| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
३. विज्जासुत्तं
3. Vijjāsuttaṃ
४०. वुत्तञ्हेतं भगवता, वुत्तमरहताति मे सुतं –
40. Vuttañhetaṃ bhagavatā, vuttamarahatāti me sutaṃ –
‘‘अविज्जा , भिक्खवे, पुब्बङ्गमा अकुसलानं धम्मानं समापत्तिया अन्वदेव अहिरिकं अनोत्तप्पं; विज्जा च खो, भिक्खवे, पुब्बङ्गमा कुसलानं धम्मानं समापत्तिया अन्वदेव हिरोत्तप्प’’न्ति। एतमत्थं भगवा अवोच। तत्थेतं इति वुच्चति –
‘‘Avijjā , bhikkhave, pubbaṅgamā akusalānaṃ dhammānaṃ samāpattiyā anvadeva ahirikaṃ anottappaṃ; vijjā ca kho, bhikkhave, pubbaṅgamā kusalānaṃ dhammānaṃ samāpattiyā anvadeva hirottappa’’nti. Etamatthaṃ bhagavā avoca. Tatthetaṃ iti vuccati –
‘‘या काचिमा दुग्गतियो, अस्मिं लोके परम्हि च।
‘‘Yā kācimā duggatiyo, asmiṃ loke paramhi ca;
अविज्जामूलिका सब्बा, इच्छालोभसमुस्सया॥
Avijjāmūlikā sabbā, icchālobhasamussayā.
‘‘यतो च होति पापिच्छो, अहिरीको अनादरो।
‘‘Yato ca hoti pāpiccho, ahirīko anādaro;
ततो पापं पसवति, अपायं तेन गच्छति॥
Tato pāpaṃ pasavati, apāyaṃ tena gacchati.
‘‘तस्मा छन्दञ्च लोभञ्च, अविज्जञ्च विराजयं।
‘‘Tasmā chandañca lobhañca, avijjañca virājayaṃ;
विज्जं उप्पादयं भिक्खु, सब्बा दुग्गतियो जहे’’ति॥
Vijjaṃ uppādayaṃ bhikkhu, sabbā duggatiyo jahe’’ti.
अयम्पि अत्थो वुत्तो भगवता, इति मे सुतन्ति। ततियं।
Ayampi attho vutto bhagavatā, iti me sutanti. Tatiyaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / ३. विज्जासुत्तवण्णना • 3. Vijjāsuttavaṇṇanā
