| Library / Tipiṭaka / តិបិដក • Tipiṭaka / មិលិន្ទបញ្ហបាឡិ • Milindapañhapāḷi |
៧. វគ្គុលិង្គបញ្ហោ
7. Vagguliṅgapañho
៧. ‘‘ភន្តេ នាគសេន, ‘វគ្គុលិស្ស ទ្វេ អង្គានិ គហេតព្ពានី’តិ យំ វទេសិ, កតមានិ តានិ ទ្វេ អង្គានិ គហេតព្ពានី’’តិ? ‘‘យថា, មហារាជ, វគ្គុលិ គេហំ បវិសិត្វា វិចរិត្វា និក្ខមតិ, ន តត្ថ បលិពុទ្ធតិ, ឯវមេវ ខោ, មហារាជ, យោគិនា យោគាវចរេន គាមំ បិណ្ឌាយ បវិសិត្វា សបទានំ វិចរិត្វា បដិលទ្ធលាភេន ខិប្បមេវ និក្ខមិតព្ពំ, ន តត្ថ បលិពុទ្ធេន ភវិតព្ពំ។ ឥទំ, មហារាជ, វគ្គុលិស្ស បឋមំ អង្គំ គហេតព្ពំ។
7. ‘‘Bhante nāgasena, ‘vaggulissa dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti? ‘‘Yathā, mahārāja, vagguli gehaṃ pavisitvā vicaritvā nikkhamati, na tattha palibuddhati, evameva kho, mahārāja, yoginā yogāvacarena gāmaṃ piṇḍāya pavisitvā sapadānaṃ vicaritvā paṭiladdhalābhena khippameva nikkhamitabbaṃ, na tattha palibuddhena bhavitabbaṃ. Idaṃ, mahārāja, vaggulissa paṭhamaṃ aṅgaṃ gahetabbaṃ.
‘‘បុន ចបរំ, មហារាជ, វគ្គុលិ បរគេហេ វសមានោ ន តេសំ បរិហានិំ ករោតិ, ឯវមេវ ខោ, មហារាជ, យោគិនា យោគាវចរេន កុលានិ ឧបសង្កមិត្វា អតិយាចនាយ វា វិញ្ញត្តិពហុលតាយ វា កាយទោសពហុលតាយ វា អតិភាណិតាយ វា សមានសុខទុក្ខតាយ វា ន តេសំ កោចិ វិប្បដិសារោ ករណីយោ, នបិ តេសំ មូលកម្មំ បរិហាបេតព្ពំ, សព្ពថា វឌ្ឍិ យេវ ឥច្ឆិតព្ពា។ ឥទំ, មហារាជ, វគ្គុលិស្ស ទុតិយំ អង្គំ គហេតព្ពំ។ ភាសិតម្បេតំ, មហារាជ, ភគវតា ទេវាតិទេវេន ទីឃនិកាយវរេ លក្ខណសុត្តន្តេ –
‘‘Puna caparaṃ, mahārāja, vagguli paragehe vasamāno na tesaṃ parihāniṃ karoti, evameva kho, mahārāja, yoginā yogāvacarena kulāni upasaṅkamitvā atiyācanāya vā viññattibahulatāya vā kāyadosabahulatāya vā atibhāṇitāya vā samānasukhadukkhatāya vā na tesaṃ koci vippaṭisāro karaṇīyo, napi tesaṃ mūlakammaṃ parihāpetabbaṃ, sabbathā vaḍḍhi yeva icchitabbā. Idaṃ, mahārāja, vaggulissa dutiyaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena dīghanikāyavare lakkhaṇasuttante –
‘‘‘សុទ្ធាយ សីលេន សុតេន ពុទ្ធិយា, ចាគេន ធម្មេន ពហូហិ សាធុហិ;
‘‘‘Suddhāya sīlena sutena buddhiyā, cāgena dhammena bahūhi sādhuhi;
ធនេន ធញ្ញេន ច ខេត្តវត្ថុនា, បុត្តេហិ ទារេហិ ចតុប្បទេហិ ច។
Dhanena dhaññena ca khettavatthunā, puttehi dārehi catuppadehi ca.
‘‘‘ញាតីហិ មិត្តេហិ ច ពន្ធវេហិ, ពលេន វណ្ណេន សុខេន ចូភយំ;
‘‘‘Ñātīhi mittehi ca bandhavehi, balena vaṇṇena sukhena cūbhayaṃ;
កថំ ន ហាយេយ្យុំ បរេតិ ឥច្ឆតិ, អត្ថសមិទ្ធិញ្ច បនាភិកង្ខតី’’’តិ។
Kathaṃ na hāyeyyuṃ pareti icchati, atthasamiddhiñca panābhikaṅkhatī’’’ti.
វគ្គុលិង្គបញ្ហោ សត្តមោ។
Vagguliṅgapañho sattamo.
