| Library / Tipiṭaka / තිපිටක • Tipiṭaka / චරියාපිටකපාළි • Cariyāpiṭakapāḷi |
3. යුධඤ්ජයවග්ගො
3. Yudhañjayavaggo
1. යුධඤ්ජයචරියා
1. Yudhañjayacariyā
1.
1.
‘‘යදාහං අමිතයසො, රාජපුත්තො යුධඤ්ජයො;
‘‘Yadāhaṃ amitayaso, rājaputto yudhañjayo;
උස්සාවබින්දුං සූරියාතපෙ, පතිතං දිස්වාන සංවිජිං.
Ussāvabinduṃ sūriyātape, patitaṃ disvāna saṃvijiṃ.
2.
2.
‘‘තඤ්ඤෙවාධිපතිං කත්වා, සංවෙගමනුබ්රූහයිං;
‘‘Taññevādhipatiṃ katvā, saṃvegamanubrūhayiṃ;
මාතාපිතූ ච වන්දිත්වා, පබ්බජ්ජමනුයාචහං.
Mātāpitū ca vanditvā, pabbajjamanuyācahaṃ.
3.
3.
‘‘යාචන්ති මං පඤ්ජලිකා, සනෙගමා සරට්ඨකා;
‘‘Yācanti maṃ pañjalikā, sanegamā saraṭṭhakā;
‘අජ්ජෙව පුත්ත පටිපජ්ජ, ඉද්ධං ඵීතං මහාමහිං’.
‘Ajjeva putta paṭipajja, iddhaṃ phītaṃ mahāmahiṃ’.
4.
4.
‘‘සරාජකෙ සහොරොධෙ, සනෙගමෙ සරට්ඨකෙ;
‘‘Sarājake sahorodhe, sanegame saraṭṭhake;
කරුණං පරිදෙවන්තෙ, අනපෙක්ඛොව පරිච්චජිං.
Karuṇaṃ paridevante, anapekkhova pariccajiṃ.
5.
5.
‘‘කෙවලං පථවිං රජ්ජං, ඤාතිපරිජනං යසං;
‘‘Kevalaṃ pathaviṃ rajjaṃ, ñātiparijanaṃ yasaṃ;
චජමානො න චින්තෙසිං, බොධියායෙව කාරණා.
Cajamāno na cintesiṃ, bodhiyāyeva kāraṇā.
6.
6.
‘‘මාතාපිතා න මෙ දෙස්සා, නපි මෙ දෙස්සං මහායසං;
‘‘Mātāpitā na me dessā, napi me dessaṃ mahāyasaṃ;
සබ්බඤ්ඤුතං පියං මය්හං, තස්මා රජ්ජං පරිච්චජි’’න්ති.
Sabbaññutaṃ piyaṃ mayhaṃ, tasmā rajjaṃ pariccaji’’nti.
යුධඤ්ජයචරියං පඨමං.
Yudhañjayacariyaṃ paṭhamaṃ.
Related texts:
අට්ඨකථා • Aṭṭhakathā / සුත්තපිටක (අට්ඨකථා) • Suttapiṭaka (aṭṭhakathā) / ඛුද්දකනිකාය (අට්ඨකථා) • Khuddakanikāya (aṭṭhakathā) / චරියාපිටක-අට්ඨකථා • Cariyāpiṭaka-aṭṭhakathā / 1. යුධඤ්ජයචරියාවණ්ණනා • 1. Yudhañjayacariyāvaṇṇanā
