| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
4. அனந்தகாயபஞ்ஹோ
4. Anantakāyapañho
4. அத² கோ² மிலிந்த³ஸ்ஸ ரஞ்ஞோ ஏதத³ஹோஸி ‘‘பண்டி³தோ கோ² அயங் பி⁴க்கு² படிப³லோ மயா ஸத்³தி⁴ங் ஸல்லபிதுங், ப³ஹுகானி ச மே டா²னானி புச்சி²தப்³பா³னி ப⁴விஸ்ஸந்தி, யாவ அபுச்சி²தானி யேவ தானி டா²னானி ப⁴விஸ்ஸந்தி, அத² ஸூரியோ அத்த²ங் க³மிஸ்ஸதி, யங்னூனாஹங் ஸ்வே அந்தேபுரே ஸல்லபெய்ய’’ந்தி. அத² கோ² ராஜா தே³வமந்தியங் ஏதத³வோச ‘‘தேன ஹி, த்வங் தே³வமந்திய, ப⁴த³ந்தஸ்ஸ ஆரோசெய்யாஸி ‘ஸ்வே அந்தேபுரே ரஞ்ஞா ஸத்³தி⁴ங் ஸல்லாபோ ப⁴விஸ்ஸதீ’’’தி. இத³ங் வத்வா மிலிந்தோ³ ராஜா உட்டா²யாஸனா தே²ரங் நாக³ஸேனங் ஆபுச்சி²த்வா ரத²ங் அபி⁴ரூஹித்வா ‘‘நாக³ஸேனோ நாக³ஸேனோ’’தி ஸஜ்ஜா²யங் கரொந்தோ பக்காமி.
4. Atha kho milindassa rañño etadahosi ‘‘paṇḍito kho ayaṃ bhikkhu paṭibalo mayā saddhiṃ sallapituṃ, bahukāni ca me ṭhānāni pucchitabbāni bhavissanti, yāva apucchitāni yeva tāni ṭhānāni bhavissanti, atha sūriyo atthaṃ gamissati, yaṃnūnāhaṃ sve antepure sallapeyya’’nti. Atha kho rājā devamantiyaṃ etadavoca ‘‘tena hi, tvaṃ devamantiya, bhadantassa āroceyyāsi ‘sve antepure raññā saddhiṃ sallāpo bhavissatī’’’ti. Idaṃ vatvā milindo rājā uṭṭhāyāsanā theraṃ nāgasenaṃ āpucchitvā rathaṃ abhirūhitvā ‘‘nāgaseno nāgaseno’’ti sajjhāyaṃ karonto pakkāmi.
அத² கோ² தே³வமந்தியோ ஆயஸ்மந்தங் நாக³ஸேனங் ஏதத³வோச ‘‘ராஜா, ப⁴ந்தே, மிலிந்தோ³ ஏவமாஹ ‘ஸ்வே அந்தேபுரே ரஞ்ஞா ஸத்³தி⁴ங் ஸல்லாபோ ப⁴விஸ்ஸதீ’’’தி. ‘‘ஸுட்டூ²’’தி தே²ரோ அப்³பா⁴னுமோதி³. அத² கோ² தஸ்ஸா ரத்தியா அச்சயேன தே³வமந்தியோ ச அனந்தகாயோ ச மங்குரோ ச ஸப்³ப³தி³ன்னோ ச யேன மிலிந்தோ³ ராஜா தேனுபஸங்கமிங்ஸு, உபஸங்கமித்வா ராஜானங் மிலிந்த³ங் ஏதத³வோசுங் ‘‘ஆக³ச்ச²து, மஹாராஜ, ப⁴த³ந்தோ நாக³ஸேனோ’’தி ? ‘‘ஆம ஆக³ச்ச²தூ’’தி. ‘‘கித்தகேஹி பி⁴க்கூ²ஹி ஸத்³தி⁴ங் ஆக³ச்ச²தூ’’தி? ‘‘யத்தகே பி⁴க்கூ² இச்ச²தி, தத்தகேஹி பி⁴க்கூ²ஹி ஸத்³தி⁴ங் ஆக³ச்ச²தூ’’தி.
Atha kho devamantiyo āyasmantaṃ nāgasenaṃ etadavoca ‘‘rājā, bhante, milindo evamāha ‘sve antepure raññā saddhiṃ sallāpo bhavissatī’’’ti. ‘‘Suṭṭhū’’ti thero abbhānumodi. Atha kho tassā rattiyā accayena devamantiyo ca anantakāyo ca maṅkuro ca sabbadinno ca yena milindo rājā tenupasaṅkamiṃsu, upasaṅkamitvā rājānaṃ milindaṃ etadavocuṃ ‘‘āgacchatu, mahārāja, bhadanto nāgaseno’’ti ? ‘‘Āma āgacchatū’’ti. ‘‘Kittakehi bhikkhūhi saddhiṃ āgacchatū’’ti? ‘‘Yattake bhikkhū icchati, tattakehi bhikkhūhi saddhiṃ āgacchatū’’ti.
அத² கோ² ஸப்³ப³தி³ன்னோ ஆஹ ‘‘ஆக³ச்ச²து, மஹாராஜ, த³ஸஹி பி⁴க்கூ²ஹி ஸத்³தி⁴’’ந்தி, து³தியம்பி கோ² ராஜா ஆஹ ‘‘யத்தகே பி⁴க்கூ² இச்ச²தி, தத்தகேஹி பி⁴க்கூ²ஹி ஸத்³தி⁴ங் ஆக³ச்ச²தூ’’தி . து³தியம்பி கோ² ஸப்³ப³தி³ன்னோ ஆஹ ‘‘ஆக³ச்ச²து, மஹாராஜ, த³ஸஹி பி⁴க்கூ²ஹி ஸத்³தி⁴’’ந்தி. ததியம்பி கோ² ராஜா ஆஹ ‘‘யத்தகே பி⁴க்கூ² இச்ச²தி, தத்தகேஹி பி⁴க்கூ²ஹி ஸத்³தி⁴ங் ஆக³ச்ச²தூ’’தி. ததியம்பி கோ² ஸப்³ப³தி³ன்னோ ஆஹ ‘‘ஆக³ச்ச²து, மஹாராஜ, த³ஸஹி பி⁴க்கூ²ஹி ஸத்³தி⁴’’ந்தி. ‘‘ஸப்³போ³ பனாயங் ஸக்காரோ படியாதி³தோ, அஹங் ப⁴ணாமி ‘யத்தகே பி⁴க்கூ² இச்ச²தி, தத்தகேஹி பி⁴க்கூ²ஹி ஸத்³தி⁴ங் ஆக³ச்ச²தூ’தி. அயங், ப⁴ணே ஸப்³ப³தி³ன்னோ, அஞ்ஞதா² ப⁴ணதி, கிங் நு மயங் நப்படிப³லா பி⁴க்கூ²னங் போ⁴ஜனங் தா³து’’ந்தி? ஏவங் வுத்தே ஸப்³ப³தி³ன்னோ மங்கு அஹோஸி.
Atha kho sabbadinno āha ‘‘āgacchatu, mahārāja, dasahi bhikkhūhi saddhi’’nti, dutiyampi kho rājā āha ‘‘yattake bhikkhū icchati, tattakehi bhikkhūhi saddhiṃ āgacchatū’’ti . Dutiyampi kho sabbadinno āha ‘‘āgacchatu, mahārāja, dasahi bhikkhūhi saddhi’’nti. Tatiyampi kho rājā āha ‘‘yattake bhikkhū icchati, tattakehi bhikkhūhi saddhiṃ āgacchatū’’ti. Tatiyampi kho sabbadinno āha ‘‘āgacchatu, mahārāja, dasahi bhikkhūhi saddhi’’nti. ‘‘Sabbo panāyaṃ sakkāro paṭiyādito, ahaṃ bhaṇāmi ‘yattake bhikkhū icchati, tattakehi bhikkhūhi saddhiṃ āgacchatū’ti. Ayaṃ, bhaṇe sabbadinno, aññathā bhaṇati, kiṃ nu mayaṃ nappaṭibalā bhikkhūnaṃ bhojanaṃ dātu’’nti? Evaṃ vutte sabbadinno maṅku ahosi.
அத² கோ² தே³வமந்தியோ ச அனந்தகாயோ ச மங்குரோ ச யேனாயஸ்மா நாக³ஸேனோ தேனுபஸங்கமிங்ஸு, உபஸங்கமித்வா ஆயஸ்மந்தங் நாக³ஸேனங் ஏதத³வோசுங் ‘‘ராஜா, ப⁴ந்தே, மிலிந்தோ³ ஏவமாஹ ‘யத்தகே பி⁴க்கூ² இச்ச²தி, தத்தகேஹி பி⁴க்கூ²ஹி ஸத்³தி⁴ங் ஆக³ச்ச²தூ’’’தி. அத² கோ² ஆயஸ்மா நாக³ஸேனோ புப்³ப³ண்ஹஸமயங் நிவாஸெத்வா பத்தசீவரமாதா³ய அஸீதியா பி⁴க்கு²ஸஹஸ்ஸேஹி ஸத்³தி⁴ங் ஸாக³லங் பாவிஸி.
Atha kho devamantiyo ca anantakāyo ca maṅkuro ca yenāyasmā nāgaseno tenupasaṅkamiṃsu, upasaṅkamitvā āyasmantaṃ nāgasenaṃ etadavocuṃ ‘‘rājā, bhante, milindo evamāha ‘yattake bhikkhū icchati, tattakehi bhikkhūhi saddhiṃ āgacchatū’’’ti. Atha kho āyasmā nāgaseno pubbaṇhasamayaṃ nivāsetvā pattacīvaramādāya asītiyā bhikkhusahassehi saddhiṃ sāgalaṃ pāvisi.
அத² கோ² அனந்தகாயோ ஆயஸ்மந்தங் நாக³ஸேனங் நிஸ்ஸாய க³ச்ச²ந்தோ ஆயஸ்மந்தங் நாக³ஸேனங் ஏதத³வோச ‘‘ப⁴ந்தே நாக³ஸேன, யங் பனேதங் ப்³ரூஸி ‘நாக³ஸேனோ’தி, கதமோ எத்த², நாக³ஸேனோ’’தி? தே²ரோ ஆஹ ‘‘கோ பனெத்த² ‘நாக³ஸேனோ’தி மஞ்ஞஸீ’’தி? ‘‘யோ ஸோ, ப⁴ந்தே, அப்³ப⁴ந்தரே வாதோ ஜீவோ பவிஸதி ச நிக்க²மதி ச, ஸோ ‘நாக³ஸேனோ’தி மஞ்ஞாமீ’’தி. ‘‘யதி³ பனேஸோ வாதோ நிக்க²மித்வா நப்பவிஸெய்ய, பவிஸித்வா ந நிக்க²மெய்ய, ஜீவெய்ய நு கோ² ஸோ புரிஸோ’’தி? ‘‘ந ஹி ப⁴ந்தே’’தி . ‘‘யே பனிமே ஸங்க²த⁴மகா ஸங்க²ங் த⁴மெந்தி, தேஸங் வாதோ புன பவிஸதீ’’தி? ‘‘ந ஹி ப⁴ந்தே’’தி. ‘‘யே பனிமே வங்ஸத⁴மகா வங்ஸங் த⁴மெந்தி, தேஸங் வாதோ புன பவிஸதீ’’தி? ‘‘ந ஹி ப⁴ந்தே’’தி. ‘‘யே பனிமே ஸிங்க³த⁴மகா ஸிங்க³ங் த⁴மெந்தி, தேஸங் வாதோ புன பவிஸதீ’’தி? ‘‘ந ஹி ப⁴ந்தே’’தி. ‘‘அத² கிஸ்ஸ பன தேன ந மரந்தீ’’தி. ‘‘நாஹங் படிப³லோ தயா வாதி³னா ஸத்³தி⁴ங் ஸல்லபிதுங், ஸாது⁴, ப⁴ந்தே, அத்த²ங் ஜப்பேஹீ’’தி. ‘‘நேஸோ ஜீவோ, அஸ்ஸாஸபஸ்ஸாஸா நாமேதே காயஸங்கா²ரா’’தி தே²ரோ அபி⁴த⁴ம்மகத²ங் கதே²ஸி. அத² அனந்தகாயோ உபாஸகத்தங் படிவேதே³ஸீதி.
Atha kho anantakāyo āyasmantaṃ nāgasenaṃ nissāya gacchanto āyasmantaṃ nāgasenaṃ etadavoca ‘‘bhante nāgasena, yaṃ panetaṃ brūsi ‘nāgaseno’ti, katamo ettha, nāgaseno’’ti? Thero āha ‘‘ko panettha ‘nāgaseno’ti maññasī’’ti? ‘‘Yo so, bhante, abbhantare vāto jīvo pavisati ca nikkhamati ca, so ‘nāgaseno’ti maññāmī’’ti. ‘‘Yadi paneso vāto nikkhamitvā nappaviseyya, pavisitvā na nikkhameyya, jīveyya nu kho so puriso’’ti? ‘‘Na hi bhante’’ti . ‘‘Ye panime saṅkhadhamakā saṅkhaṃ dhamenti, tesaṃ vāto puna pavisatī’’ti? ‘‘Na hi bhante’’ti. ‘‘Ye panime vaṃsadhamakā vaṃsaṃ dhamenti, tesaṃ vāto puna pavisatī’’ti? ‘‘Na hi bhante’’ti. ‘‘Ye panime siṅgadhamakā siṅgaṃ dhamenti, tesaṃ vāto puna pavisatī’’ti? ‘‘Na hi bhante’’ti. ‘‘Atha kissa pana tena na marantī’’ti. ‘‘Nāhaṃ paṭibalo tayā vādinā saddhiṃ sallapituṃ, sādhu, bhante, atthaṃ jappehī’’ti. ‘‘Neso jīvo, assāsapassāsā nāmete kāyasaṅkhārā’’ti thero abhidhammakathaṃ kathesi. Atha anantakāyo upāsakattaṃ paṭivedesīti.
அனந்தகாயபஞ்ஹோ சதுத்தோ².
Anantakāyapañho catuttho.
