| Library / Tipiṭaka / තිපිටක • Tipiṭaka / ඛුද්දසික්ඛා-මූලසික්ඛා • Khuddasikkhā-mūlasikkhā |
31. විකප්පනානිද්දෙසො
31. Vikappanāniddeso
විකප්පනා චෙවාති –
Vikappanācevāti –
221.
221.
සම්මුඛා පරම්මුඛාති, දුවෙ වුත්තා විකප්පනා;
Sammukhā parammukhāti, duve vuttā vikappanā;
සම්මුඛාය විකප්පෙන්තො, බ්යත්තස්සෙකස්ස සන්තිකෙ;
Sammukhāya vikappento, byattassekassa santike;
‘‘ඉමං චීවරං තුය්හං, විකප්පෙමී’’ති භාසයෙ.
‘‘Imaṃ cīvaraṃ tuyhaṃ, vikappemī’’ti bhāsaye.
222.
222.
එත්තාවතා නිධෙතුංව, කප්පතී න ච කප්පති;
Ettāvatā nidhetuṃva, kappatī na ca kappati;
පරිභොගාදිකං තෙන, අප්පච්චුද්ධටභාවතො.
Paribhogādikaṃ tena, appaccuddhaṭabhāvato.
223. ‘‘මය්හං සන්තකං පරිභුඤ්ජ වා විස්සජ්ජෙහි වා යථාපච්චයං වා කරොහී’’ති –
223. ‘‘Mayhaṃ santakaṃ paribhuñja vā vissajjehi vā yathāpaccayaṃ vā karohī’’ti –
තෙන පච්චුද්ධටෙයෙව, පරිභොගාදි කප්පති.
Tena paccuddhaṭeyeva, paribhogādi kappati.
224.
224.
අපරා සම්මුඛාවෙකා, භික්ඛුස්සෙකස්ස සන්තිකෙ;
Aparā sammukhāvekā, bhikkhussekassa santike;
ගහෙත්වා නාමමෙකස්ස, පඤ්චන්නං සහධම්මිනං.
Gahetvā nāmamekassa, pañcannaṃ sahadhamminaṃ.
225. ‘‘ඉමං චීවරං තිස්සස්ස භික්ඛුනො, තිස්සාය භික්ඛුනියා, තිස්සස්ස සාමණෙරස්ස, තිස්සාය සාමණෙරියා, තිස්සාය සික්ඛමානාය විකප්පෙමී’’ති වත්තබ්බං.
225. ‘‘Imaṃ cīvaraṃ tissassa bhikkhuno, tissāya bhikkhuniyā, tissassa sāmaṇerassa, tissāya sāmaṇeriyā, tissāya sikkhamānāya vikappemī’’ti vattabbaṃ.
තෙන භික්ඛුනා ‘‘තිස්සස්ස භික්ඛුනො, තිස්සාය භික්ඛුනියා, තිස්සස්ස සාමණෙරස්ස , තිස්සාය සාමණෙරියා, තිස්සාය සික්ඛමානාය සන්තකං පරිභුඤ්ජ වා විස්සජ්ජෙහි වා යථාපච්චයං වා කරොහී’’ති වත්තබ්බං.
Tena bhikkhunā ‘‘tissassa bhikkhuno, tissāya bhikkhuniyā, tissassa sāmaṇerassa , tissāya sāmaṇeriyā, tissāya sikkhamānāya santakaṃ paribhuñja vā vissajjehi vā yathāpaccayaṃ vā karohī’’ti vattabbaṃ.
226.
226.
පරම්මුඛාවිකප්පනෙ-කස්සන්තිකෙවමීරයෙ;
Parammukhāvikappane-kassantikevamīraye;
‘‘ඉමං චීවරං තුය්හං විකප්පනත්ථාය දම්මී’’ති.
‘‘Imaṃ cīvaraṃ tuyhaṃ vikappanatthāya dammī’’ti.
227. තෙන වත්තබ්බො ‘‘කො තෙ මිත්තො වා සන්දිට්ඨො වා’’ති. ඉතරෙන චෙවං වත්තබ්බං ‘‘තිස්සො භික්ඛූ’’ති වා ‘‘තිස්සා භික්ඛුනී’’ති වා ‘‘තිස්සො සාමණෙරො’’ති වා ‘‘තිස්සා සාමණෙරී’’ති වා ‘‘තිස්සා සික්ඛමානා’’ති වා.
227. Tena vattabbo ‘‘ko te mitto vā sandiṭṭho vā’’ti. Itarena cevaṃ vattabbaṃ ‘‘tisso bhikkhū’’ti vā ‘‘tissā bhikkhunī’’ti vā ‘‘tisso sāmaṇero’’ti vā ‘‘tissā sāmaṇerī’’ti vā ‘‘tissā sikkhamānā’’ti vā.
පුන තෙන ‘‘අහං තිස්සස්ස තිස්සාය වා දම්මී’’ති විකප්පෙත්වා තෙනෙව ‘‘තිස්සස්ස භික්ඛුනො, තිස්සාය භික්ඛුනියා, තිස්සස්ස සාමණෙරස්ස, තිස්සාය සාමණෙරියා, තිස්සාය සික්ඛමානාය සන්තකං පරිභුඤ්ජ වා විස්සජ්ජෙහි වා යථාපච්චයං වා කරොහී’’ති පච්චුද්ධරිතබ්බං.
Puna tena ‘‘ahaṃ tissassa tissāya vā dammī’’ti vikappetvā teneva ‘‘tissassa bhikkhuno, tissāya bhikkhuniyā, tissassa sāmaṇerassa, tissāya sāmaṇeriyā, tissāya sikkhamānāya santakaṃ paribhuñja vā vissajjehi vā yathāpaccayaṃ vā karohī’’ti paccuddharitabbaṃ.
228.
228.
දූරසන්තිකත්තෙකත්තබහුභාවං විජානිය;
Dūrasantikattekattabahubhāvaṃ vijāniya;
‘‘එතං ඉම’’න්ති ‘‘එතානි, ඉමානී’’තෙත්ථ යොජයෙ.
‘‘Etaṃ ima’’nti ‘‘etāni, imānī’’tettha yojaye.
229.
229.
දසාහං මාසමෙකං වා, පඤ්ච වා කථිනත්ථතෙ;
Dasāhaṃ māsamekaṃ vā, pañca vā kathinatthate;
පාරිපූරත්ථමූනස්ස, පච්චාසා සති මාසකං;
Pāripūratthamūnassa, paccāsā sati māsakaṃ;
නුප්පාදයති නිස්සග්ගිං, නාධිට්ඨිතවිකප්පිතන්ති.
Nuppādayati nissaggiṃ, nādhiṭṭhitavikappitanti.
