| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
৭. ৰংসঙ্গপঞ্হো
7. Vaṃsaṅgapañho
৭. ‘‘ভন্তে নাগসেন, ‘ৰংসস্স একং অঙ্গং গহেতব্ব’ন্তি যং ৰদেসি, কতমং তং একং অঙ্গং গহেতব্ব’’ন্তি? ‘‘যথা, মহারাজ, ৰংসো যত্থ ৰাতো, তত্থ অনুলোমেতি, নাঞ্ঞত্থমনুধাৰতি, এৰমেৰ খো, মহারাজ, যোগিনা যোগাৰচরেন যং বুদ্ধেন ভগৰতা ভাসিতং নৰঙ্গং সত্থু সাসনং, তং অনুলোমযিত্ৰা কপ্পিযে অনৰজ্জে ঠত্ৰা সমণধম্মং যেৰ পরিযেসিতব্বং। ইদং, মহারাজ, ৰংসস্স একং অঙ্গং গহেতব্বং। ভাসিতম্পেতং মহারাজ থেরেন রাহুলেন –
7. ‘‘Bhante nāgasena, ‘vaṃsassa ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, vaṃso yattha vāto, tattha anulometi, nāññatthamanudhāvati, evameva kho, mahārāja, yoginā yogāvacarena yaṃ buddhena bhagavatā bhāsitaṃ navaṅgaṃ satthu sāsanaṃ, taṃ anulomayitvā kappiye anavajje ṭhatvā samaṇadhammaṃ yeva pariyesitabbaṃ. Idaṃ, mahārāja, vaṃsassa ekaṃ aṅgaṃ gahetabbaṃ. Bhāsitampetaṃ mahārāja therena rāhulena –
‘‘‘নৰঙ্গং বুদ্ধৰচনং, অনুলোমেত্ৰান সব্বদা।
‘‘‘Navaṅgaṃ buddhavacanaṃ, anulometvāna sabbadā;
কপ্পিযে অনৰজ্জস্মিং, ঠত্ৰাপাযং সমুত্তরি’’’ন্তি॥
Kappiye anavajjasmiṃ, ṭhatvāpāyaṃ samuttari’’’nti.
ৰংসঙ্গপঞ্হো সত্তমো।
Vaṃsaṅgapañho sattamo.
