| Library / Tipiṭaka / တိပိဋက • Tipiṭaka / ပဉ္စပကရဏ-အနုဋီကာ • Pañcapakaraṇa-anuṭīkā |
၁၀. ဝောဟာရကထာဝဏ္ဏနာ
10. Vohārakathāvaṇṇanā
၃၄၇. ဝိသယဝိသယီသူတိ ရူပစက္ခာဒိကေ သန္ဓာယာဟ။ တေ ဟိ ရူပက္ခန္ဓပရိယာပန္နတ္တာ ဧကန္တေန လောကိယာ။ ဝိသယသ္သေဝာတိ သဒ္ဒသ္သေဝ။ သော ဟိ ဝောဟရိတဗ္ဗတော ဝောဟာရကရဏတာယ စ ‘‘ဝောဟာရော’’တိ ပာဠိယံ ဝုတ္တော။ နတ္ထေတ္ထ ကာရဏံ ဝိသယီနံ ဝိသယသ္သပိ အာသဝာဒိအနာရမ္မဏတာဘာဝတော။ အသိဒ္ဓလောကုတ္တရဘာဝသ္သ ဧကန္တသာသဝတ္တာ တသ္သ သဒ္ဒာယတနသ္သ ယထာ လောကုတ္တရတာ တဝ မတေနာတိ အဓိပ္ပာယော။
347. Visayavisayīsūti rūpacakkhādike sandhāyāha. Te hi rūpakkhandhapariyāpannattā ekantena lokiyā. Visayassevāti saddasseva. So hi voharitabbato vohārakaraṇatāya ca ‘‘vohāro’’ti pāḷiyaṃ vutto. Natthettha kāraṇaṃ visayīnaṃ visayassapi āsavādianārammaṇatābhāvato. Asiddhalokuttarabhāvassa ekantasāsavattā tassa saddāyatanassa yathā lokuttaratā tava matenāti adhippāyo.
ပဋိဟညေယ္ယာတိ ဣဒံ ပရိကပ္ပဝစနံ။ ပရိကပ္ပဝစနဉ္စ အယာထာဝန္တိ အာဟ ‘‘န ဟိ။ပေ.။ အတ္ထီ’’တိ။ န ဟိ ဇလံ အနလန္တိ ပရိကပ္ပိတံ ဒဟတိ ပစတိ ဝာ။ ကိံ လောကိယေန ဉာဏေန ဇာနိတဗ္ဗတော လောကိယော ရူပာယတနာဒိ ဝိယ, ဥဒာဟု လောကုတ္တရော ပစ္စဝေက္ခိယမာနမဂ္ဂာဒိ ဝိယာတိ ဧဝမေတ္ထ ဟေတုသ္သ အနေကန္တဘာဝော ဝေဒိတဗ္ဗော။ တေနာဟ ‘‘လောကိယေ လောကုတ္တရေ စ သမ္ဘဝတော’’တိ။
Paṭihaññeyyāti idaṃ parikappavacanaṃ. Parikappavacanañca ayāthāvanti āha ‘‘na hi…pe… atthī’’ti. Na hi jalaṃ analanti parikappitaṃ dahati pacati vā. Kiṃ lokiyena ñāṇena jānitabbato lokiyo rūpāyatanādi viya, udāhu lokuttaro paccavekkhiyamānamaggādi viyāti evamettha hetussa anekantabhāvo veditabbo. Tenāha ‘‘lokiye lokuttare ca sambhavato’’ti.
ဝောဟာရကထာဝဏ္ဏနာ နိဋ္ဌိတာ။
Vohārakathāvaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၁၉) ၁၀. ဝောဟာရကထာ • (19) 10. Vohārakathā
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၁၀. ဝောဟာရကထာဝဏ္ဏနာ • 10. Vohārakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၁၀. ဝောဟာရကထာဝဏ္ဏနာ • 10. Vohārakathāvaṇṇanā
