| Library / Tipiṭaka / តិបិដក • Tipiṭaka / មិលិន្ទបញ្ហបាឡិ • Milindapañhapāḷi |
៨. ជលូកង្គបញ្ហោ
8. Jalūkaṅgapañho
៨. ‘‘ភន្តេ នាគសេន, ‘ជលូកាយ ឯកំ អង្គំ គហេតព្ព’ន្តិ យំ វទេសិ, កតមំ តំ ឯកំ អង្គំ គហេតព្ព’’ន្តិ? ‘‘យថា, មហារាជ, ជលូកា យត្ថ អល្លីយតិ, តត្ថេវ ទឡ្ហំ អល្លីយិត្វា រុហិរំ បិវតិ, ឯវមេវ ខោ, មហារាជ, យោគិនា យោគាវចរេន យស្មិំ អារម្មណេ ចិត្តំ អល្លីយតិ, តំ អារម្មណំ វណ្ណតោ ច សណ្ឋានតោ ច ទិសតោ ច ឱកាសតោ ច បរិច្ឆេទតោ ច លិង្គតោ ច និមិត្តតោ ច ទឡ្ហំ បតិដ្ឋាបេត្វា តេនេវារម្មណេន វិមុត្តិរសមសេចនកំ បាតព្ពំ។ ឥទំ, មហារាជ, ជលូកាយ ឯកំ អង្គំ គហេតព្ពំ។ ភាសិតម្បេតំ, មហារាជ, ថេរេន អនុរុទ្ធេន –
8. ‘‘Bhante nāgasena, ‘jalūkāya ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, jalūkā yattha allīyati, tattheva daḷhaṃ allīyitvā ruhiraṃ pivati, evameva kho, mahārāja, yoginā yogāvacarena yasmiṃ ārammaṇe cittaṃ allīyati, taṃ ārammaṇaṃ vaṇṇato ca saṇṭhānato ca disato ca okāsato ca paricchedato ca liṅgato ca nimittato ca daḷhaṃ patiṭṭhāpetvā tenevārammaṇena vimuttirasamasecanakaṃ pātabbaṃ. Idaṃ, mahārāja, jalūkāya ekaṃ aṅgaṃ gahetabbaṃ. Bhāsitampetaṃ, mahārāja, therena anuruddhena –
‘‘‘បរិសុទ្ធេន ចិត្តេន, អារម្មណេ បតិដ្ឋាយ;
‘‘‘Parisuddhena cittena, ārammaṇe patiṭṭhāya;
តេន ចិត្តេន បាតព្ពំ, វិមុត្តិរសមសេចន’’’ន្តិ។
Tena cittena pātabbaṃ, vimuttirasamasecana’’’nti.
ជលូកង្គបញ្ហោ អដ្ឋមោ។
Jalūkaṅgapañho aṭṭhamo.
