| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
৭. সত্তমৰগ্গো
7. Sattamavaggo
(৭২) ১০. ৰিপাকো ৰিপাকধম্মধম্মোতিকথা
(72) 10. Vipāko vipākadhammadhammotikathā
৫০১. ৰিপাকো ৰিপাকধম্মধম্মোতি? আমন্তা। তস্স ৰিপাকো ৰিপাকধম্মধম্মোতি? ন হেৰং ৰত্তব্বে…পে॰… তস্স ৰিপাকো ৰিপাকধম্মধম্মোতি? আমন্তা। তস্স তস্সেৰ নত্থি দুক্খস্স অন্তকিরিযা নত্থি ৰট্টুপচ্ছেদো নত্থি অনুপাদাপরিনিব্বানন্তি? ন হেৰং ৰত্তব্বে…পে॰…।
501. Vipāko vipākadhammadhammoti? Āmantā. Tassa vipāko vipākadhammadhammoti? Na hevaṃ vattabbe…pe… tassa vipāko vipākadhammadhammoti? Āmantā. Tassa tasseva natthi dukkhassa antakiriyā natthi vaṭṭupacchedo natthi anupādāparinibbānanti? Na hevaṃ vattabbe…pe….
ৰিপাকো ৰিপাকধম্মধম্মোতি? আমন্তা। ৰিপাকোতি ৰা ৰিপাকধম্মধম্মোতি ৰা ৰিপাকধম্মধম্মোতি ৰা ৰিপাকোতি ৰা এসেসে একট্ঠে সমে সমভাগে তজ্জাতেতি? ন হেৰং ৰত্তব্বে…পে॰…।
Vipāko vipākadhammadhammoti? Āmantā. Vipākoti vā vipākadhammadhammoti vā vipākadhammadhammoti vā vipākoti vā esese ekaṭṭhe same samabhāge tajjāteti? Na hevaṃ vattabbe…pe….
ৰিপাকো ৰিপাকধম্মধম্মোতি? আমন্তা। ৰিপাকো চ ৰিপাকধম্মধম্মো চ ৰিপাকধম্মধম্মো চ ৰিপাকো চ সহগতা সহজাতা সংসট্ঠা সম্পযুত্তা একুপ্পাদা একনিরোধা একৰত্থুকা একারম্মণাতি? ন হেৰং ৰত্তব্বে…পে॰…।
Vipāko vipākadhammadhammoti? Āmantā. Vipāko ca vipākadhammadhammo ca vipākadhammadhammo ca vipāko ca sahagatā sahajātā saṃsaṭṭhā sampayuttā ekuppādā ekanirodhā ekavatthukā ekārammaṇāti? Na hevaṃ vattabbe…pe….
ৰিপাকো ৰিপাকধম্মধম্মোতি? আমন্তা। তঞ্ঞেৰ অকুসলং সো অকুসলস্স ৰিপাকো, তঞ্ঞেৰ কুসলং সো কুসলস্স ৰিপাকোতি? ন হেৰং ৰত্তব্বে…পে॰…।
Vipāko vipākadhammadhammoti? Āmantā. Taññeva akusalaṃ so akusalassa vipāko, taññeva kusalaṃ so kusalassa vipākoti? Na hevaṃ vattabbe…pe….
ৰিপাকো ৰিপাকধম্মধম্মোতি? আমন্তা। যেনেৰ চিত্তেন পাণং হনতি তেনেৰ চিত্তেন নিরযে পচ্চতি, যেনেৰ চিত্তেন দানং দেতি তেনেৰ চিত্তেন সগ্গে মোদতীতি? ন হেৰং ৰত্তব্বে…পে॰…।
Vipāko vipākadhammadhammoti? Āmantā. Yeneva cittena pāṇaṃ hanati teneva cittena niraye paccati, yeneva cittena dānaṃ deti teneva cittena sagge modatīti? Na hevaṃ vattabbe…pe….
৫০২. ন ৰত্তব্বং – ‘‘ৰিপাকো ৰিপাকধম্মধম্মো’’তি? আমন্তা। ননু ৰিপাকা চত্তারো খন্ধা অরূপিনো অঞ্ঞমঞ্ঞপচ্চযাতি? আমন্তা। হঞ্চি ৰিপাকা চত্তারো খন্ধা অরূপিনো অঞ্ঞমঞ্ঞপচ্চযা, তেন ৰত রে ৰত্তব্বে – ‘‘ৰিপাকো ৰিপাকধম্মধম্মো’’তি।
502. Na vattabbaṃ – ‘‘vipāko vipākadhammadhammo’’ti? Āmantā. Nanu vipākā cattāro khandhā arūpino aññamaññapaccayāti? Āmantā. Hañci vipākā cattāro khandhā arūpino aññamaññapaccayā, tena vata re vattabbe – ‘‘vipāko vipākadhammadhammo’’ti.
ৰিপাকো ৰিপাকধম্মধম্মোতিকথা নিট্ঠিতা।
Vipāko vipākadhammadhammotikathā niṭṭhitā.
সত্তমৰগ্গো।
Sattamavaggo.
তস্সুদ্দানং –
Tassuddānaṃ –
সঙ্গহো , সম্পযুত্তো, চেতসিকো ধম্মো, চেতসিকং দানং, পরিভোগমযং পুঞ্ঞং ৰড্ঢতি, ইতো দিন্নেন তত্থ যাপেন্তি, পথৰী কম্মৰিপাকো, জরামরণং ৰিপাকো, নত্থি অরিযধম্মৰিপাকো, ৰিপাকো ৰিপাকধম্মধম্মোতি।
Saṅgaho , sampayutto, cetasiko dhammo, cetasikaṃ dānaṃ, paribhogamayaṃ puññaṃ vaḍḍhati, ito dinnena tattha yāpenti, pathavī kammavipāko, jarāmaraṇaṃ vipāko, natthi ariyadhammavipāko, vipāko vipākadhammadhammoti.
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ১০. ৰিপাকো ৰিপাকধম্মধম্মোতিকথাৰণ্ণনা • 10. Vipāko vipākadhammadhammotikathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ১০. ৰিপাকোৰিপাকধম্মধম্মোতিকথাৰণ্ণনা • 10. Vipākovipākadhammadhammotikathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ১০. ৰিপাকোৰিপাকধম্মধম্মোতিকথাৰণ্ণনা • 10. Vipākovipākadhammadhammotikathāvaṇṇanā
