| Library / Tipiṭaka / តិបិដក • Tipiṭaka / បដិសម្ភិទាមគ្គបាឡិ • Paṭisambhidāmaggapāḷi |
៨. វិបល្លាសកថា
8. Vipallāsakathā
២៣៦. បុរិមនិទានំ ។ ‘‘ចត្តារោមេ , ភិក្ខវេ 1, សញ្ញាវិបល្លាសា ចិត្តវិបល្លាសា ទិដ្ឋិវិបល្លាសា។ កតមេ ចត្តារោ? អនិច្ចេ, ភិក្ខវេ, និច្ចន្តិ សញ្ញាវិបល្លាសោ ចិត្តវិបល្លាសោ ទិដ្ឋិវិបល្លាសោ។ ទុក្ខេ, ភិក្ខវេ, សុខន្តិ សញ្ញាវិបល្លាសោ ចិត្តវិបល្លាសោ ទិដ្ឋិវិបល្លាសោ។ អនត្តនិ, ភិក្ខវេ, អត្តាតិ សញ្ញាវិបល្លាសោ ចិត្តវិបល្លាសោ ទិដ្ឋិវិបល្លាសោ។ អសុភេ, ភិក្ខវេ, សុភន្តិ សញ្ញាវិបល្លាសោ ចិត្តវិបល្លាសោ ទិដ្ឋិវិបល្លាសោ។ ឥមេ ខោ, ភិក្ខវេ, ចត្តារោ សញ្ញាវិបល្លាសា ចិត្តវិបល្លាសា ទិដ្ឋិវិបល្លាសា។
236. Purimanidānaṃ . ‘‘Cattārome , bhikkhave 2, saññāvipallāsā cittavipallāsā diṭṭhivipallāsā. Katame cattāro? Anicce, bhikkhave, niccanti saññāvipallāso cittavipallāso diṭṭhivipallāso. Dukkhe, bhikkhave, sukhanti saññāvipallāso cittavipallāso diṭṭhivipallāso. Anattani, bhikkhave, attāti saññāvipallāso cittavipallāso diṭṭhivipallāso. Asubhe, bhikkhave, subhanti saññāvipallāso cittavipallāso diṭṭhivipallāso. Ime kho, bhikkhave, cattāro saññāvipallāsā cittavipallāsā diṭṭhivipallāsā.
‘‘ចត្តារោមេ, ភិក្ខវេ, នសញ្ញាវិបល្លាសា នចិត្តវិបល្លាសា នទិដ្ឋិវិបល្លាសា។ កតមេ ចត្តារោ? អនិច្ចេ, ភិក្ខវេ, អនិច្ចន្តិ នសញ្ញាវិបល្លាសោ នចិត្តវិបល្លាសោ នទិដ្ឋិវិបល្លាសោ។ ទុក្ខេ, ភិក្ខវេ, ទុក្ខន្តិ នសញ្ញាវិបល្លាសោ នចិត្តវិបល្លាសោ នទិដ្ឋិវិបល្លាសោ។ អនត្តនិ, ភិក្ខវេ, អនត្តាតិ នសញ្ញាវិបល្លាសោ នចិត្តវិបល្លាសោ នទិដ្ឋិវិបល្លាសោ។ អសុភេ, ភិក្ខវេ, អសុភន្តិ នសញ្ញាវិបល្លាសោ នចិត្តវិបល្លាសោ នទិដ្ឋិវិបល្លាសោ។ ឥមេ ខោ, ភិក្ខវេ, ចត្តារោ នសញ្ញាវិបល្លាសា នចិត្តវិបល្លាសា នទិដ្ឋិវិបល្លាសា’’តិ។
‘‘Cattārome, bhikkhave, nasaññāvipallāsā nacittavipallāsā nadiṭṭhivipallāsā. Katame cattāro? Anicce, bhikkhave, aniccanti nasaññāvipallāso nacittavipallāso nadiṭṭhivipallāso. Dukkhe, bhikkhave, dukkhanti nasaññāvipallāso nacittavipallāso nadiṭṭhivipallāso. Anattani, bhikkhave, anattāti nasaññāvipallāso nacittavipallāso nadiṭṭhivipallāso. Asubhe, bhikkhave, asubhanti nasaññāvipallāso nacittavipallāso nadiṭṭhivipallāso. Ime kho, bhikkhave, cattāro nasaññāvipallāsā nacittavipallāsā nadiṭṭhivipallāsā’’ti.
‘‘អនិច្ចេ និច្ចសញ្ញិនោ, ទុក្ខេ ច សុខសញ្ញិនោ;
‘‘Anicce niccasaññino, dukkhe ca sukhasaññino;
មិច្ឆាទិដ្ឋិហតា សត្តា, ខិត្តចិត្តា វិសញ្ញិនោ។
Micchādiṭṭhihatā sattā, khittacittā visaññino.
‘‘តេ យោគយុត្តា មារស្ស, អយោគក្ខេមិនោ ជនា;
‘‘Te yogayuttā mārassa, ayogakkhemino janā;
សត្តា គច្ឆន្តិ សំសារំ, ជាតិមរណគាមិនោ។
Sattā gacchanti saṃsāraṃ, jātimaraṇagāmino.
‘‘យទា ច ពុទ្ធា លោកស្មិំ, ឧប្បជ្ជន្តិ បភង្ករា;
‘‘Yadā ca buddhā lokasmiṃ, uppajjanti pabhaṅkarā;
តេ ឥមំ ធម្មំ បកាសេន្តិ, ទុក្ខូបសមគាមិនំ។
Te imaṃ dhammaṃ pakāsenti, dukkhūpasamagāminaṃ.
‘‘តេសំ សុត្វាន សប្បញ្ញា, សចិត្តំ បច្ចលទ្ធុ 5 តេ;
‘‘Tesaṃ sutvāna sappaññā, sacittaṃ paccaladdhu 6 te;
អនិច្ចំ អនិច្ចតោ ទក្ខុំ, ទុក្ខមទ្ទក្ខុ ទុក្ខតោ។
Aniccaṃ aniccato dakkhuṃ, dukkhamaddakkhu dukkhato.
‘‘អនត្តនិ អនត្តាតិ, អសុភំ អសុភតទ្ទសុំ;
‘‘Anattani anattāti, asubhaṃ asubhataddasuṃ;
សម្មាទិដ្ឋិសមាទានា, សព្ពំ ទុក្ខំ ឧបច្ចគុ’’ន្តិ។
Sammādiṭṭhisamādānā, sabbaṃ dukkhaṃ upaccagu’’nti.
ឥមេ ចត្តារោ វិបល្លាសា ទិដ្ឋិសម្បន្នស្ស បុគ្គលស្ស បហីនា, អប្បហីនាតិ។ កេចិ បហីនា, កេចិ អប្បហីនា? អនិច្ចេ និច្ចន្តិ សញ្ញាវិបល្លាសោ ចិត្តវិបល្លាសោ ទិដ្ឋិវិបល្លាសោ បហីនោ។ ទុក្ខេ សុខន្តិ សញ្ញា ឧប្បជ្ជតិ, ចិត្តំ ឧប្បជ្ជតិ, ទិដ្ឋិវិបល្លាសោ បហីនោ។ អនត្តនិ អត្តាតិ សញ្ញាវិបល្លាសោ ចិត្តវិបល្លាសោ ទិដ្ឋិវិបល្លាសោ បហីនោ។ អសុភេ សុភន្តិ សញ្ញា ឧប្បជ្ជតិ, ចិត្តំ ឧប្បជ្ជតិ, ទិដ្ឋិវិបល្លាសោ បហីនោ។ ទ្វីសុ វត្ថូសុ ឆ វិបល្លាសា បហីនា ។ ទ្វីសុ វត្ថូសុ ទ្វេ វិបល្លាសា បហីនា, ចត្តារោ វិបល្លាសា អប្បហីនា។ ចតូសុ វត្ថូសុ អដ្ឋ វិបល្លាសា បហីនា, ចត្តារោ វិបល្លាសា អប្បហីនាតិ។
Ime cattāro vipallāsā diṭṭhisampannassa puggalassa pahīnā, appahīnāti. Keci pahīnā, keci appahīnā? Anicce niccanti saññāvipallāso cittavipallāso diṭṭhivipallāso pahīno. Dukkhe sukhanti saññā uppajjati, cittaṃ uppajjati, diṭṭhivipallāso pahīno. Anattani attāti saññāvipallāso cittavipallāso diṭṭhivipallāso pahīno. Asubhe subhanti saññā uppajjati, cittaṃ uppajjati, diṭṭhivipallāso pahīno. Dvīsu vatthūsu cha vipallāsā pahīnā . Dvīsu vatthūsu dve vipallāsā pahīnā, cattāro vipallāsā appahīnā. Catūsu vatthūsu aṭṭha vipallāsā pahīnā, cattāro vipallāsā appahīnāti.
វិបល្លាសកថា និដ្ឋិតា។
Vipallāsakathā niṭṭhitā.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / បដិសម្ភិទាមគ្គ-អដ្ឋកថា • Paṭisambhidāmagga-aṭṭhakathā / វិបល្លាសកថាវណ្ណនា • Vipallāsakathāvaṇṇanā
