| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၄. ဝတ္ထသုတ္တဝဏ္ဏနာ
4. Vatthasuttavaṇṇanā
၁၈၅. ‘‘သတိသမ္ဗောဇ္ဈင္ဂော’’တိ ဧဝံ စေ မယ္ဟံ ဟောတီတိ သတိသမ္ဗောဇ္ဈင္ဂော နာမ သေဋ္ဌော ဥတ္တမော ပဝရော, တသ္မာဟံ သတိသမ္ဗောဇ္ဈင္ဂသီသေန ဖလသမာပတ္တိံ အပ္ပေတ္ဝာ ဝိဟရိသ္သာမီတိ ဧဝံ စေ မယ္ဟံ ပုဗ္ဗဘာဂေ ဟောတီတိ အတ္ထော။ ‘‘အပ္ပမာဏော’’တိ ဧဝံ မယ္ဟံ ဟောတီတိ သ္ဝာယံ သတိသမ္ဗောဇ္ဈင္ဂော, သဗ္ဗသော ပမာဏကရကိလေသာဘာဝတော အပ္ပမာဏဓမ္မာရမ္မဏတော စ အပ္ပမာဏောတိ ဧဝံ မယ္ဟံ အန္တောသမာပတ္တိယံ အသမ္မောဟဝသေန ဟောတိ။ သုပရိပုဏ္ဏောတိ ဘာဝနာပာရိပူရိယာ သုဋ္ဌု ပရိပုဏ္ဏောတိ ဧဝံ မယ္ဟံ အန္တောသမာပတ္တိယံ အသမ္မောဟဝသေန ဟောတီတိ။ တိဋ္ဌတီတိ ယထာကာလပရိစ္ဆေဒသမာပတ္တိယာ အဝဋ္ဌာနေန တပ္ပရိယာပန္နတာယ သတိသမ္ဗောဇ္ဈင္ဂော တိဋ္ဌတိ ပဋိဗန္ဓဝသေန။ ဥပ္ပာဒံ အနာဝဇ္ဇိတတ္တာတိ ဥပ္ပာဒသ္သ အနာဝဇ္ဇနေန အသမန္နာဟာရေန။ ဥပ္ပာဒသီသေန စေတ္ထ ဥပ္ပာဒဝန္တောဝ သင္ခာရာ ဂဟိတာ။ အနုပ္ပာဒန္တိ နိဗ္ဗာနံ ဥပ္ပာဒာဘာဝတော ဥပ္ပာဒဝန္တေဟိ စ ဝိနိသ္သဋတ္တာ။ ပဝတ္တန္တိ ဝိပာကပ္ပဝတ္တံ။ အပ္ပဝတ္တန္တိ နိဗ္ဗာနံ တပ္ပဋိက္ခေပတော။ နိမိတ္တန္တိ သဗ္ဗသင္ခာရနိမိတ္တံ။ အနိမိတ္တန္တိ နိဗ္ဗာနံ။ သင္ခာရေတိ ဥပ္ပာဒာဒိအနာမသနေန ကေဝလမေဝ သင္ခာရဂဟဏံ။ ဝိသင္ခာရန္တိ နိဗ္ဗာနံ။ အာဝဇ္ဇိတတ္တာ အာဝဇ္ဇိတကာလတော ပဋ္ဌာယ အာရဗ္ဘ ပဝတ္တိယာ သတိသမ္ဗောဇ္ဈင္ဂော တိဋ္ဌတိ။ အဋ္ဌဟာကာရေဟီတိ အဋ္ဌဟိ ကာရဏေဟိ။ ဇာနာတီတိ သမာပတ္တိတော ဝုဋ္ဌိတကာလေ ပဇာနာတိ။ အဋ္ဌဟာကာရေဟီတိ ဥပ္ပာဒာဝဇ္ဇနာဒီဟိ စေဝ အနုပ္ပာဒာဝဇ္ဇနာဒီဟိ စ ဝုတ္တာကာရဝိပရီတေဟိ အဋ္ဌဟိ အာကာရေဟိ စဝန္တံ သမာပတ္တိဝသေန အနဝဋ္ဌာနတောပိ ဂစ္ဆန္တံ စဝတီတိ ထေရော ပဇာနာတီတိ။
185.‘‘Satisambojjhaṅgo’’ti evaṃ ce mayhaṃ hotīti satisambojjhaṅgo nāma seṭṭho uttamo pavaro, tasmāhaṃ satisambojjhaṅgasīsena phalasamāpattiṃ appetvā viharissāmīti evaṃ ce mayhaṃ pubbabhāge hotīti attho. ‘‘Appamāṇo’’ti evaṃ mayhaṃ hotīti svāyaṃ satisambojjhaṅgo, sabbaso pamāṇakarakilesābhāvato appamāṇadhammārammaṇato ca appamāṇoti evaṃ mayhaṃ antosamāpattiyaṃ asammohavasena hoti. Suparipuṇṇoti bhāvanāpāripūriyā suṭṭhu paripuṇṇoti evaṃ mayhaṃ antosamāpattiyaṃ asammohavasena hotīti. Tiṭṭhatīti yathākālaparicchedasamāpattiyā avaṭṭhānena tappariyāpannatāya satisambojjhaṅgo tiṭṭhati paṭibandhavasena. Uppādaṃ anāvajjitattāti uppādassa anāvajjanena asamannāhārena. Uppādasīsena cettha uppādavantova saṅkhārā gahitā. Anuppādanti nibbānaṃ uppādābhāvato uppādavantehi ca vinissaṭattā. Pavattanti vipākappavattaṃ. Appavattanti nibbānaṃ tappaṭikkhepato. Nimittanti sabbasaṅkhāranimittaṃ. Animittanti nibbānaṃ. Saṅkhāreti uppādādianāmasanena kevalameva saṅkhāragahaṇaṃ. Visaṅkhāranti nibbānaṃ. Āvajjitattā āvajjitakālato paṭṭhāya ārabbha pavattiyā satisambojjhaṅgo tiṭṭhati. Aṭṭhahākārehīti aṭṭhahi kāraṇehi. Jānātīti samāpattito vuṭṭhitakāle pajānāti. Aṭṭhahākārehīti uppādāvajjanādīhi ceva anuppādāvajjanādīhi ca vuttākāraviparītehi aṭṭhahi ākārehi cavantaṃ samāpattivasena anavaṭṭhānatopi gacchantaṃ cavatīti thero pajānātīti.
ဖလဗောဇ္ဈင္ဂာတိ ဖလသမာပတ္တိပရိယာပန္နာ ဗောဇ္ဈင္ဂာ။ ကိံ ပန တေ ဝိသုံ ဝိသုံ ပဝတ္တန္တီတိ အာဟ ‘‘ယဒာ ဟီ’’တိအာဒိ။ သီသံ ကတ္ဝာတိ ပဓာနံ သေဋ္ဌံ ကတ္ဝာ။ တဒန္ဝယာတိ တဒနုဂတာ သတိသမ္ဗောဇ္ဈင္ဂံ အနုဂစ္ဆနကာ။ တဉ္စ ခော တထာ ကတ္ဝာ ဓမ္မံ ပစ္စဝေက္ခဏဝသေန။ ကေစိ ပန ‘‘တံ ပစ္စဝေက္ခဏာဒိကံ ကတ္ဝာ’’တိ ဝဒန္တိ။
Phalabojjhaṅgāti phalasamāpattipariyāpannā bojjhaṅgā. Kiṃ pana te visuṃ visuṃ pavattantīti āha ‘‘yadā hī’’tiādi. Sīsaṃ katvāti padhānaṃ seṭṭhaṃ katvā. Tadanvayāti tadanugatā satisambojjhaṅgaṃ anugacchanakā. Tañca kho tathā katvā dhammaṃ paccavekkhaṇavasena. Keci pana ‘‘taṃ paccavekkhaṇādikaṃ katvā’’ti vadanti.
ဝတ္ထသုတ္တဝဏ္ဏနာ နိဋ္ဌိတာ။
Vatthasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၄. ဝတ္ထသုတ္တံ • 4. Vatthasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၄. ဝတ္ထသုတ္တဝဏ္ဏနာ • 4. Vatthasuttavaṇṇanā
