| Library / Tipiṭaka / ติปิฎก • Tipiṭaka / เถรีคาถาปาฬิ • Therīgāthāpāḷi |
๒. วิมลาเถรีคาถา
2. Vimalātherīgāthā
๗๒.
72.
‘‘มตฺตา วเณฺณน รูเปน, โสภเคฺคน ยเสน จ;
‘‘Mattā vaṇṇena rūpena, sobhaggena yasena ca;
โยพฺพเนน จุปตฺถทฺธา, อญฺญาสมติมญฺญิหํฯ
Yobbanena cupatthaddhā, aññāsamatimaññihaṃ.
๗๓.
73.
‘‘วิภูเสตฺวา อิมํ กายํ, สุจิตฺตํ พาลลาปนํ;
‘‘Vibhūsetvā imaṃ kāyaṃ, sucittaṃ bālalāpanaṃ;
อฎฺฐาสิํ เวสิทฺวารมฺหิ, ลุโทฺท ปาสมิโวฑฺฑิยฯ
Aṭṭhāsiṃ vesidvāramhi, luddo pāsamivoḍḍiya.
๗๔.
74.
‘‘ปิลนฺธนํ วิทํเสนฺตี, คุยฺหํ ปกาสิกํ พหุํ;
‘‘Pilandhanaṃ vidaṃsentī, guyhaṃ pakāsikaṃ bahuṃ;
อกาสิํ วิวิธํ มายํ, อุชฺชคฺฆนฺตี พหุํ ชนํฯ
Akāsiṃ vividhaṃ māyaṃ, ujjagghantī bahuṃ janaṃ.
๗๕.
75.
‘‘สาชฺช ปิณฺฑํ จริตฺวาน, มุณฺฑา สงฺฆาฎิปารุตา;
‘‘Sājja piṇḍaṃ caritvāna, muṇḍā saṅghāṭipārutā;
นิสินฺนา รุกฺขมูลมฺหิ, อวิตกฺกสฺส ลาภินีฯ
Nisinnā rukkhamūlamhi, avitakkassa lābhinī.
๗๖.
76.
‘‘สเพฺพ โยคา สมุจฺฉินฺนา, เย ทิพฺพา เย จ มานุสา;
‘‘Sabbe yogā samucchinnā, ye dibbā ye ca mānusā;
เขเปตฺวา อาสเว สเพฺพ, สีติภูตามฺหิ นิพฺพุตา’’ติฯ
Khepetvā āsave sabbe, sītibhūtāmhi nibbutā’’ti.
… วิมลา ปุราณคณิกา เถรี…ฯ
… Vimalā purāṇagaṇikā therī….
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / เถรีคาถา-อฎฺฐกถา • Therīgāthā-aṭṭhakathā / ๒. วิมลาเถรีคาถาวณฺณนา • 2. Vimalātherīgāthāvaṇṇanā
