| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၁၀. ဝိညတ္တိ သီလန္တိကထာဝဏ္ဏနာ
10. Viññatti sīlantikathāvaṇṇanā
၆၀၁-၆၀၂. ဣဒာနိ ဝိညတ္တိ သီလန္တိကထာ နာမ ဟောတိ။ တတ္ထ ကာယဝိညတ္တိ ကာယကမ္မံ, ဝစီဝိညတ္တိ ဝစီကမ္မန္တိ ဂဟိတတ္တာ ‘‘ဝိညတ္တိ သီလ’’န္တိ ယေသံ လဒ္ဓိ, သေယ္ယထာပိ မဟာသံဃိကာနဉ္စေဝ သမ္မိတိယာနဉ္စ; တေ သန္ဓာယ ဝိညတ္တီတိ ပုစ္ဆာ သကဝာဒိသ္သ, ပဋိညာ ဣတရသ္သ။ အထ နံ ယသ္မာ သီလံ နာမ ဝိရတိ, န ရူပဓမ္မော, တသ္မာ တေနတ္ထေန စောဒေတုံ ပာဏာတိပာတာ ဝေရမဏီတိအာဒိမာဟ။ အဘိဝာဒနံ သီလန္တိအာဒိ ယထာရူပံ ဝိညတ္တိံ သော ‘‘သီလ’’န္တိ မညတိ တံ ဥဒ္ဓရိတ္ဝာ ဒသ္သေတုံ ဝုတ္တံ။ ယသ္မာ ပန သာ ဝိရတိ န ဟောတိ, တသ္မာ ပုန ပာဏာတိပာတာတိအာဒိမာဟ။ လဒ္ဓိ ပနသ္သ ဆလေန ပတိဋ္ဌိတတ္တာ အပ္ပတိဋ္ဌိတာယေဝာတိ။
601-602. Idāni viññatti sīlantikathā nāma hoti. Tattha kāyaviññatti kāyakammaṃ, vacīviññatti vacīkammanti gahitattā ‘‘viññatti sīla’’nti yesaṃ laddhi, seyyathāpi mahāsaṃghikānañceva sammitiyānañca; te sandhāya viññattīti pucchā sakavādissa, paṭiññā itarassa. Atha naṃ yasmā sīlaṃ nāma virati, na rūpadhammo, tasmā tenatthena codetuṃ pāṇātipātā veramaṇītiādimāha. Abhivādanaṃ sīlantiādi yathārūpaṃ viññattiṃ so ‘‘sīla’’nti maññati taṃ uddharitvā dassetuṃ vuttaṃ. Yasmā pana sā virati na hoti, tasmā puna pāṇātipātātiādimāha. Laddhi panassa chalena patiṭṭhitattā appatiṭṭhitāyevāti.
ဝိညတ္တိ သီလန္တိကထာဝဏ္ဏနာ။
Viññatti sīlantikathāvaṇṇanā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၁၀၄) ၁၀. ဝိညတ္တိ သီလန္တိကထာ • (104) 10. Viññatti sīlantikathā
