| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
৯. ৰরাহঙ্গপঞ্হো
9. Varāhaṅgapañho
৯. ‘‘ভন্তে নাগসেন, ‘ৰরাহস্স দ্ৰে অঙ্গানি গহেতব্বানী’তি যং ৰদেসি, কতমানি তানি দ্ৰে অঙ্গানি গহেতব্বানী’’তি? ‘‘যথা, মহারাজ, ৰরাহো সন্তত্তকঠিতে 1 গিম্হসমযে সম্পত্তে উদকং উপগচ্ছতি, এৰমেৰ খো, মহারাজ, যোগিনা যোগাৰচরেন দোসেন চিত্তে আলুল়িতখলিতৰিব্ভন্তসন্তত্তে সীতলামতপণীতমেত্তাভাৰনং উপগন্তব্বং। ইদং, মহারাজ, ৰরাহস্স পঠমং অঙ্গং গহেতব্বং।
9. ‘‘Bhante nāgasena, ‘varāhassa dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti? ‘‘Yathā, mahārāja, varāho santattakaṭhite 2 gimhasamaye sampatte udakaṃ upagacchati, evameva kho, mahārāja, yoginā yogāvacarena dosena citte āluḷitakhalitavibbhantasantatte sītalāmatapaṇītamettābhāvanaṃ upagantabbaṃ. Idaṃ, mahārāja, varāhassa paṭhamaṃ aṅgaṃ gahetabbaṃ.
‘‘পুন চপরং, মহারাজ, ৰরাহো চিক্খল্লমুদকমুপগন্ত্ৰা নাসিকায পথৰিং খণিত্ৰা দোণিং কত্ৰা দোণিকায সযতি, এৰমেৰ খো, মহারাজ, যোগিনা যোগাৰচরেন মানসে কাযং নিক্খিপিত্ৰা আরম্মণন্তরগতেন সযিতব্বং। ইদং, মহারাজ, ৰরাহস্স দুতিযং অঙ্গং গহেতব্বং। ভাসিতম্পেতং, মহারাজ, থেরেন পিণ্ডোলভারদ্ৰাজেন –
‘‘Puna caparaṃ, mahārāja, varāho cikkhallamudakamupagantvā nāsikāya pathaviṃ khaṇitvā doṇiṃ katvā doṇikāya sayati, evameva kho, mahārāja, yoginā yogāvacarena mānase kāyaṃ nikkhipitvā ārammaṇantaragatena sayitabbaṃ. Idaṃ, mahārāja, varāhassa dutiyaṃ aṅgaṃ gahetabbaṃ. Bhāsitampetaṃ, mahārāja, therena piṇḍolabhāradvājena –
একাকিযো অদুতিযো, সেতি আরম্মণন্তরে’’’তি॥
Ekākiyo adutiyo, seti ārammaṇantare’’’ti.
ৰরাহঙ্গপঞ্হো নৰমো।
Varāhaṅgapañho navamo.
Footnotes:
