| Library / Tipiṭaka / திபிடக • Tipiṭaka / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā |
மக்³க³ங்க³னித்³தே³ஸவண்ணனா
Maggaṅganiddesavaṇṇanā
24. ஸுத்தந்தனித்³தே³ஸே ஸம்மாதி³ட்டி²யாதி ஸாமிவசனங். ஜா²னவிபஸ்ஸனாமக்³க³ப²லனிப்³பா³னேஸு லோகியவிரதிஸம்பயுத்தசித்தே ச யதா²யோக³ங் ஸம்பயோக³தோ ச ஆரம்மணதோ ச வத்தமானாய ஸம்மாதி³ட்டி²யா ஸாமஞ்ஞலக்க²ணதோ ஏகீபூ⁴தாய ஸம்மாதி³ட்டி²யா. விக்க²ம்ப⁴னவிவேகோதி விக்க²ம்ப⁴னவஸேன தூ³ரீகரணவஸேன விவேகோ. கேஸங்? நீவரணானங். தஸ்ஸ பட²மங் ஜா²னங் பா⁴வயதோதிஆதி³ விக்க²ம்ப⁴னவஸேன பட²மஜ்ஜா²னமேவ வுத்தங். தஸ்மிங் வுத்தே ஸேஸஜ்ஜா²னானிபி வுத்தானேவ ஹொந்தி. ஜா²னேஸுபி ஸம்மாதி³ட்டி²யா விஜ்ஜமானத்தா ஸம்மாதி³ட்டி²யா விவேகோ நாம ஹோதி. தத³ங்க³விவேகோதி தேன தேன விபஸ்ஸனாஞாணங்கே³ன விவேகோ. தி³ட்டி²க³தானந்தி தி³ட்டி²விவேகஸ்ஸ து³க்கரத்தா பதா⁴னத்தா ச தி³ட்டி²விவேகோவ வுத்தோ. தஸ்மிங் வுத்தே நிச்சஸஞ்ஞாதி³விவேகோபி வுத்தோவ ஹோதி. நிப்³பே³த⁴பா⁴கி³யங் ஸமாதி⁴ந்தி விபஸ்ஸனாஸம்பயுத்தஸமாதி⁴ங். ஸமுச்சே²த³விவேகோதி கிலேஸானங் ஸமுச்சே²தே³ன விவேகோ. லோகுத்தரங் க²யகா³மிமக்³க³ந்தி க²யஸங்கா²தனிப்³பா³னகா³மிலோகுத்தரமக்³க³ங். படிப்பஸ்ஸத்³தி⁴விவேகோதி கிலேஸானங் படிப்பஸ்ஸத்³தி⁴யா விவேகோ. நிஸ்ஸரணவிவேகோதி ஸப்³ப³ஸங்க²தனிஸ்ஸரணபூ⁴தோ ஸங்கா²ரவிவேகோ. ச²ந்த³ஜாதோ ஹோதீதி புப்³ப³பா⁴கே³ ஜாதத⁴ம்மச²ந்தோ³ ஹோதி. ஸத்³தா⁴தி⁴முத்தோதி புப்³ப³பா⁴கே³யேவ ஸத்³தா⁴ய அதி⁴முத்தோ ஹோதி. சித்தஞ்சஸ்ஸ ஸ்வாதி⁴ட்டி²தந்தி புப்³ப³பா⁴கே³யேவ சித்தஞ்ச அஸ்ஸ யோகி³ஸ்ஸ ஸுஅதி⁴ட்டி²தங் ஸுட்டு² பதிட்டி²தங் ஹோதி. இதி ச²ந்தோ³ ஸத்³தா⁴ சித்தந்தி இமே தயோ த⁴ம்மா புப்³ப³பா⁴கே³ உப்பன்னவிவேகானங் உபனிஸ்ஸயத்தா நிஸ்ஸயா நாம. கேசி பன ‘‘சித்தஞ்சஸ்ஸ ஸ்வாதி⁴ட்டி²தந்தி ஸமாதி⁴ வுத்தோ’’தி வத³ந்தி. விராகா³தீ³ஸுபி ஏஸேவ நயோ.
24. Suttantaniddese sammādiṭṭhiyāti sāmivacanaṃ. Jhānavipassanāmaggaphalanibbānesu lokiyaviratisampayuttacitte ca yathāyogaṃ sampayogato ca ārammaṇato ca vattamānāya sammādiṭṭhiyā sāmaññalakkhaṇato ekībhūtāya sammādiṭṭhiyā. Vikkhambhanavivekoti vikkhambhanavasena dūrīkaraṇavasena viveko. Kesaṃ? Nīvaraṇānaṃ. Tassa paṭhamaṃ jhānaṃ bhāvayatotiādi vikkhambhanavasena paṭhamajjhānameva vuttaṃ. Tasmiṃ vutte sesajjhānānipi vuttāneva honti. Jhānesupi sammādiṭṭhiyā vijjamānattā sammādiṭṭhiyā viveko nāma hoti. Tadaṅgavivekoti tena tena vipassanāñāṇaṅgena viveko. Diṭṭhigatānanti diṭṭhivivekassa dukkarattā padhānattā ca diṭṭhivivekova vutto. Tasmiṃ vutte niccasaññādivivekopi vuttova hoti. Nibbedhabhāgiyaṃ samādhinti vipassanāsampayuttasamādhiṃ. Samucchedavivekoti kilesānaṃ samucchedena viveko. Lokuttaraṃ khayagāmimagganti khayasaṅkhātanibbānagāmilokuttaramaggaṃ. Paṭippassaddhivivekoti kilesānaṃ paṭippassaddhiyā viveko. Nissaraṇavivekoti sabbasaṅkhatanissaraṇabhūto saṅkhāraviveko. Chandajāto hotīti pubbabhāge jātadhammachando hoti. Saddhādhimuttoti pubbabhāgeyeva saddhāya adhimutto hoti. Cittañcassa svādhiṭṭhitanti pubbabhāgeyeva cittañca assa yogissa suadhiṭṭhitaṃ suṭṭhu patiṭṭhitaṃ hoti. Iti chando saddhā cittanti ime tayo dhammā pubbabhāge uppannavivekānaṃ upanissayattā nissayā nāma. Keci pana ‘‘cittañcassa svādhiṭṭhitanti samādhi vutto’’ti vadanti. Virāgādīsupi eseva nayo.
நிரோத⁴வாரே பன நிரோத⁴ஸத்³த³தோ அஞ்ஞங் பரியாயவசனங் த³ஸ்ஸெந்தேன அமதா தா⁴தூதி வுத்தங், ஸேஸேஸு நிரோதோ⁴ நிப்³பா³னந்தி உப⁴யத்தா²பி நிப்³பா³னமேவ. த்³வாத³ஸ நிஸ்ஸயாதி ச²ந்த³ஸத்³தா⁴சித்தானியேவ விவேகாதீ³ஸு சதூஸு ஏகேகஸ்மிங் தயோ தயோ கத்வா த்³வாத³ஸ நிஸ்ஸயா ஹொந்தி.
Nirodhavāre pana nirodhasaddato aññaṃ pariyāyavacanaṃ dassentena amatā dhātūti vuttaṃ, sesesu nirodho nibbānanti ubhayatthāpi nibbānameva. Dvādasa nissayāti chandasaddhācittāniyeva vivekādīsu catūsu ekekasmiṃ tayo tayo katvā dvādasa nissayā honti.
25. ஸம்மாஸங்கப்பவாயாமஸதிஸமாதீ⁴னம்பி இமினாவ நயேன அத்த²யோஜனா வேதி³தப்³பா³. ஸம்மாவாசாகம்மந்தா ஜீவானங் பன ஜா²னக்க²ணே விபஸ்ஸனாக்க²ணே ச அபா⁴வா ஜா²னவிபஸ்ஸனானங் புப்³ப³பா⁴க³பரபா⁴க³வஸேன வத்தமானா விரதியோ ஜா²னவிபஸ்ஸனா ஸன்னிஸ்ஸிதா கத்வா வுத்தாதி வேதி³தப்³ப³ங். நீவரணானங் தி³ட்டி²க³தானஞ்ச விவேகவிராக³னிரோத⁴படினிஸ்ஸக்³கா³ ததா² பவத்தமானானங் விரதீனங் விவேகாத³யோ நாமாதி வேதி³தப்³ப³ங். யதா² அட்ட²கனிபாதே ‘‘ததோ, த்வங் பி⁴க்கு², இமங் ஸமாதி⁴ங் ஸவிதக்கங் ஸவிசாரம்பி பா⁴வெய்யாஸி, அவிதக்கவிசாரமத்தம்பி பா⁴வெய்யாஸி, அவிதக்கங் அவிசாரம்பி பா⁴வெய்யாஸி, ஸப்பீதிகம்பி பா⁴வெய்யாஸி, நிப்பீதிகம்பி பா⁴வெய்யாஸி, ஸாதஸஹக³தம்பி பா⁴வெய்யாஸி, உபெக்கா²ஸஹக³தம்பி பா⁴வெய்யாஸீ’’தி (அ॰ நி॰ 8.63) மெத்தாத³யோ காயானுபஸ்ஸனாத³யோ ச நியகஜ்ஜ²த்தமூலஸமாதி⁴வஸேன சதுக்கபஞ்சகஜ்ஜா²னிகா விய வுத்தா, ஏவமிதா⁴பி புப்³ப³பா⁴க³பரபா⁴க³வஸேன விரதியோ வுத்தாதி வேதி³தப்³ப³ங். ப்³யஞ்ஜனச்சா²யமத்தங் க³ஹெத்வா ந ப⁴க³வா அப்³பா⁴சிக்கி²தப்³போ³. க³ம்பீ⁴ரஞ்ஹி பு³த்³த⁴வசனங், ஆசரியே பயிருபாஸித்வா அதி⁴ப்பாயதோ க³ஹேதப்³ப³ங்.
25. Sammāsaṅkappavāyāmasatisamādhīnampi imināva nayena atthayojanā veditabbā. Sammāvācākammantā jīvānaṃ pana jhānakkhaṇe vipassanākkhaṇe ca abhāvā jhānavipassanānaṃ pubbabhāgaparabhāgavasena vattamānā viratiyo jhānavipassanā sannissitā katvā vuttāti veditabbaṃ. Nīvaraṇānaṃ diṭṭhigatānañca vivekavirāganirodhapaṭinissaggā tathā pavattamānānaṃ viratīnaṃ vivekādayo nāmāti veditabbaṃ. Yathā aṭṭhakanipāte ‘‘tato, tvaṃ bhikkhu, imaṃ samādhiṃ savitakkaṃ savicārampi bhāveyyāsi, avitakkavicāramattampi bhāveyyāsi, avitakkaṃ avicārampi bhāveyyāsi, sappītikampi bhāveyyāsi, nippītikampi bhāveyyāsi, sātasahagatampi bhāveyyāsi, upekkhāsahagatampi bhāveyyāsī’’ti (a. ni. 8.63) mettādayo kāyānupassanādayo ca niyakajjhattamūlasamādhivasena catukkapañcakajjhānikā viya vuttā, evamidhāpi pubbabhāgaparabhāgavasena viratiyo vuttāti veditabbaṃ. Byañjanacchāyamattaṃ gahetvā na bhagavā abbhācikkhitabbo. Gambhīrañhi buddhavacanaṃ, ācariye payirupāsitvā adhippāyato gahetabbaṃ.
26-27. பொ³ஜ்ஜ²ங்க³ப³லஇந்த்³ரியவாரேஸுபி இமினாவ நயேன அத்தோ² வேதி³தப்³போ³தி.
26-27. Bojjhaṅgabalaindriyavāresupi imināva nayena attho veditabboti.
விவேககதா²வண்ணனா நிட்டி²தா.
Vivekakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / படிஸம்பி⁴தா³மக்³க³பாளி • Paṭisambhidāmaggapāḷi / 1. மக்³க³ங்க³னித்³தே³ஸோ • 1. Maggaṅganiddeso
