| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၂. ဒုတိယဝဂ္ဂော
2. Dutiyavaggo
၁. ဝတပဒသုတ္တဝဏ္ဏနာ
1. Vatapadasuttavaṇṇanā
၂၅၇. သမာဒာတဗ္ဗတော ဝတာနိ, အညမညံ အသင္ကရသဘာဝေန ပဗ္ဗဇိတဗ္ဗတော ပဒာနိ, တတော ဧဝ အသံကိဏ္ဏဘာဂာတိ ကတ္ဝာ ‘‘ဝတကောဋ္ဌာသာနီ’’တိ ဝုတ္တံ။ သမတ္တာနီတိ ပုညဝိသေသတာယ ပုဇ္ဇဘဝဖလနိဗ္ဗတ္တနေန ကိတ္တိသညာနေန စ သမံ အတ္တာနိ သမတ္တာနိ။ ပရိပုဏ္ဏာနီတိ အခဏ္ဍာဒိဘာဝေန သဗ္ဗသော ပုဏ္ဏာနိ။ သမာဒိန္နာနီတိ တတ္ထ သက္ကစ္စကာရိတာယ သမ္မာ အာဒိန္နာနိ။ မာတုလာနီတိ ပိတုဘဂိနီ, န ယာ ကာစိ မာတုလသ္သ ဘရိယာ ကုလဇေဋ္ဌကာနံ အဓိပ္ပေတတ္တာ, ဘရိယာပိ ဝာ မာတုလသမ္ဗန္ဓတော ဂဟေတဗ္ဗာ, တထာ သတိ မဟာပိတုဘရိယာဒီနမ္ပိ သင္ဂဟော ဒဋ္ဌဗ္ဗော။
257. Samādātabbato vatāni, aññamaññaṃ asaṅkarasabhāvena pabbajitabbato padāni, tato eva asaṃkiṇṇabhāgāti katvā ‘‘vatakoṭṭhāsānī’’ti vuttaṃ. Samattānīti puññavisesatāya pujjabhavaphalanibbattanena kittisaññānena ca samaṃ attāni samattāni. Paripuṇṇānīti akhaṇḍādibhāvena sabbaso puṇṇāni. Samādinnānīti tattha sakkaccakāritāya sammā ādinnāni. Mātulānīti pitubhaginī, na yā kāci mātulassa bhariyā kulajeṭṭhakānaṃ adhippetattā, bhariyāpi vā mātulasambandhato gahetabbā, tathā sati mahāpitubhariyādīnampi saṅgaho daṭṭhabbo.
အာဒိ-သဒ္ဒေန ဇေဋ္ဌဘဂိနီနံ သင္ဂဟော။ အပစိတိကာရကောတိ တေသံ ပစ္စုဋ္ဌာနကရော။ ယော ကောစိ ဒဒန္တောပိ သာပေက္ခော ဒေတိ, သော မုတ္တစာဂော န ဟောတိ, အယံ ပန န ဧဝန္တိ ‘‘မုတ္တစာဂော ဟောတီ’’တိ ဝုတ္တံ။ ဝိသ္သဋ္ဌစာဂောတိ နိရပေက္ခပရိစ္စာဂောတိ အတ္ထော။ ယထာ ပာဏာတိပာတဗဟုလော ‘‘လောဟိတပာဏီ’’တိ ဝုစ္စတိ, တထာ ဒာနဗဟုလော ‘‘ပယတပာဏီ’’တိ ဝုတ္တောတိ အာဟ ‘‘ဒေယ္ယဓမ္မဒာနတ္ထာယ သဒာ ဓောတဟတ္ထော’’တိ။ ဝောသ္သဂ္ဂရတောတိ ဒေယ္ယဓမ္မသ္သ ပရိစ္စဇနေ အဘိရတော။ ပရေဟိ ယာစိတဗ္ဗာရဟောတိ ပရေဟိ ယာစိတုံ ယုတ္တော ဣစ္ဆိတသ္သ အတ္ထသ္သ တာဝဒေဝ ဝိသ္သဇ္ဇနတော။ ဒာနေနေဝ ယုတ္တောတိ သဗ္ဗကာလံ ဒာနေနေဝ ယုတ္တော အဘိဏ္ဟံ ပဝတ္တမဟာဒာနတ္တာ။ ဒာနေ စ သံဝိဘာဂေ စာတိ ပရသ္သ သမ္ပုဏ္ဏံ ကတ္ဝာ ပရိစ္စဇနသင္ခာတေ ဒာနေ စ အတ္တနာ ပရိဘုဉ္ဇိတဗ္ဗတော သံဝိဘဇနသင္ခာတေ သံဝိဘာဂေ စ ရတော အဘိရတော။
Ādi-saddena jeṭṭhabhaginīnaṃ saṅgaho. Apacitikārakoti tesaṃ paccuṭṭhānakaro. Yo koci dadantopi sāpekkho deti, so muttacāgo na hoti, ayaṃ pana na evanti ‘‘muttacāgo hotī’’ti vuttaṃ. Vissaṭṭhacāgoti nirapekkhapariccāgoti attho. Yathā pāṇātipātabahulo ‘‘lohitapāṇī’’ti vuccati, tathā dānabahulo ‘‘payatapāṇī’’ti vuttoti āha ‘‘deyyadhammadānatthāya sadā dhotahattho’’ti. Vossaggaratoti deyyadhammassa pariccajane abhirato. Parehi yācitabbārahoti parehi yācituṃ yutto icchitassa atthassa tāvadeva vissajjanato. Dāneneva yuttoti sabbakālaṃ dāneneva yutto abhiṇhaṃ pavattamahādānattā. Dāne ca saṃvibhāge cāti parassa sampuṇṇaṃ katvā pariccajanasaṅkhāte dāne ca attanā paribhuñjitabbato saṃvibhajanasaṅkhāte saṃvibhāge ca rato abhirato.
ဝတပဒသုတ္တဝဏ္ဏနာ နိဋ္ဌိတာ။
Vatapadasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁. ဝတပဒသုတ္တံ • 1. Vatapadasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁. ဝတပဒသုတ္တဝဏ္ဏနာ • 1. Vatapadasuttavaṇṇanā
