| Library / Tipiṭaka / តិបិដក • Tipiṭaka / បដិសម្ភិទាមគ្គបាឡិ • Paṭisambhidāmaggapāḷi |
៩. មគ្គកថា
9. Maggakathā
២៣៧. មគ្គោតិ កេនដ្ឋេន មគ្គោ? សោតាបត្តិមគ្គក្ខណេ ទស្សនដ្ឋេន សម្មាទិដ្ឋិ មិច្ឆាទិដ្ឋិយា បហានាយ មគ្គោ ចេវ ហេតុ ច, សហជាតានំ ធម្មានំ ឧបត្ថម្ភនាយ មគ្គោ ចេវ ហេតុ ច, កិលេសានំ បរិយាទានាយ មគ្គោ ចេវ ហេតុ ច, បដិវេធាទិវិសោធនាយ មគ្គោ ចេវ ហេតុ ច, ចិត្តស្ស អធិដ្ឋានាយ មគ្គោ ចេវ ហេតុ ច, ចិត្តស្ស វោទានាយ មគ្គោ ចេវ ហេតុ ច, វិសេសាធិគមាយ មគ្គោ ចេវ ហេតុ ច, ឧត្តរិ បដិវេធាយ 1 មគ្គោ ចេវ ហេតុ ច, សច្ចាភិសមយាយ មគ្គោ ចេវ ហេតុ ច, និរោធេ បតិដ្ឋាបនាយ មគ្គោ ចេវ ហេតុ ច។
237. Maggoti kenaṭṭhena maggo? Sotāpattimaggakkhaṇe dassanaṭṭhena sammādiṭṭhi micchādiṭṭhiyā pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca, paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa vodānāya maggo ceva hetu ca, visesādhigamāya maggo ceva hetu ca, uttari paṭivedhāya 2 maggo ceva hetu ca, saccābhisamayāya maggo ceva hetu ca, nirodhe patiṭṭhāpanāya maggo ceva hetu ca.
អភិនិរោបនដ្ឋេន សម្មាសង្កប្បោ មិច្ឆាសង្កប្បស្ស បហានាយ មគ្គោ ចេវ ហេតុ ច, សហជាតានំ ធម្មានំ ឧបត្ថម្ភនាយ មគ្គោ ចេវ ហេតុ ច, កិលេសានំ បរិយាទានាយ មគ្គោ ចេវ ហេតុ ច, បដិវេធាទិវិសោធនាយ មគ្គោ ចេវ ហេតុ ច, ចិត្តស្ស អធិដ្ឋានាយ មគ្គោ ចេវ ហេតុ ច, ចិត្តស្ស វោទានាយ មគ្គោ ចេវ ហេតុ ច, វិសេសាធិគមាយ មគ្គោ ចេវ ហេតុ ច, ឧត្តរិ បដិវេធាយ មគ្គោ ចេវ ហេតុ ច, សច្ចាភិសមយាយ មគ្គោ ចេវ ហេតុ ច, និរោធេ បតិដ្ឋាបនាយ មគ្គោ ចេវ ហេតុ ច។
Abhiniropanaṭṭhena sammāsaṅkappo micchāsaṅkappassa pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca, paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa vodānāya maggo ceva hetu ca, visesādhigamāya maggo ceva hetu ca, uttari paṭivedhāya maggo ceva hetu ca, saccābhisamayāya maggo ceva hetu ca, nirodhe patiṭṭhāpanāya maggo ceva hetu ca.
បរិគ្គហដ្ឋេន សម្មាវាចា មិច្ឆាវាចាយ បហានាយ មគ្គោ ចេវ ហេតុ ច, សហជាតានំ ធម្មានំ ឧបត្ថម្ភនាយ មគ្គោ ចេវ ហេតុ ច, កិលេសានំ បរិយាទានាយ មគ្គោ ចេវ ហេតុ ច, បដិវេធាទិវិសោធនាយ មគ្គោ ចេវ ហេតុ ច, ចិត្តស្ស អធិដ្ឋានាយ មគ្គោ ចេវ ហេតុ ច, ចិត្តស្ស វោទានាយ មគ្គោ ចេវ ហេតុ ច, វិសេសាធិគមាយ មគ្គោ ចេវ ហេតុ ច, ឧត្តរិ បដិវេធាយ មគ្គោ ចេវ ហេតុ ច, សច្ចាភិសមយាយ មគ្គោ ចេវ ហេតុ ច, និរោធេ បតិដ្ឋាបនាយ មគ្គោ ចេវ ហេតុ ច។
Pariggahaṭṭhena sammāvācā micchāvācāya pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca, paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa vodānāya maggo ceva hetu ca, visesādhigamāya maggo ceva hetu ca, uttari paṭivedhāya maggo ceva hetu ca, saccābhisamayāya maggo ceva hetu ca, nirodhe patiṭṭhāpanāya maggo ceva hetu ca.
សមុដ្ឋានដ្ឋេន សម្មាកម្មន្តោ មិច្ឆាកម្មន្តស្ស បហានាយ មគ្គោ ចេវ ហេតុ ច, សហជាតានំ ធម្មានំ ឧបត្ថម្ភនាយ មគ្គោ ចេវ ហេតុ ច, កិលេសានំ បរិយាទានាយ មគ្គោ ចេវ ហេតុ ច បដិវេធាទិវិសោធនាយ មគ្គោ ចេវ ហេតុ ច, ចិត្តស្ស អធិដ្ឋានាយ មគ្គោ ចេវ ហេតុ ច, ចិត្តស្ស វោទានាយ មគ្គោ ចេវ ហេតុ ច, វិសេសាធិគមាយ មគ្គោ ចេវ ហេតុ ច, ឧត្តរិ បដិវេធាយ មគ្គោ ចេវ ហេតុ ច, សច្ចាភិសមយាយ មគ្គោ ចេវ ហេតុ ច, និរោធេ បតិដ្ឋាបនាយ មគ្គោ ចេវ ហេតុ ច។
Samuṭṭhānaṭṭhena sammākammanto micchākammantassa pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa vodānāya maggo ceva hetu ca, visesādhigamāya maggo ceva hetu ca, uttari paṭivedhāya maggo ceva hetu ca, saccābhisamayāya maggo ceva hetu ca, nirodhe patiṭṭhāpanāya maggo ceva hetu ca.
វោទានដ្ឋេន សម្មាអាជីវោ មិច្ឆាអាជីវស្ស បហានាយ មគ្គោ ចេវ ហេតុ ច…បេ.… បគ្គហដ្ឋេន សម្មាវាយាមោ មិច្ឆាវាយាមស្ស បហានាយ មគ្គោ ចេវ ហេតុ ច…បេ.… ឧបដ្ឋានដ្ឋេន សម្មាសតិ មិច្ឆាសតិយា បហានាយ មគ្គោ ចេវ ហេតុ ច…បេ.… អវិក្ខេបដ្ឋេន សម្មាសមាធិ មិច្ឆាសមាធិស្ស បហានាយ មគ្គោ ចេវ ហេតុ ច, សហជាតានំ ធម្មានំ ឧបត្ថម្ភនាយ មគ្គោ ចេវ ហេតុ ច, កិលេសានំ បរិយាទានាយ មគ្គោ ចេវ ហេតុ ច, បដិវេធាទិវិសោធនាយ មគ្គោ ចេវ ហេតុ ច, ចិត្តស្ស អធិដ្ឋានាយ មគ្គោ ចេវ ហេតុ ច, ចិត្តស្ស វោទានាយ មគ្គោ ចេវ ហេតុ ច, វិសេសាធិគមាយ មគ្គោ ចេវ ហេតុ ច, ឧត្តរិ បដិវេធាយ មគ្គោ ចេវ ហេតុ ច, សច្ចាភិសមយាយ មគ្គោ ចេវ ហេតុ ច, និរោធេ បតិដ្ឋាបនាយ មគ្គោ ចេវ ហេតុ ច។
Vodānaṭṭhena sammāājīvo micchāājīvassa pahānāya maggo ceva hetu ca…pe… paggahaṭṭhena sammāvāyāmo micchāvāyāmassa pahānāya maggo ceva hetu ca…pe… upaṭṭhānaṭṭhena sammāsati micchāsatiyā pahānāya maggo ceva hetu ca…pe… avikkhepaṭṭhena sammāsamādhi micchāsamādhissa pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca, paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa vodānāya maggo ceva hetu ca, visesādhigamāya maggo ceva hetu ca, uttari paṭivedhāya maggo ceva hetu ca, saccābhisamayāya maggo ceva hetu ca, nirodhe patiṭṭhāpanāya maggo ceva hetu ca.
សកទាគាមិមគ្គក្ខណេ ទស្សនដ្ឋេន សម្មាទិដ្ឋិ…បេ.… អវិក្ខេបដ្ឋេន សម្មាសមាធិ ឱឡារិកស្ស កាមរាគសញ្ញោជនស្ស បដិឃសញ្ញោជនស្ស ឱឡារិកស្ស កាមរាគានុសយស្ស បដិឃានុសយស្ស បហានាយ មគ្គោ ចេវ ហេតុ ច, សហជាតានំ ធម្មានំ ឧបត្ថម្ភនាយ មគ្គោ ចេវ ហេតុ ច, កិលេសានំ បរិយាទានាយ មគ្គោ ចេវ ហេតុ ច, បដិវេធាទិវិសោធនាយ មគ្គោ ចេវ ហេតុ ច, ចិត្តស្ស អធិដ្ឋានាយ មគ្គោ ចេវ ហេតុ ច, ចិត្តស្ស វោទានាយ មគ្គោ ចេវ ហេតុ ច, វិសេសាធិគមាយ មគ្គោ ចេវ ហេតុ ច, ឧត្តរិ បដិវេធាយ មគ្គោ ចេវ ហេតុ ច, សច្ចាភិសមយាយ មគ្គោ ចេវ ហេតុ ច, និរោធេ បតិដ្ឋាបនាយ មគ្គោ ចេវ ហេតុ ច។
Sakadāgāmimaggakkhaṇe dassanaṭṭhena sammādiṭṭhi…pe… avikkhepaṭṭhena sammāsamādhi oḷārikassa kāmarāgasaññojanassa paṭighasaññojanassa oḷārikassa kāmarāgānusayassa paṭighānusayassa pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca, paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa vodānāya maggo ceva hetu ca, visesādhigamāya maggo ceva hetu ca, uttari paṭivedhāya maggo ceva hetu ca, saccābhisamayāya maggo ceva hetu ca, nirodhe patiṭṭhāpanāya maggo ceva hetu ca.
អនាគាមិមគ្គក្ខណេ ទស្សនដ្ឋេន សម្មាទិដ្ឋិ…បេ.… អវិក្ខេបដ្ឋេន សម្មាសមាធិ អនុសហគតស្ស កាមរាគសញ្ញោជនស្ស បដិឃសញ្ញោជនស្ស, អនុសហគតស្ស កាមរាគានុសយស្ស បដិឃានុសយស្ស បហានាយ មគ្គោ ចេវ ហេតុ ច, សហជាតានំ ធម្មានំ ឧបត្ថម្ភនាយ មគ្គោ ចេវ ហេតុ ច, កិលេសានំ បរិយាទានាយ មគ្គោ ចេវ ហេតុ ច, បដិវេធាទិវិសោធនាយ មគ្គោ ចេវ ហេតុ ច, ចិត្តស្ស អធិដ្ឋានាយ មគ្គោ ចេវ ហេតុ ច, ចិត្តស្ស វោទានាយ មគ្គោ ចេវ ហេតុ ច , វិសេសាធិគមាយ មគ្គោ ចេវ ហេតុ ច, ឧត្តរិ បដិវេធាយ មគ្គោ ចេវ ហេតុ ច, សច្ចាភិសមយាយ មគ្គោ ចេវ ហេតុ ច, និរោធេ បតិដ្ឋាបនាយ មគ្គោ ចេវ ហេតុ ច។
Anāgāmimaggakkhaṇe dassanaṭṭhena sammādiṭṭhi…pe… avikkhepaṭṭhena sammāsamādhi anusahagatassa kāmarāgasaññojanassa paṭighasaññojanassa, anusahagatassa kāmarāgānusayassa paṭighānusayassa pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca, paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa vodānāya maggo ceva hetu ca , visesādhigamāya maggo ceva hetu ca, uttari paṭivedhāya maggo ceva hetu ca, saccābhisamayāya maggo ceva hetu ca, nirodhe patiṭṭhāpanāya maggo ceva hetu ca.
អរហត្តមគ្គក្ខណេ ទស្សនដ្ឋេន សម្មាទិដ្ឋិ…បេ.… អវិក្ខេបដ្ឋេន សម្មាសមាធិ រូបរាគស្ស អរូបរាគស្ស មានស្ស ឧទ្ធច្ចស្ស អវិជ្ជាយ, មានានុសយស្ស ភវរាគានុសយស្ស អវិជ្ជានុសយស្ស បហានាយ មគ្គោ ចេវ ហេតុ ច, សហជាតានំ ធម្មានំ ឧបត្ថម្ភនាយ មគ្គោ ចេវ ហេតុ ច, កិលេសានំ បរិយាទានាយ មគ្គោ ចេវ ហេតុ ច, បដិវេធាទិវិសោធនាយ មគ្គោ ចេវ ហេតុ ច, ចិត្តស្ស អធិដ្ឋានាយ មគ្គោ ចេវ ហេតុ ច, ចិត្តស្ស, វោទានាយ មគ្គោ ចេវ ហេតុ ច, វិសេសាធិគមាយ មគ្គោ ចេវ ហេតុ ច, ឧត្តរិ បដិវេធាយ មគ្គោ ចេវ ហេតុ ច, សច្ចាភិសមយាយ មគ្គោ ចេវ, ហេតុ ច, និរោធេ បតិដ្ឋាបនាយ មគ្គោ ចេវ ហេតុ ច។
Arahattamaggakkhaṇe dassanaṭṭhena sammādiṭṭhi…pe… avikkhepaṭṭhena sammāsamādhi rūparāgassa arūparāgassa mānassa uddhaccassa avijjāya, mānānusayassa bhavarāgānusayassa avijjānusayassa pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca, paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa, vodānāya maggo ceva hetu ca, visesādhigamāya maggo ceva hetu ca, uttari paṭivedhāya maggo ceva hetu ca, saccābhisamayāya maggo ceva, hetu ca, nirodhe patiṭṭhāpanāya maggo ceva hetu ca.
ទស្សនមគ្គោ សម្មាទិដ្ឋិ, អភិនិរោបនមគ្គោ សម្មាសង្កប្បោ , បរិគ្គហមគ្គោ សម្មាវាចា, សមុដ្ឋានមគ្គោ សម្មាកម្មន្តោ, វោទានមគ្គោ សម្មាអាជីវោ, បគ្គហមគ្គោ សម្មាវាយាមោ, ឧបដ្ឋានមគ្គោ សម្មាសតិ, អវិក្ខេបមគ្គោ សម្មាសមាធិ។ ឧបដ្ឋានមគ្គោ សតិសម្ពោជ្ឈង្គោ, បវិចយមគ្គោ ធម្មវិចយសម្ពោជ្ឈង្គោ, បគ្គហមគ្គោ វីរិយសម្ពោជ្ឈង្គោ, ផរណមគ្គោ បីតិសម្ពោជ្ឈង្គោ, ឧបសមមគ្គោ បស្សទ្ធិសម្ពោជ្ឈង្គោ, អវិក្ខេបមគ្គោ សមាធិសម្ពោជ្ឈង្គោ, បដិសង្ខានមគ្គោ ឧបេក្ខាសម្ពោជ្ឈង្គោ។
Dassanamaggo sammādiṭṭhi, abhiniropanamaggo sammāsaṅkappo , pariggahamaggo sammāvācā, samuṭṭhānamaggo sammākammanto, vodānamaggo sammāājīvo, paggahamaggo sammāvāyāmo, upaṭṭhānamaggo sammāsati, avikkhepamaggo sammāsamādhi. Upaṭṭhānamaggo satisambojjhaṅgo, pavicayamaggo dhammavicayasambojjhaṅgo, paggahamaggo vīriyasambojjhaṅgo, pharaṇamaggo pītisambojjhaṅgo, upasamamaggo passaddhisambojjhaṅgo, avikkhepamaggo samādhisambojjhaṅgo, paṭisaṅkhānamaggo upekkhāsambojjhaṅgo.
អស្សទ្ធិយេ អកម្បិយមគ្គោ សទ្ធាពលំ, កោសជ្ជេ អកម្បិយមគ្គោ វីរិយពលំ, បមាទេ អកម្បិយមគ្គោ សតិពលំ, ឧទ្ធច្ចេ អកម្បិយមគ្គោ សមាធិពលំ, អវិជ្ជាយ អកម្បិយមគ្គោ បញ្ញាពលំ។ អធិមោក្ខមគ្គោ សទ្ធិន្ទ្រិយំ, បគ្គហមគ្គោ វីរិយិន្ទ្រិយំ, ឧបដ្ឋានមគ្គោ សតិន្ទ្រិយំ, អវិក្ខេបមគ្គោ សមាធិន្ទ្រិយំ, ទស្សនមគ្គោ បញ្ញិន្ទ្រិយំ។
Assaddhiye akampiyamaggo saddhābalaṃ, kosajje akampiyamaggo vīriyabalaṃ, pamāde akampiyamaggo satibalaṃ, uddhacce akampiyamaggo samādhibalaṃ, avijjāya akampiyamaggo paññābalaṃ. Adhimokkhamaggo saddhindriyaṃ, paggahamaggo vīriyindriyaṃ, upaṭṭhānamaggo satindriyaṃ, avikkhepamaggo samādhindriyaṃ, dassanamaggo paññindriyaṃ.
អាធិបតេយ្យដ្ឋេន ឥន្ទ្រិយា មគ្គោ, អកម្បិយដ្ឋេន ពលា មគ្គោ, និយ្យានដ្ឋេន ពោជ្ឈង្គា មគ្គោ, ហេតុដ្ឋេន មគ្គង្គា មគ្គោ, ឧបដ្ឋានដ្ឋេន សតិបដ្ឋានា មគ្គោ, បទហនដ្ឋេន សម្មប្បធានា មគ្គោ, ឥជ្ឈនដ្ឋេន ឥទ្ធិបាទា មគ្គោ, តថដ្ឋេន សច្ចានិ មគ្គោ, អវិក្ខេបដ្ឋេន សមថោ មគ្គោ, អនុបស្សនដ្ឋេន វិបស្សនា មគ្គោ, ឯករសដ្ឋេន សមថវិបស្សនា មគ្គោ, អនតិវត្តនដ្ឋេន យុគនទ្ធា មគ្គោ, សំវរដ្ឋេន សីលវិសុទ្ធិ មគ្គោ, អវិក្ខេបដ្ឋេន ចិត្តវិសុទ្ធិ មគ្គោ, ទស្សនដ្ឋេន ទិដ្ឋិវិសុទ្ធិ មគ្គោ, មុត្តដ្ឋេន វិមោក្ខោ មគ្គោ, បដិវេធដ្ឋេន វិជ្ជា មគ្គោ, បរិច្ចាគដ្ឋេន វិមុត្តិ មគ្គោ, សមុច្ឆេទដ្ឋេន ខយេ ញាណំ មគ្គោ, ឆន្ទោ មូលដ្ឋេន មគ្គោ, មនសិការោ សមុដ្ឋានដ្ឋេន មគ្គោ, ផស្សោ សមោធានដ្ឋេន មគ្គោ, វេទនា សមោសរណដ្ឋេន មគ្គោ, សមាធិ បមុខដ្ឋេន មគ្គោ, សតិ អាធិបតេយ្យដ្ឋេន មគ្គោ, បញ្ញា តតុត្តរដ្ឋេន មគ្គោ, វិមុត្តិ សារដ្ឋេន មគ្គោ, អមតោគធំ និព្ពានំ បរិយោសានដ្ឋេន មគ្គោតិ។
Ādhipateyyaṭṭhena indriyā maggo, akampiyaṭṭhena balā maggo, niyyānaṭṭhena bojjhaṅgā maggo, hetuṭṭhena maggaṅgā maggo, upaṭṭhānaṭṭhena satipaṭṭhānā maggo, padahanaṭṭhena sammappadhānā maggo, ijjhanaṭṭhena iddhipādā maggo, tathaṭṭhena saccāni maggo, avikkhepaṭṭhena samatho maggo, anupassanaṭṭhena vipassanā maggo, ekarasaṭṭhena samathavipassanā maggo, anativattanaṭṭhena yuganaddhā maggo, saṃvaraṭṭhena sīlavisuddhi maggo, avikkhepaṭṭhena cittavisuddhi maggo, dassanaṭṭhena diṭṭhivisuddhi maggo, muttaṭṭhena vimokkho maggo, paṭivedhaṭṭhena vijjā maggo, pariccāgaṭṭhena vimutti maggo, samucchedaṭṭhena khaye ñāṇaṃ maggo, chando mūlaṭṭhena maggo, manasikāro samuṭṭhānaṭṭhena maggo, phasso samodhānaṭṭhena maggo, vedanā samosaraṇaṭṭhena maggo, samādhi pamukhaṭṭhena maggo, sati ādhipateyyaṭṭhena maggo, paññā tatuttaraṭṭhena maggo, vimutti sāraṭṭhena maggo, amatogadhaṃ nibbānaṃ pariyosānaṭṭhena maggoti.
មគ្គកថា និដ្ឋិតា។
Maggakathā niṭṭhitā.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / បដិសម្ភិទាមគ្គ-អដ្ឋកថា • Paṭisambhidāmagga-aṭṭhakathā / មគ្គកថាវណ្ណនា • Maggakathāvaṇṇanā
