| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၁၁. ဝလာဟကသံယုတ္တဝဏ္ဏနာ
11. Valāhakasaṃyuttavaṇṇanā
၅၅၀-၆၀၆. လောကံ ဝာလေန္တာ သံဝရန္တာ ဆာဒေန္တာ အဟန္တိ ပရိယေသန္တီတိ ဝလာဟာ, ဒေဝပုတ္တာ။ တေသံ သမူဟော ဝလာဟကဒေဝကာယောတိ အာဟ ‘‘ဝလာဟကကာယိကာ’’တိအာဒိ။ သီတကရဏဝလာဟကာတိ သီတဟရဏဝလာဟကာ။ သေသပဒေသူတိ ဥဏ္ဟဝလာဟကာဒိပဒေသု။ ဧသေဝ နယောတိ ‘‘ဥဏ္ဟကရဏဝလာဟကာ’’တိအာဒိနာ အတ္ထော ဝေဒိတဗ္ဗော။ စိတ္တဋ္ဌပနန္တိ ‘‘သီတံ ဟောတူ’’တိ ဧဝံ စိတ္တသ္သ ဥပ္ပာဒနံ။ ဝသ္သာနေတိ ဝသ္သကာလေ။ ဥတုသမုဋ္ဌာနမေဝာတိ ပာကတိကသီတမေဝာတိ အတ္ထော။ ဥဏ္ဟေပီတိ ဥဏ္ဟကာလေ။ အဗ္ဘမဏ္ဍပောတိ မဏ္ဍပသဒိသအဗ္ဘပဋလဝိတာနမာဟ။ အဗ္ဘံ ဥပ္ပဇ္ဇတီတိ တဟံ တဟံ ပဋလံ ဥဋ္ဌဟတိ။ အဗ္ဘေယေဝာတိ အဗ္ဘကာလေ ဧဝ, ဝသ္သာနေတိ အတ္ထော။ အတိအဗ္ဘန္တိ သတပဋလသဟသ္သပဋလံ ဟုတ္ဝာ အဗ္ဘုဋ္ဌာနံ။ စိတ္တဝေသာခမာသေသူတိ ဝသန္တကာလံ သန္ဓာယာဟ။ တဒာ ဟိ ဝိဒ္ဓော ဝိဂတဝလာဟကော ဒေဝော ဘဝိတုံ ယုတ္တော။ ဥတ္တရဒက္ခိဏာဒီတိ အာဒိ-သဒ္ဒေန ပစ္ဆိမဝာတာဒိံ သင္ဂဏ္ဟာတိ။ ပကတိဝာတောတိ ပကတိယာ သဘာဝေန ဝာယနကဝာတော။ တံ ဥတုသမုဋ္ဌာနမေဝာတိ အာဟာရူပဇီဝီနံ သတ္တာနံ သာဓာရဏကမ္မူပနိသ္သယဥတုသမုဋ္ဌာနမေဝ။ ဧသ နယော ဥတုသမုဋ္ဌာနသီတုဏ္ဟဝာတေသုပိ။ တမ္ပိ ဟိ အာဟာရူပဇီဝီနံ သတ္တာနံ သာဓာရဏကမ္မူပနိသ္သယမေဝာတိ။
550-606. Lokaṃ vālentā saṃvarantā chādentā ahanti pariyesantīti valāhā, devaputtā. Tesaṃ samūho valāhakadevakāyoti āha ‘‘valāhakakāyikā’’tiādi. Sītakaraṇavalāhakāti sītaharaṇavalāhakā. Sesapadesūti uṇhavalāhakādipadesu. Eseva nayoti ‘‘uṇhakaraṇavalāhakā’’tiādinā attho veditabbo. Cittaṭṭhapananti ‘‘sītaṃ hotū’’ti evaṃ cittassa uppādanaṃ. Vassāneti vassakāle. Utusamuṭṭhānamevāti pākatikasītamevāti attho. Uṇhepīti uṇhakāle. Abbhamaṇḍapoti maṇḍapasadisaabbhapaṭalavitānamāha. Abbhaṃ uppajjatīti tahaṃ tahaṃ paṭalaṃ uṭṭhahati. Abbheyevāti abbhakāle eva, vassāneti attho. Atiabbhanti satapaṭalasahassapaṭalaṃ hutvā abbhuṭṭhānaṃ. Cittavesākhamāsesūti vasantakālaṃ sandhāyāha. Tadā hi viddho vigatavalāhako devo bhavituṃ yutto. Uttaradakkhiṇādīti ādi-saddena pacchimavātādiṃ saṅgaṇhāti. Pakativātoti pakatiyā sabhāvena vāyanakavāto. Taṃ utusamuṭṭhānamevāti āhārūpajīvīnaṃ sattānaṃ sādhāraṇakammūpanissayautusamuṭṭhānameva. Esa nayo utusamuṭṭhānasītuṇhavātesupi. Tampi hi āhārūpajīvīnaṃ sattānaṃ sādhāraṇakammūpanissayamevāti.
ဂီတန္တိ မေဃဂီတံ။ သစ္စကိရိယာယာတိ တာဒိသာနံ ပုရိသဝိသေသာနံ သစ္စာဓိဋ္ဌာနေန။ ဣဒ္ဓိဗလေနာတိ ဣဒ္ဓိမန္တာနံ ဣဒ္ဓိအာနုဘာဝေန။ ဝိနာသမေဃေနာတိ ကပ္ပဝိနာသကမေဃေန။ အညေနပိ ကဏ္ဟပာပိကသတ္တာနံ ပာပကမ္မပစ္စယာ ဥပ္ပန္နဝိနာသမေဃေန ဝုဋ္ဌေန သော သော ဒေသော ဝိနသ္သတေဝ။
Gītanti meghagītaṃ. Saccakiriyāyāti tādisānaṃ purisavisesānaṃ saccādhiṭṭhānena. Iddhibalenāti iddhimantānaṃ iddhiānubhāvena. Vināsameghenāti kappavināsakameghena. Aññenapi kaṇhapāpikasattānaṃ pāpakammapaccayā uppannavināsameghena vuṭṭhena so so deso vinassateva.
ဝလာဟကသံယုတ္တဝဏ္ဏနာ နိဋ္ဌိတာ။
Valāhakasaṃyuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya
၁. သုဒ္ဓိကသုတ္တံ • 1. Suddhikasuttaṃ
၂. သုစရိတသုတ္တံ • 2. Sucaritasuttaṃ
၃-၁၂. သီတဝလာဟကဒာနူပကာရသုတ္တဒသကံ • 3-12. Sītavalāhakadānūpakārasuttadasakaṃ
၁၃-၅၂. ဥဏ္ဟဝလာဟကဒာနူပကာရသုတ္တစာလီသကံ • 13-52. Uṇhavalāhakadānūpakārasuttacālīsakaṃ
၅၃. သီတဝလာဟကသုတ္တံ • 53. Sītavalāhakasuttaṃ
၅၄. ဥဏ္ဟဝလာဟကသုတ္တံ • 54. Uṇhavalāhakasuttaṃ
၅၅. အဗ္ဘဝလာဟကသုတ္တံ • 55. Abbhavalāhakasuttaṃ
၅၆. ဝာတဝလာဟကသုတ္တံ • 56. Vātavalāhakasuttaṃ
၅၇. ဝသ္သဝလာဟကသုတ္တံ • 57. Vassavalāhakasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁၁. ဝလာဟကသံယုတ္တဝဏ္ဏနာ • 11. Valāhakasaṃyuttavaṇṇanā
