| Library / Tipiṭaka / तिपिटक • Tipiṭaka / अपदानपाळि • Apadānapāḷi |
२१. कणिकारपुप्फियवग्गो
21. Kaṇikārapupphiyavaggo
१. कणिकारपुप्फियत्थेरअपदानं
1. Kaṇikārapupphiyattheraapadānaṃ
१.
1.
‘‘कणिकारं पुप्फितं दिस्वा, ओचिनित्वानहं तदा।
‘‘Kaṇikāraṃ pupphitaṃ disvā, ocinitvānahaṃ tadā;
तिस्सस्स अभिरोपेसिं, ओघतिण्णस्स तादिनो॥
Tissassa abhiropesiṃ, oghatiṇṇassa tādino.
२.
2.
‘‘द्वेनवुते इतो कप्पे, यं पुप्फमभिरोपयिं।
‘‘Dvenavute ito kappe, yaṃ pupphamabhiropayiṃ;
दुग्गतिं नाभिजानामि, बुद्धपूजायिदं फलं॥
Duggatiṃ nābhijānāmi, buddhapūjāyidaṃ phalaṃ.
३.
3.
‘‘पञ्चत्तिंसे इतो कप्पे, अरुणपाणीति विस्सुतो।
‘‘Pañcattiṃse ito kappe, aruṇapāṇīti vissuto;
सत्तरतनसम्पन्नो, चक्कवत्ती महब्बलो॥
Sattaratanasampanno, cakkavattī mahabbalo.
४.
4.
‘‘पटिसम्भिदा चतस्सो, विमोक्खापि च अट्ठिमे।
‘‘Paṭisambhidā catasso, vimokkhāpi ca aṭṭhime;
छळभिञ्ञा सच्छिकता, कतं बुद्धस्स सासनं’’॥
Chaḷabhiññā sacchikatā, kataṃ buddhassa sāsanaṃ’’.
इत्थं सुदं आयस्मा कणिकारपुप्फियो थेरो इमा गाथायो अभासित्थाति।
Itthaṃ sudaṃ āyasmā kaṇikārapupphiyo thero imā gāthāyo abhāsitthāti.
कणिकारपुप्फियत्थेरस्सापदानं पठमं।
Kaṇikārapupphiyattherassāpadānaṃ paṭhamaṃ.
