| Library / Tipiṭaka / តិបិដក • Tipiṭaka / អបទានបាឡិ • Apadānapāḷi |
៤. ខត្តិយាវគ្គោ
4. Khattiyāvaggo
១. យសវតីបមុខអដ្ឋារសភិក្ខុនីសហស្សអបទានំ
1. Yasavatīpamukhaaṭṭhārasabhikkhunīsahassaapadānaṃ
១.
1.
‘‘ភវា សព្ពេ បរិក្ខីណា, ភវា សន្តិ វិមោចិតា;
‘‘Bhavā sabbe parikkhīṇā, bhavā santi vimocitā;
សព្ពាសវា ច នោ នត្ថិ, អារោចេម មហាមុនេ។
Sabbāsavā ca no natthi, ārocema mahāmune.
២.
2.
‘‘បុរិមំ កុសលំ កម្មំ 1, យំ កិញ្ចិ សាធុបត្ថិតំ;
‘‘Purimaṃ kusalaṃ kammaṃ 2, yaṃ kiñci sādhupatthitaṃ;
បរិភោគមយំ ទិន្នំ, តុយ្ហត្ថាយ មហាមុនេ។
Paribhogamayaṃ dinnaṃ, tuyhatthāya mahāmune.
៣.
3.
បរិភោគមយំ ទិន្នំ, តុយ្ហត្ថាយ មហាមុនេ។
Paribhogamayaṃ dinnaṃ, tuyhatthāya mahāmune.
៤.
4.
‘‘ឧច្ចនីចមយំ កម្មំ, ភិក្ខូនំ សាធុបត្ថិតំ;
‘‘Uccanīcamayaṃ kammaṃ, bhikkhūnaṃ sādhupatthitaṃ;
៥.
5.
‘‘តេនេវ សុក្កមូលេន, ចោទិតា កម្មសម្បទា;
‘‘Teneva sukkamūlena, coditā kammasampadā;
មានុសិកមតិក្កន្តា, ជាយិំសុ ខត្តិយេ កុលេ។
Mānusikamatikkantā, jāyiṃsu khattiye kule.
៦.
6.
‘‘ឧប្បត្តេ ច កតេ កម្មេ, ជាតិយា វាបិ ឯកតោ;
‘‘Uppatte ca kate kamme, jātiyā vāpi ekato;
បច្ឆិមេ ឯកតោ ជាតា, ខត្តិយា កុលសម្ភវា។
Pacchime ekato jātā, khattiyā kulasambhavā.
៧.
7.
‘‘រូបវតី ភោគវតី, លាភសក្ការបូជិតា;
‘‘Rūpavatī bhogavatī, lābhasakkārapūjitā;
អន្តេបុរេ មហាវីរ, ទេវានំ វិយ នន្ទនេ។
Antepure mahāvīra, devānaṃ viya nandane.
៨.
8.
‘‘និព្ពិន្ទិត្វា អគារម្ហា, បព្ពជិម្ហនគារិយំ;
‘‘Nibbinditvā agāramhā, pabbajimhanagāriyaṃ;
កតិបាហំ ឧបាទាយ, សព្ពា បត្តាម្ហ និព្ពុតិំ។
Katipāhaṃ upādāya, sabbā pattāmha nibbutiṃ.
៩.
9.
‘‘ចីវរំ បិណ្ឌបាតញ្ច, បច្ចយំ សយនាសនំ;
‘‘Cīvaraṃ piṇḍapātañca, paccayaṃ sayanāsanaṃ;
ឧបនេន្តិ ពហូ អម្ហេ, សទា សក្កតបូជិតា។
Upanenti bahū amhe, sadā sakkatapūjitā.
១០.
10.
‘‘កិលេសា ឈាបិតា អម្ហំ, ភវា សព្ពេ សមូហតា;
‘‘Kilesā jhāpitā amhaṃ, bhavā sabbe samūhatā;
នាគីវ ពន្ធនំ ឆេត្វា, វិហរាម អនាសវា។
Nāgīva bandhanaṃ chetvā, viharāma anāsavā.
១១.
11.
‘‘ស្វាគតំ វត នោ អាសិ, មម ពុទ្ធស្ស សន្តិកេ;
‘‘Svāgataṃ vata no āsi, mama buddhassa santike;
តិស្សោ វិជ្ជា អនុប្បត្តា, កតំ ពុទ្ធស្ស សាសនំ។
Tisso vijjā anuppattā, kataṃ buddhassa sāsanaṃ.
១២.
12.
‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;
‘‘Paṭisambhidā catasso, vimokkhāpi ca aṭṭhime;
ឆឡភិញ្ញា សច្ឆិកតា, កតំ ពុទ្ធស្ស សាសនំ’’។
Chaḷabhiññā sacchikatā, kataṃ buddhassa sāsanaṃ’’.
ឥត្ថំ សុទំ យសវតីបមុខានិ ខត្តិយកញ្ញាភិក្ខុនិយោ អដ្ឋារសសហស្សានិ ភគវតោ សម្មុខា ឥមា គាថាយោ អភាសិត្ថាតិ។
Itthaṃ sudaṃ yasavatīpamukhāni khattiyakaññābhikkhuniyo aṭṭhārasasahassāni bhagavato sammukhā imā gāthāyo abhāsitthāti.
យសវតីបមុខអដ្ឋារសភិក្ខុនីសហស្សាបទានំ បឋមំ។
Yasavatīpamukhaaṭṭhārasabhikkhunīsahassāpadānaṃ paṭhamaṃ.
Footnotes:
