| Library / Tipiṭaka / តិបិដក • Tipiṭaka / ចរិយាបិដកបាឡិ • Cariyāpiṭakapāḷi |
៣. យុធញ្ជយវគ្គោ
3. Yudhañjayavaggo
១. យុធញ្ជយចរិយា
1. Yudhañjayacariyā
១.
1.
‘‘យទាហំ អមិតយសោ, រាជបុត្តោ យុធញ្ជយោ;
‘‘Yadāhaṃ amitayaso, rājaputto yudhañjayo;
ឧស្សាវពិន្ទុំ សូរិយាតបេ, បតិតំ ទិស្វាន សំវិជិំ។
Ussāvabinduṃ sūriyātape, patitaṃ disvāna saṃvijiṃ.
២.
2.
‘‘តញ្ញេវាធិបតិំ កត្វា, សំវេគមនុព្រូហយិំ;
‘‘Taññevādhipatiṃ katvā, saṃvegamanubrūhayiṃ;
មាតាបិតូ ច វន្ទិត្វា, បព្ពជ្ជមនុយាចហំ។
Mātāpitū ca vanditvā, pabbajjamanuyācahaṃ.
៣.
3.
‘‘យាចន្តិ មំ បញ្ជលិកា, សនេគមា សរដ្ឋកា;
‘‘Yācanti maṃ pañjalikā, sanegamā saraṭṭhakā;
‘អជ្ជេវ បុត្ត បដិបជ្ជ, ឥទ្ធំ ផីតំ មហាមហិំ’។
‘Ajjeva putta paṭipajja, iddhaṃ phītaṃ mahāmahiṃ’.
៤.
4.
‘‘សរាជកេ សហោរោធេ, សនេគមេ សរដ្ឋកេ;
‘‘Sarājake sahorodhe, sanegame saraṭṭhake;
ករុណំ បរិទេវន្តេ, អនបេក្ខោវ បរិច្ចជិំ។
Karuṇaṃ paridevante, anapekkhova pariccajiṃ.
៥.
5.
‘‘កេវលំ បថវិំ រជ្ជំ, ញាតិបរិជនំ យសំ;
‘‘Kevalaṃ pathaviṃ rajjaṃ, ñātiparijanaṃ yasaṃ;
ចជមានោ ន ចិន្តេសិំ, ពោធិយាយេវ ការណា។
Cajamāno na cintesiṃ, bodhiyāyeva kāraṇā.
៦.
6.
‘‘មាតាបិតា ន មេ ទេស្សា, នបិ មេ ទេស្សំ មហាយសំ;
‘‘Mātāpitā na me dessā, napi me dessaṃ mahāyasaṃ;
សព្ពញ្ញុតំ បិយំ មយ្ហំ, តស្មា រជ្ជំ បរិច្ចជិ’’ន្តិ។
Sabbaññutaṃ piyaṃ mayhaṃ, tasmā rajjaṃ pariccaji’’nti.
យុធញ្ជយចរិយំ បឋមំ។
Yudhañjayacariyaṃ paṭhamaṃ.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ចរិយាបិដក-អដ្ឋកថា • Cariyāpiṭaka-aṭṭhakathā / ១. យុធញ្ជយចរិយាវណ្ណនា • 1. Yudhañjayacariyāvaṇṇanā
