| Library / Tipiṭaka / ತಿಪಿಟಕ • Tipiṭaka / ಅಪದಾನಪಾಳಿ • Apadānapāḷi |
೪. ಖತ್ತಿಯಾವಗ್ಗೋ
4. Khattiyāvaggo
೧. ಯಸವತೀಪಮುಖಅಟ್ಠಾರಸಭಿಕ್ಖುನೀಸಹಸ್ಸಅಪದಾನಂ
1. Yasavatīpamukhaaṭṭhārasabhikkhunīsahassaapadānaṃ
೧.
1.
‘‘ಭವಾ ಸಬ್ಬೇ ಪರಿಕ್ಖೀಣಾ, ಭವಾ ಸನ್ತಿ ವಿಮೋಚಿತಾ।
‘‘Bhavā sabbe parikkhīṇā, bhavā santi vimocitā;
ಸಬ್ಬಾಸವಾ ಚ ನೋ ನತ್ಥಿ, ಆರೋಚೇಮ ಮಹಾಮುನೇ॥
Sabbāsavā ca no natthi, ārocema mahāmune.
೨.
2.
‘‘ಪುರಿಮಂ ಕುಸಲಂ ಕಮ್ಮಂ 1, ಯಂ ಕಿಞ್ಚಿ ಸಾಧುಪತ್ಥಿತಂ।
‘‘Purimaṃ kusalaṃ kammaṃ 2, yaṃ kiñci sādhupatthitaṃ;
ಪರಿಭೋಗಮಯಂ ದಿನ್ನಂ, ತುಯ್ಹತ್ಥಾಯ ಮಹಾಮುನೇ॥
Paribhogamayaṃ dinnaṃ, tuyhatthāya mahāmune.
೩.
3.
ಪರಿಭೋಗಮಯಂ ದಿನ್ನಂ, ತುಯ್ಹತ್ಥಾಯ ಮಹಾಮುನೇ॥
Paribhogamayaṃ dinnaṃ, tuyhatthāya mahāmune.
೪.
4.
‘‘ಉಚ್ಚನೀಚಮಯಂ ಕಮ್ಮಂ, ಭಿಕ್ಖೂನಂ ಸಾಧುಪತ್ಥಿತಂ।
‘‘Uccanīcamayaṃ kammaṃ, bhikkhūnaṃ sādhupatthitaṃ;
೫.
5.
‘‘ತೇನೇವ ಸುಕ್ಕಮೂಲೇನ, ಚೋದಿತಾ ಕಮ್ಮಸಮ್ಪದಾ।
‘‘Teneva sukkamūlena, coditā kammasampadā;
ಮಾನುಸಿಕಮತಿಕ್ಕನ್ತಾ, ಜಾಯಿಂಸು ಖತ್ತಿಯೇ ಕುಲೇ॥
Mānusikamatikkantā, jāyiṃsu khattiye kule.
೬.
6.
‘‘ಉಪ್ಪತ್ತೇ ಚ ಕತೇ ಕಮ್ಮೇ, ಜಾತಿಯಾ ವಾಪಿ ಏಕತೋ।
‘‘Uppatte ca kate kamme, jātiyā vāpi ekato;
ಪಚ್ಛಿಮೇ ಏಕತೋ ಜಾತಾ, ಖತ್ತಿಯಾ ಕುಲಸಮ್ಭವಾ॥
Pacchime ekato jātā, khattiyā kulasambhavā.
೭.
7.
‘‘ರೂಪವತೀ ಭೋಗವತೀ, ಲಾಭಸಕ್ಕಾರಪೂಜಿತಾ।
‘‘Rūpavatī bhogavatī, lābhasakkārapūjitā;
ಅನ್ತೇಪುರೇ ಮಹಾವೀರ, ದೇವಾನಂ ವಿಯ ನನ್ದನೇ॥
Antepure mahāvīra, devānaṃ viya nandane.
೮.
8.
‘‘ನಿಬ್ಬಿನ್ದಿತ್ವಾ ಅಗಾರಮ್ಹಾ, ಪಬ್ಬಜಿಮ್ಹನಗಾರಿಯಂ।
‘‘Nibbinditvā agāramhā, pabbajimhanagāriyaṃ;
ಕತಿಪಾಹಂ ಉಪಾದಾಯ, ಸಬ್ಬಾ ಪತ್ತಾಮ್ಹ ನಿಬ್ಬುತಿಂ॥
Katipāhaṃ upādāya, sabbā pattāmha nibbutiṃ.
೯.
9.
‘‘ಚೀವರಂ ಪಿಣ್ಡಪಾತಞ್ಚ, ಪಚ್ಚಯಂ ಸಯನಾಸನಂ।
‘‘Cīvaraṃ piṇḍapātañca, paccayaṃ sayanāsanaṃ;
ಉಪನೇನ್ತಿ ಬಹೂ ಅಮ್ಹೇ, ಸದಾ ಸಕ್ಕತಪೂಜಿತಾ॥
Upanenti bahū amhe, sadā sakkatapūjitā.
೧೦.
10.
‘‘ಕಿಲೇಸಾ ಝಾಪಿತಾ ಅಮ್ಹಂ, ಭವಾ ಸಬ್ಬೇ ಸಮೂಹತಾ।
‘‘Kilesā jhāpitā amhaṃ, bhavā sabbe samūhatā;
ನಾಗೀವ ಬನ್ಧನಂ ಛೇತ್ವಾ, ವಿಹರಾಮ ಅನಾಸವಾ॥
Nāgīva bandhanaṃ chetvā, viharāma anāsavā.
೧೧.
11.
‘‘ಸ್ವಾಗತಂ ವತ ನೋ ಆಸಿ, ಮಮ ಬುದ್ಧಸ್ಸ ಸನ್ತಿಕೇ।
‘‘Svāgataṃ vata no āsi, mama buddhassa santike;
ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ॥
Tisso vijjā anuppattā, kataṃ buddhassa sāsanaṃ.
೧೨.
12.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ।
‘‘Paṭisambhidā catasso, vimokkhāpi ca aṭṭhime;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’॥
Chaḷabhiññā sacchikatā, kataṃ buddhassa sāsanaṃ’’.
ಇತ್ಥಂ ಸುದಂ ಯಸವತೀಪಮುಖಾನಿ ಖತ್ತಿಯಕಞ್ಞಾಭಿಕ್ಖುನಿಯೋ ಅಟ್ಠಾರಸಸಹಸ್ಸಾನಿ ಭಗವತೋ ಸಮ್ಮುಖಾ ಇಮಾ ಗಾಥಾಯೋ ಅಭಾಸಿತ್ಥಾತಿ।
Itthaṃ sudaṃ yasavatīpamukhāni khattiyakaññābhikkhuniyo aṭṭhārasasahassāni bhagavato sammukhā imā gāthāyo abhāsitthāti.
ಯಸವತೀಪಮುಖಅಟ್ಠಾರಸಭಿಕ್ಖುನೀಸಹಸ್ಸಾಪದಾನಂ ಪಠಮಂ।
Yasavatīpamukhaaṭṭhārasabhikkhunīsahassāpadānaṃ paṭhamaṃ.
Footnotes:
