| Library / Tipiṭaka / ತಿಪಿಟಕ • Tipiṭaka / ಚರಿಯಾಪಿಟಕಪಾಳಿ • Cariyāpiṭakapāḷi |
೩. ಯುಧಞ್ಜಯವಗ್ಗೋ
3. Yudhañjayavaggo
೧. ಯುಧಞ್ಜಯಚರಿಯಾ
1. Yudhañjayacariyā
೧.
1.
‘‘ಯದಾಹಂ ಅಮಿತಯಸೋ, ರಾಜಪುತ್ತೋ ಯುಧಞ್ಜಯೋ।
‘‘Yadāhaṃ amitayaso, rājaputto yudhañjayo;
ಉಸ್ಸಾವಬಿನ್ದುಂ ಸೂರಿಯಾತಪೇ, ಪತಿತಂ ದಿಸ್ವಾನ ಸಂವಿಜಿಂ॥
Ussāvabinduṃ sūriyātape, patitaṃ disvāna saṃvijiṃ.
೨.
2.
‘‘ತಞ್ಞೇವಾಧಿಪತಿಂ ಕತ್ವಾ, ಸಂವೇಗಮನುಬ್ರೂಹಯಿಂ।
‘‘Taññevādhipatiṃ katvā, saṃvegamanubrūhayiṃ;
ಮಾತಾಪಿತೂ ಚ ವನ್ದಿತ್ವಾ, ಪಬ್ಬಜ್ಜಮನುಯಾಚಹಂ॥
Mātāpitū ca vanditvā, pabbajjamanuyācahaṃ.
೩.
3.
‘‘ಯಾಚನ್ತಿ ಮಂ ಪಞ್ಜಲಿಕಾ, ಸನೇಗಮಾ ಸರಟ್ಠಕಾ।
‘‘Yācanti maṃ pañjalikā, sanegamā saraṭṭhakā;
‘ಅಜ್ಜೇವ ಪುತ್ತ ಪಟಿಪಜ್ಜ, ಇದ್ಧಂ ಫೀತಂ ಮಹಾಮಹಿಂ’॥
‘Ajjeva putta paṭipajja, iddhaṃ phītaṃ mahāmahiṃ’.
೪.
4.
‘‘ಸರಾಜಕೇ ಸಹೋರೋಧೇ, ಸನೇಗಮೇ ಸರಟ್ಠಕೇ।
‘‘Sarājake sahorodhe, sanegame saraṭṭhake;
ಕರುಣಂ ಪರಿದೇವನ್ತೇ, ಅನಪೇಕ್ಖೋವ ಪರಿಚ್ಚಜಿಂ॥
Karuṇaṃ paridevante, anapekkhova pariccajiṃ.
೫.
5.
‘‘ಕೇವಲಂ ಪಥವಿಂ ರಜ್ಜಂ, ಞಾತಿಪರಿಜನಂ ಯಸಂ।
‘‘Kevalaṃ pathaviṃ rajjaṃ, ñātiparijanaṃ yasaṃ;
ಚಜಮಾನೋ ನ ಚಿನ್ತೇಸಿಂ, ಬೋಧಿಯಾಯೇವ ಕಾರಣಾ॥
Cajamāno na cintesiṃ, bodhiyāyeva kāraṇā.
೬.
6.
‘‘ಮಾತಾಪಿತಾ ನ ಮೇ ದೇಸ್ಸಾ, ನಪಿ ಮೇ ದೇಸ್ಸಂ ಮಹಾಯಸಂ।
‘‘Mātāpitā na me dessā, napi me dessaṃ mahāyasaṃ;
ಸಬ್ಬಞ್ಞುತಂ ಪಿಯಂ ಮಯ್ಹಂ, ತಸ್ಮಾ ರಜ್ಜಂ ಪರಿಚ್ಚಜಿ’’ನ್ತಿ॥
Sabbaññutaṃ piyaṃ mayhaṃ, tasmā rajjaṃ pariccaji’’nti.
ಯುಧಞ್ಜಯಚರಿಯಂ ಪಠಮಂ।
Yudhañjayacariyaṃ paṭhamaṃ.
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಚರಿಯಾಪಿಟಕ-ಅಟ್ಠಕಥಾ • Cariyāpiṭaka-aṭṭhakathā / ೧. ಯುಧಞ್ಜಯಚರಿಯಾವಣ್ಣನಾ • 1. Yudhañjayacariyāvaṇṇanā
