutīnaṃ paṭiggaho;
पवना निक्खमित्वान, विहारं याति चक्खुमा॥
Pavanā nikkhamitvāna, vihāraṃ yāti cakkhumā.
५४.
54.
‘‘उभो हत्थेहि पग्गय्ह, यूथिकं पुप्फमुत्तमं।
‘‘Ubho hatthehi paggayha, yūthikaṃ pupphamuttamaṃ;
बुद्धस्स अभिरोपयिं, मेत्तचित्तस्स तादिनो॥
Buddhassa abhiropayiṃ, mettacittassa tādino.
५५.
55.
‘‘तेन चित्तप्पसादेन, अनुभोत्वान सम्पदा।
‘‘Tena cittappasādena, anubhotvāna sampadā;
कप्पानं सतसहस्सं, दुग्गतिं नुपपज्जहं॥
Kappānaṃ satasahassaṃ, duggatiṃ nupapajjahaṃ.
५६.
56.
‘‘इतो पञ्ञासकप्पेसु, एको आसिं जनाधिपो।
‘‘Ito paññāsakappesu, eko āsiṃ janādhipo;
समित्तनन्दनो नाम, चक्कवत्ती महब्बलो॥
Samittanandano nāma, cakkavattī mahabbalo.
५७.
57.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा यूथिकपुप्फियो थेरो इमा गाथायो अभासित्थाति।
Itthaṃ sudaṃ āyasmā yūthikapupphiyo thero imā gāthāyo abhāsitthāti;
यूथिकपुप्फियत्थेरस्सापदानं दसमं।
Yūthikapupphiyattherassāpadānaṃ dasamaṃ.
तमालपुप्फियवग्गो वीसतिमो।
Tamālapupphiyavaggo vīsatimo.
तस्सुद्दानं –
Tassuddānaṃ –
तमालतिणसन्थारो , खण्डफुल्लि असोकियो।
Tamālatiṇasanthāro , khaṇḍaphulli asokiyo;
अङ्कोलकी किसलयो, तिन्दुको नेलपुप्फियो।
Aṅkolakī kisalayo, tinduko nelapupphiyo;
किंकणिको यूथिको च, गाथा पञ्ञास अट्ठ चाति॥
Kiṃkaṇiko yūthiko ca, gāthā paññāsa aṭṭha cāti.
अथ वग्गुद्दानं –
Atha vagguddānaṃ –
भिक्खादायी परिवारो, सेरेय्यो सोभितो तथा।
Bhikkhādāyī parivāro, sereyyo sobhito tathā;
छत्तञ्च बन्धुजीवी च, सुपारिचरियोपि च॥
Chattañca bandhujīvī ca, supāricariyopi ca.
कुमुदो कुटजो चेव, तमालि दसमो कतो।
Kumudo kuṭajo ceva, tamāli dasamo kato;
छसतानि च गाथानि, छसट्ठि च ततुत्तरि॥
Chasatāni ca gāthāni, chasaṭṭhi ca tatuttari.
भिक्खावग्गदसकं।
Bhikkhāvaggadasakaṃ.
दुतियसतकं समत्तं।
Dutiyasatakaṃ samattaṃ.
