| Library / Tipiṭaka / திபிடக • Tipiṭaka / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā |
4. விவேககதா²
4. Vivekakathā
விவேககதா²வண்ணனா
Vivekakathāvaṇṇanā
22. இதா³னி பஹானாவஸானாய அபி⁴ஸமயகதா²ய அனந்தரங் பஹானாகாரங் த³ஸ்ஸெந்தேன கதி²தாய ஸுத்தந்தபுப்³ப³ங்க³மாய விவேககதா²ய அபுப்³ப³த்தா²னுவண்ணனா. தத்த² ஸுத்தந்தே தாவ யே கேசீதி அனவஸேஸபரியாதா³னங். ப³லகரணீயாதி ஊருப³லேன பா³ஹுப³லேன கத்தப்³பா³. கம்மந்தாதி தா⁴வனலங்க⁴னகஸனவபனாதீ³னி கம்மானி. கரீயந்தீதி ப³லவந்தேஹி கரீயந்தி. ஸீலங் நிஸ்ஸாயாதி சதுபாரிஸுத்³தி⁴ஸீலங் நிஸ்ஸயங் கத்வா. பா⁴வேதீதி பி⁴ன்னஸீலஸ்ஸ பா⁴வனாபா⁴வதோ இத⁴ பன லோகியலோகுத்தரா மக்³க³பா⁴வனா அதி⁴ப்பேதாதி. விவேகனிஸ்ஸிதந்தி தத³ங்க³விவேகங் ஸமுச்சே²த³விவேகங் நிஸ்ஸரணவிவேகங் நிஸ்ஸிதங். விவேகோதி விவித்ததா. அயஞ்ஹி அரியமக்³க³பா⁴வனானுயுத்தோ யோகீ³ விபஸ்ஸனாக்க²ணே கிச்சதோ தத³ங்க³விவேகனிஸ்ஸிதங், அஜ்ஜா²ஸயதோ நிஸ்ஸரணவிவேகனிஸ்ஸிதங், மக்³க³க்க²ணே கிச்சதோ ஸமுச்சே²த³விவேகனிஸ்ஸிதங், ஆரம்மணதோ நிஸ்ஸரணவிவேகனிஸ்ஸிதங் பா⁴வேதி. ஏஸ நயோ விராக³னிஸ்ஸிதாதீ³ஸு. விவேகோயேவ ஹி விரஜ்ஜனட்டே²ன விராகோ³, நிரோத⁴ட்டே²ன நிரோதோ⁴, வோஸஜ்ஜனட்டே²ன வோஸக்³கோ³. அத² வா கிலேஸேஹி விவித்தத்தா விவேகோ, கிலேஸேஹி விரத்தத்தா விராகோ³, கிலேஸானங் நிருத்³த⁴த்தா நிரோதோ⁴, கிலேஸானஞ்ச பரிச்சத்தத்தா விஸ்ஸட்ட²த்தா, நிப்³பா³னேசத்தஸ்ஸ ச விஸ்ஸட்ட²த்தா வோஸக்³கோ³. வோஸக்³கோ³ பன து³விதோ⁴ பரிச்சாக³வோஸக்³கோ³ ச பக்க²ந்த³னவோஸக்³கோ³ ச. தத்த² பரிச்சாக³வோஸக்³கோ³தி விபஸ்ஸனாக்க²ணே தத³ங்க³வஸேன, மக்³க³க்க²ணே ஸமுச்சே²த³வஸேன கிலேஸப்பஹானங். பக்க²ந்த³னவோஸக்³கோ³தி விபஸ்ஸனாக்க²ணே தன்னின்னபா⁴வேன, மக்³க³க்க²ணே ஆரம்மணகரணேன நிப்³பா³னபக்க²ந்த³னங். தது³ப⁴யம்பி இமஸ்மிங் லோகியலோகுத்தரமிஸ்ஸகே அத்த²வண்ணனானயே வட்டதி. ததா² ஹி அயங் ஸம்மாதி³ட்டி²ஆதீ³ஸு ஏகேகோ த⁴ம்மோ யதா²வுத்தேன பகாரேன கிலேஸே ச பரிச்சஜதி, நிப்³பா³னஞ்ச பக்க²ந்த³தி. வோஸக்³க³பரிணாமிந்தி இமினா பன ஸகலேன வசனேன வோஸக்³க³த்த²ங் பரிணாமிதங் பரிணதங், பரிபச்சிதங் பரிபக்கஞ்சாதி வுத்தங் ஹோதி. அயம்பி அரியமக்³க³பா⁴வனானுயுத்தோ பி⁴க்கு² யதா² ஸம்மாதி³ட்டி²ஆதீ³ஸு ஏகேகோ த⁴ம்மோ கிலேஸபரிச்சாக³வோஸக்³க³த்த²ஞ்ச நிப்³பா³னபக்க²ந்த³னவோஸக்³க³த்த²ஞ்ச பரிபச்சதி, யதா² ச பரிபக்கோ ஹோதி, ததா² நங் பா⁴வேதி.
22. Idāni pahānāvasānāya abhisamayakathāya anantaraṃ pahānākāraṃ dassentena kathitāya suttantapubbaṅgamāya vivekakathāya apubbatthānuvaṇṇanā. Tattha suttante tāva ye kecīti anavasesapariyādānaṃ. Balakaraṇīyāti ūrubalena bāhubalena kattabbā. Kammantāti dhāvanalaṅghanakasanavapanādīni kammāni. Karīyantīti balavantehi karīyanti. Sīlaṃ nissāyāti catupārisuddhisīlaṃ nissayaṃ katvā. Bhāvetīti bhinnasīlassa bhāvanābhāvato idha pana lokiyalokuttarā maggabhāvanā adhippetāti. Vivekanissitanti tadaṅgavivekaṃ samucchedavivekaṃ nissaraṇavivekaṃ nissitaṃ. Vivekoti vivittatā. Ayañhi ariyamaggabhāvanānuyutto yogī vipassanākkhaṇe kiccato tadaṅgavivekanissitaṃ, ajjhāsayato nissaraṇavivekanissitaṃ, maggakkhaṇe kiccato samucchedavivekanissitaṃ, ārammaṇato nissaraṇavivekanissitaṃ bhāveti. Esa nayo virāganissitādīsu. Vivekoyeva hi virajjanaṭṭhena virāgo, nirodhaṭṭhena nirodho, vosajjanaṭṭhena vosaggo. Atha vā kilesehi vivittattā viveko, kilesehi virattattā virāgo, kilesānaṃ niruddhattā nirodho, kilesānañca pariccattattā vissaṭṭhattā, nibbānecattassa ca vissaṭṭhattā vosaggo. Vosaggo pana duvidho pariccāgavosaggo ca pakkhandanavosaggo ca. Tattha pariccāgavosaggoti vipassanākkhaṇe tadaṅgavasena, maggakkhaṇe samucchedavasena kilesappahānaṃ. Pakkhandanavosaggoti vipassanākkhaṇe tanninnabhāvena, maggakkhaṇe ārammaṇakaraṇena nibbānapakkhandanaṃ. Tadubhayampi imasmiṃ lokiyalokuttaramissake atthavaṇṇanānaye vaṭṭati. Tathā hi ayaṃ sammādiṭṭhiādīsu ekeko dhammo yathāvuttena pakārena kilese ca pariccajati, nibbānañca pakkhandati. Vosaggapariṇāminti iminā pana sakalena vacanena vosaggatthaṃ pariṇāmitaṃ pariṇataṃ, paripaccitaṃ paripakkañcāti vuttaṃ hoti. Ayampi ariyamaggabhāvanānuyutto bhikkhu yathā sammādiṭṭhiādīsu ekeko dhammo kilesapariccāgavosaggatthañca nibbānapakkhandanavosaggatthañca paripaccati, yathā ca paripakko hoti, tathā naṃ bhāveti.
23. பீ³ஜகா³மபூ⁴தகா³மாதி எத்த² மூலபீ³ஜங் க²ந்த⁴பீ³ஜங் அக்³க³பீ³ஜங் ப²ளுபீ³ஜங் பீ³ஜபீ³ஜந்தி (பாசி॰ 91) பஞ்சவித⁴ங் பீ³ஜங், பீ³ஜகா³மோ நாம பீ³ஜஸமூஹோதி அத்தோ². ததே³வ பன ஸம்பன்னநீலங்குரபாதுபா⁴வதோ பட்டா²ய பூ⁴தகா³மோ நாம, பூ⁴தானங் ஜாதானங் நிப்³ப³த்தமூலனீலங்குரானங் ஸமூஹோதி அத்தோ². தே³வதாபரிக்³க³ஹே ஸதி நீலங்குரகாலதோ பபு⁴தி ஹோதீதி தேஸங் தே³வதாஸங்கா²தானங் பூ⁴தானங் கா³மோதிபி பூ⁴தகா³மோதி வத³ந்தி. வுத்³தி⁴ந்தி அங்குராதி³வஸேன. விருள்ஹிந்தி க²ந்தா⁴தி³வஸேன. வேபுல்லந்தி புப்பா²தி³வஸேன. த⁴ம்மேஸு பன வுத்³தி⁴ந்தி அபுப்³ப³த⁴ம்மப்பவத்திவஸேன. விருளிந்தி ஸகிச்சகரணஸாத⁴னவஸேன. வேபுல்லந்தி கிச்சனிப்ப²த்திவஸேன விபுலபா⁴வந்தி அத்தோ². விபுலத்தந்திபி பாடோ². அத² வா ஏதானி தீணி பதா³னி ஸீலஸமாதி⁴பஞ்ஞாஹிபி யோஜெந்தி.
23.Bījagāmabhūtagāmāti ettha mūlabījaṃ khandhabījaṃ aggabījaṃ phaḷubījaṃ bījabījanti (pāci. 91) pañcavidhaṃ bījaṃ, bījagāmo nāma bījasamūhoti attho. Tadeva pana sampannanīlaṅkurapātubhāvato paṭṭhāya bhūtagāmo nāma, bhūtānaṃ jātānaṃ nibbattamūlanīlaṅkurānaṃ samūhoti attho. Devatāpariggahe sati nīlaṅkurakālato pabhuti hotīti tesaṃ devatāsaṅkhātānaṃ bhūtānaṃ gāmotipi bhūtagāmoti vadanti. Vuddhinti aṅkurādivasena. Viruḷhinti khandhādivasena. Vepullanti pupphādivasena. Dhammesu pana vuddhinti apubbadhammappavattivasena. Viruḷinti sakiccakaraṇasādhanavasena. Vepullanti kiccanipphattivasena vipulabhāvanti attho. Vipulattantipi pāṭho. Atha vā etāni tīṇi padāni sīlasamādhipaññāhipi yojenti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / படிஸம்பி⁴தா³மக்³க³பாளி • Paṭisambhidāmaggapāḷi / 4. விவேககதா² • 4. Vivekakathā
