| Library / Tipiṭaka / តិបិដក • Tipiṭaka / ថេរគាថាបាឡិ • Theragāthāpāḷi |
៥. វឌ្ឍត្ថេរគាថា
5. Vaḍḍhattheragāthā
៣៣៥.
335.
‘‘សាធូ ហិ កិរ មេ មាតា, បតោទំ ឧបទំសយិ;
‘‘Sādhū hi kira me mātā, patodaṃ upadaṃsayi;
យស្សាហំ វចនំ សុត្វា, អនុសិដ្ឋោ ជនេត្តិយា;
Yassāhaṃ vacanaṃ sutvā, anusiṭṭho janettiyā;
អារទ្ធវីរិយោ បហិតត្តោ, បត្តោ សម្ពោធិមុត្តមំ។
Āraddhavīriyo pahitatto, patto sambodhimuttamaṃ.
៣៣៦.
336.
‘‘អរហា ទក្ខិណេយ្យោម្ហិ, តេវិជ្ជោ អមតទ្ទសោ;
‘‘Arahā dakkhiṇeyyomhi, tevijjo amataddaso;
ជេត្វា នមុចិនោ សេនំ, វិហរាមិ អនាសវោ។
Jetvā namucino senaṃ, viharāmi anāsavo.
៣៣៧.
337.
‘‘អជ្ឈត្តញ្ច ពហិទ្ធា ច, យេ មេ វិជ្ជិំសុ អាសវា;
‘‘Ajjhattañca bahiddhā ca, ye me vijjiṃsu āsavā;
សព្ពេ អសេសា ឧច្ឆិន្នា, ន ច ឧប្បជ្ជរេ បុន។
Sabbe asesā ucchinnā, na ca uppajjare puna.
៣៣៨.
338.
‘‘វិសារទា ខោ ភគិនី, ឯតមត្ថំ អភាសយិ;
‘‘Visāradā kho bhaginī, etamatthaṃ abhāsayi;
‘អបិហា នូន មយិបិ, វនថោ តេ ន វិជ្ជតិ’។
‘Apihā nūna mayipi, vanatho te na vijjati’.
៣៣៩.
339.
‘‘បរិយន្តកតំ ទុក្ខំ, អន្តិមោយំ សមុស្សយោ;
‘‘Pariyantakataṃ dukkhaṃ, antimoyaṃ samussayo;
ជាតិមរណសំសារោ, នត្ថិ ទានិ បុនព្ភវោ’’តិ។
Jātimaraṇasaṃsāro, natthi dāni punabbhavo’’ti.
… វឌ្ឍោ ថេរោ…។
… Vaḍḍho thero….
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ថេរគាថា-អដ្ឋកថា • Theragāthā-aṭṭhakathā / ៥. វឌ្ឍត្ថេរគាថាវណ្ណនា • 5. Vaḍḍhattheragāthāvaṇṇanā
