| Library / Tipiṭaka / তিপিটক • Tipiṭaka / খুদ্দসিক্খা-মূলসিক্খা • Khuddasikkhā-mūlasikkhā |
৩০. ৰত্তনিদ্দেসৰণ্ণনা
30. Vattaniddesavaṇṇanā
২১৩. ইদানি আগন্তুকৰত্তাদীনি দস্সেতুং ‘‘ৰত্ত’’ন্তি মাতিকাপদং উদ্ধটং। পরিক্খিত্তস্স (চূল়ৰ॰ ৩৫৬ আদযো; চূল়ৰ॰ অট্ঠ॰ ৩৫৭ আদযো) ৰিহারস্স পরিক্খেপং, অপরিক্খিত্তস্স দ্ৰীহি লেড্ডুপাতেহি পরিচ্ছিন্নট্ঠানং পত্ৰা উপাহনং ওমুঞ্চিত্ৰা নীচং কত্ৰা পপ্ফোটেত্ৰা উপাহনং দণ্ডকেন গহেত্ৰা ছত্তং অপনামেত্ৰা সীসং ৰিৰরিত্ৰা সীসে চীৰরং খন্ধে করিত্ৰা সাধুকং অতরমানেন আরামো পৰিসিতব্বোতি অত্থো।
213. Idāni āgantukavattādīni dassetuṃ ‘‘vatta’’nti mātikāpadaṃ uddhaṭaṃ. Parikkhittassa (cūḷava. 356 ādayo; cūḷava. aṭṭha. 357 ādayo) vihārassa parikkhepaṃ, aparikkhittassa dvīhi leḍḍupātehi paricchinnaṭṭhānaṃ patvā upāhanaṃ omuñcitvā nīcaṃ katvā papphoṭetvā upāhanaṃ daṇḍakena gahetvā chattaṃ apanāmetvā sīsaṃ vivaritvā sīse cīvaraṃ khandhe karitvā sādhukaṃ ataramānena ārāmo pavisitabboti attho.
২১৪. পুচ্ছেয্য সযনাসনন্তি ‘‘কতমং মে সেনাসনং পাপুণাতি, কিং অজ্ঝাৰুত্থং ৰা অনজ্ঝাৰুত্থং ৰা’’তি এৰং পুচ্ছিতব্বন্তি অত্থো।
214.Puccheyyasayanāsananti ‘‘katamaṃ me senāsanaṃ pāpuṇāti, kiṃ ajjhāvutthaṃ vā anajjhāvutthaṃ vā’’ti evaṃ pucchitabbanti attho.
২১৫-৬. মঞ্চপীঠাদিদারুভণ্ডঞ্চ (চূল়ৰ॰ ৩৬০; চূল়ৰ॰ অট্ঠ॰ ৩৬০) রজনভাজনাদিমত্তিকাভণ্ডঞ্চ। আপুচ্ছাতি ভিক্খুস্স ৰা সামণেরস্স ৰা আরামিকস্স ৰা ‘‘আৰুসো ইমং জগ্গাহী’’তি আরোচেত্ৰাতি অত্থো। অঞ্ঞথাতি এৰং অকত্ৰাতি অত্থো।
215-6. Mañcapīṭhādidārubhaṇḍañca (cūḷava. 360; cūḷava. aṭṭha. 360) rajanabhājanādimattikābhaṇḍañca. Āpucchāti bhikkhussa vā sāmaṇerassa vā ārāmikassa vā ‘‘āvuso imaṃ jaggāhī’’ti ārocetvāti attho. Aññathāti evaṃ akatvāti attho.
২১৭-৮. ৰুড্ঢাগন্তুকস্সাতি এত্থ (চূল়ৰ॰ ৩৫৮ আদযো; চূল়ৰ॰ অট্ঠ॰ ৩৫৯ আদযো) দূরতোৰ দিস্ৰা যদি ‘‘ৰুড্ঢো’’তি জানাতি, তস্মিং অনাগতে এৰ আসনপঞ্ঞাপনাদিৰত্তং কাতব্বন্তি অত্থো। পাদোদপ্পভুতিন্তি পাদোদকং পাদপীঠং পাদকথলিকং উপনিক্খিপিতব্বন্তি অত্থো। পানীযেন আপুচ্ছন্তেন সচে সকিং আনীতং পানীযং সব্বং পিৰতি, পুনপি আপুচ্ছিতব্বো এৰ। পঞ্ঞপেতি ‘‘এতং তুম্হাকং সেনাসনং পাপুণাতী’’তি এৰং আচিক্খিতব্বন্তি অত্থো।
217-8.Vuḍḍhāgantukassāti ettha (cūḷava. 358 ādayo; cūḷava. aṭṭha. 359 ādayo) dūratova disvā yadi ‘‘vuḍḍho’’ti jānāti, tasmiṃ anāgate eva āsanapaññāpanādivattaṃ kātabbanti attho. Pādodappabhutinti pādodakaṃ pādapīṭhaṃ pādakathalikaṃ upanikkhipitabbanti attho. Pānīyena āpucchantena sace sakiṃ ānītaṃ pānīyaṃ sabbaṃ pivati, punapi āpucchitabbo eva. Paññapeti ‘‘etaṃ tumhākaṃ senāsanaṃ pāpuṇātī’’ti evaṃ ācikkhitabbanti attho.
২১৯-২০. ‘‘ভিক্খাচারগামো ইতো দূরে’’তি ৰা ‘‘সন্তিকে’’তি ৰা ‘‘কালস্সেৰ পিণ্ডায চরিতব্ব’’ন্তি ৰা ‘‘উপট্ঠাকে চরিতব্ব’’ন্তি ৰা গোচরো আচিক্খিতব্বো। অগোচরোতি মিচ্ছাদিট্ঠিকানং ৰা গামো, পরিচ্ছিন্নভিক্খকো ৰা গামো, যত্থ একস্স ৰা দ্ৰিন্নং ৰা ভিক্খা দীযতি, সো আচিক্খিতব্বোতি অত্থো। কতিকন্তি সঙ্ঘস্স কতিকট্ঠানং। ‘‘ইমং কালং পৰিসিতব্বং, ইমং কালং নিক্খমিতব্ব’’ন্তি এৰং পৰেসননিক্খমনকালং আচিক্খিতব্বং। কেসুচি ঠানেসু অমনুস্সা ৰা ৰাল়া ৰা হোন্তি, তস্মা এৰং আচিক্খিতব্বমেৰ। নিসিন্নোৰাতি ইদং আপত্তিঅভাৰমত্তদীপকং, উট্ঠহিত্ৰাপি সব্বং কাতুং ৰট্টতেৰ। ৰত্তৰিনিচ্ছযো।
219-20. ‘‘Bhikkhācāragāmo ito dūre’’ti vā ‘‘santike’’ti vā ‘‘kālasseva piṇḍāya caritabba’’nti vā ‘‘upaṭṭhāke caritabba’’nti vā gocaro ācikkhitabbo. Agocaroti micchādiṭṭhikānaṃ vā gāmo, paricchinnabhikkhako vā gāmo, yattha ekassa vā dvinnaṃ vā bhikkhā dīyati, so ācikkhitabboti attho. Katikanti saṅghassa katikaṭṭhānaṃ. ‘‘Imaṃ kālaṃ pavisitabbaṃ, imaṃ kālaṃ nikkhamitabba’’nti evaṃ pavesananikkhamanakālaṃ ācikkhitabbaṃ. Kesuci ṭhānesu amanussā vā vāḷā vā honti, tasmā evaṃ ācikkhitabbameva. Nisinnovāti idaṃ āpattiabhāvamattadīpakaṃ, uṭṭhahitvāpi sabbaṃ kātuṃ vaṭṭateva. Vattavinicchayo.
ৰত্তনিদ্দেসৰণ্ণনা নিট্ঠিতা।
Vattaniddesavaṇṇanā niṭṭhitā.
