| Library / Tipiṭaka / तिपिटक • Tipiṭaka / चरियापिटकपाळि • Cariyāpiṭakapāḷi |
३. युधञ्जयवग्गो
3. Yudhañjayavaggo
१. युधञ्जयचरिया
1. Yudhañjayacariyā
१.
1.
‘‘यदाहं अमितयसो, राजपुत्तो युधञ्जयो।
‘‘Yadāhaṃ amitayaso, rājaputto yudhañjayo;
उस्सावबिन्दुं सूरियातपे, पतितं दिस्वान संविजिं॥
Ussāvabinduṃ sūriyātape, patitaṃ disvāna saṃvijiṃ.
२.
2.
‘‘तञ्ञेवाधिपतिं कत्वा, संवेगमनुब्रूहयिं।
‘‘Taññevādhipatiṃ katvā, saṃvegamanubrūhayiṃ;
मातापितू च वन्दित्वा, पब्बज्जमनुयाचहं॥
Mātāpitū ca vanditvā, pabbajjamanuyācahaṃ.
३.
3.
‘‘याचन्ति मं पञ्जलिका, सनेगमा सरट्ठका।
‘‘Yācanti maṃ pañjalikā, sanegamā saraṭṭhakā;
‘अज्जेव पुत्त पटिपज्ज, इद्धं फीतं महामहिं’॥
‘Ajjeva putta paṭipajja, iddhaṃ phītaṃ mahāmahiṃ’.
४.
4.
‘‘सराजके सहोरोधे, सनेगमे सरट्ठके।
‘‘Sarājake sahorodhe, sanegame saraṭṭhake;
करुणं परिदेवन्ते, अनपेक्खोव परिच्चजिं॥
Karuṇaṃ paridevante, anapekkhova pariccajiṃ.
५.
5.
‘‘केवलं पथविं रज्जं, ञातिपरिजनं यसं।
‘‘Kevalaṃ pathaviṃ rajjaṃ, ñātiparijanaṃ yasaṃ;
चजमानो न चिन्तेसिं, बोधियायेव कारणा॥
Cajamāno na cintesiṃ, bodhiyāyeva kāraṇā.
६.
6.
‘‘मातापिता न मे देस्सा, नपि मे देस्सं महायसं।
‘‘Mātāpitā na me dessā, napi me dessaṃ mahāyasaṃ;
सब्बञ्ञुतं पियं मय्हं, तस्मा रज्जं परिच्चजि’’न्ति॥
Sabbaññutaṃ piyaṃ mayhaṃ, tasmā rajjaṃ pariccaji’’nti.
युधञ्जयचरियं पठमं।
Yudhañjayacariyaṃ paṭhamaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / चरियापिटक-अट्ठकथा • Cariyāpiṭaka-aṭṭhakathā / १. युधञ्जयचरियावण्णना • 1. Yudhañjayacariyāvaṇṇanā
