| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
3. வீமங்ஸனபஞ்ஹோ
3. Vīmaṃsanapañho
3. ராஜா ஆஹ ‘‘ப⁴ந்தே நாக³ஸேன, ஸல்லபிஸ்ஸஸி மயா ஸத்³தி⁴’’ந்தி? ‘‘ஸசே, த்வங் மஹாராஜ, பண்டி³தவாத³ங் 1 ஸல்லபிஸ்ஸஸி ஸல்லபிஸ்ஸாமி, ஸசே பன ராஜவாத³ங் ஸல்லபிஸ்ஸஸி ந ஸல்லபிஸ்ஸாமீ’’தி. ‘‘கத²ங், ப⁴ந்தே நாக³ஸேன, பண்டி³தா ஸல்லபந்தீ’’தி? ‘‘பண்டி³தானங் கோ², மஹாராஜ, ஸல்லாபே ஆவேட²னம்பி கயிரதி, நிப்³பே³ட²னம்பி கயிரதி, நிக்³க³ஹோபி கயிரதி, படிகம்மம்பி கயிரதி, விஸ்ஸாஸோபி 2 கயிரதி, படிவிஸ்ஸாஸோபி கயிரதி, ந ச தேன பண்டி³தா குப்பந்தி, ஏவங் கோ², மஹாராஜ, பண்டி³தா ஸல்லபந்தீ’’தி. ‘‘கத²ங் பன, ப⁴ந்தே, ராஜானோ ஸல்லபந்தீ’’தி? ‘‘ராஜானோ கோ², மஹாராஜ, ஸல்லாபே ஏகங் வத்து²ங் படிஜானந்தி, யோ தங் வத்து²ங் விலோமேதி, தஸ்ஸ த³ண்ட³ங் ஆணாபெந்தி ‘இமஸ்ஸ த³ண்ட³ங் பணேதா²’தி, ஏவங் கோ², மஹாராஜ, ராஜானோ ஸல்லபந்தீ’’தி. ‘‘பண்டி³தவாதா³ஹங், ப⁴ந்தே, ஸல்லபிஸ்ஸாமி, நோ ராஜவாத³ங், விஸ்ஸட்டோ² ப⁴த³ந்தோ ஸல்லபது யதா² பி⁴க்கு²னா வா ஸாமணேரேன வா உபாஸகேன வா ஆராமிகேன வா ஸத்³தி⁴ங் ஸல்லபதி , ஏவங் விஸ்ஸட்டோ² ப⁴த³ந்தோ ஸல்லபது மா பா⁴யதூ’’தி. ‘‘ஸுட்டு² மஹாராஜா’’தி தே²ரோ அப்³பா⁴னுமோதி³.
3. Rājā āha ‘‘bhante nāgasena, sallapissasi mayā saddhi’’nti? ‘‘Sace, tvaṃ mahārāja, paṇḍitavādaṃ 3 sallapissasi sallapissāmi, sace pana rājavādaṃ sallapissasi na sallapissāmī’’ti. ‘‘Kathaṃ, bhante nāgasena, paṇḍitā sallapantī’’ti? ‘‘Paṇḍitānaṃ kho, mahārāja, sallāpe āveṭhanampi kayirati, nibbeṭhanampi kayirati, niggahopi kayirati, paṭikammampi kayirati, vissāsopi 4 kayirati, paṭivissāsopi kayirati, na ca tena paṇḍitā kuppanti, evaṃ kho, mahārāja, paṇḍitā sallapantī’’ti. ‘‘Kathaṃ pana, bhante, rājāno sallapantī’’ti? ‘‘Rājāno kho, mahārāja, sallāpe ekaṃ vatthuṃ paṭijānanti, yo taṃ vatthuṃ vilometi, tassa daṇḍaṃ āṇāpenti ‘imassa daṇḍaṃ paṇethā’ti, evaṃ kho, mahārāja, rājāno sallapantī’’ti. ‘‘Paṇḍitavādāhaṃ, bhante, sallapissāmi, no rājavādaṃ, vissaṭṭho bhadanto sallapatu yathā bhikkhunā vā sāmaṇerena vā upāsakena vā ārāmikena vā saddhiṃ sallapati , evaṃ vissaṭṭho bhadanto sallapatu mā bhāyatū’’ti. ‘‘Suṭṭhu mahārājā’’ti thero abbhānumodi.
ராஜா ஆஹ ‘‘ப⁴ந்தே நாக³ஸேன, புச்சி²ஸ்ஸாமீ’’தி. ‘‘புச்ச² மஹாராஜா’’தி. ‘‘புச்சி²தோஸி மே ப⁴ந்தே’’தி. ‘‘விஸஜ்ஜிதங் மஹாராஜா’’தி. ‘‘கிங் பன, ப⁴ந்தே, தயா விஸஜ்ஜித’’ந்தி? ‘‘கிங் பன, மஹாராஜ, தயா புச்சி²த’’ந்தி.
Rājā āha ‘‘bhante nāgasena, pucchissāmī’’ti. ‘‘Puccha mahārājā’’ti. ‘‘Pucchitosi me bhante’’ti. ‘‘Visajjitaṃ mahārājā’’ti. ‘‘Kiṃ pana, bhante, tayā visajjita’’nti? ‘‘Kiṃ pana, mahārāja, tayā pucchita’’nti.
வீமங்ஸனபஞ்ஹோ ததியோ.
Vīmaṃsanapañho tatiyo.
Footnotes:
